無綫小花湯洛雯（靚湯）係唔少男士心目中嘅女神，有名畀你叫靚湯喎，就知佢有副靚樣，仲要有弗爆身材，天使面孔配上魔鬼身材，簡直係冇得輸，試問有邊個男人抵擋得住先？難怪人人都話女神出擊，溝仔百發百中。而靚湯近期拍片教溝仔，實行過幾招畀大家，各位姊妹學嘢
單眼放電
無綫官方FACEBOOK專頁「myTV SUPER」呢日上載咗短片，片中靚湯一人分飾兩角，其中化身心理學家教各位怕醜妹點用小動作表達愛意，仲親身示範埋效果。第一招就係同心儀對象講嘢時頭部微傾扮cute，呢個時候仲要出動埋一對迷人電眼，不時單眼放電，到時對方實暈晒浪，就連網友睇見都話夠晒性感又挑逗，呢招勁掂呀！
埋身親近對方
第二招係經常笑容滿面，不過傻更更嘅笑容自然fail，靚湯教路笑都有技巧，應該要顴部肌肉收縮＋嘴角向上＋眼角出現魚尾紋，成功擠出得意笑眼，男人見到都冧爆，得咗！如果用咗以上兩招，心儀對象都係接收唔到愛意咁點算？靚湯教大家殺食嘅招數，就係主動出擊埋身親近對方，用肌膚之親傳情，獲得男神芳心話咁易！
同心穎BB爭仔？
不過，心水清嘅網友就話「your face your fate」，貴為女神級嘅靚湯單靠個樣已經溝到仔，點使用呢啲招數？仲有網友趁機表白，表示如果靚湯話想做佢女朋友，即刻𦧲飯應兼跪地感恩咁誇張，認真搞笑！不過一班網友唔好ff咁多，皆因片尾靚湯自爆暗戀男神馬國明（劇情需要咋！），仲霸氣咁話要硬馬明BB，擺明同好姊妹黃心穎爭仔，大家又點同有樓有車又有樣嘅男神鬥先？唉......
網民有話兒：
AngelXXXgYin：姊妹們快啲睇片學嘢。
XXmonChXX：使咩出咁多招，靚湯出聲話想做我女朋友，即刻𦧲飯應！！！
XXXhaelPeng：靚湯咁多年都係得一個羅天宇，教溝仔無（冇）咩信服力喎！
JEFFMAXXX：你的樣子如何，呢d（啲）招數嘅成效也必如何。
|
鍾意就快D Share啦！
|
|
|
