今日清明節，孝順嘅蔡卓妍（阿Sa）同家人到澳門竹林寺掃墓，拜祭供奉喺當地嘅外公外婆，過程被《蘋果》讀者Carmen透過「爆相爆片」直擊，Carmen喺 ...
今日清明節，孝順嘅蔡卓妍（阿Sa）同家人到澳門竹林寺掃墓，拜祭供奉喺當地嘅外公外婆，過程被《蘋果》讀者Carmen透過「爆相爆片」直擊，Carmen喺電話表示：「今日大約1點，見到阿Sa一行六人，其中有兩個幫手攞4袋嘢，佢哋先去拜觀音，之後再拜山，由於前面好多人，佢行唔到去上香，聽到阿Sa話：「『估唔到今日咁熱鬧。』」當時寺內約有百幾人拜祭，大家都要輪住上香，阿Sa同家人企喺度等，Carmen表示：「因為太多人，阿Sa迫唔到去香爐，只係揸住幾支香鞠躬，之後交畀家人上香，跟住阿Sa攞紙紥品再鞠躬，由於好多人認到阿Sa，不停叫佢個名，佢望一望就耷低頭，唔想咁高調，逗留咗15分鐘就急急腳走。」從Carmen提供嘅「爆相爆片」所見，阿Sa着藍色長褸戴黑色口罩，媽咪點完一紥香後交畀阿Sa，由阿Sa再傳遞畀其他家人，Carmen話阿Sa表現都好友善，可能清明正日關係，竹林寺人流好多，越嚟越多人發現阿Sa，所以佢鞠躬後就匆匆離去，由家人火化冥鏹。阿Sa嘅外公馮戒聞（馮萱泰）係著名畫家同雕塑家，其作品曾於香港、法國、加拿大展出，佢生前係澳門竹林寺嘅住持，於2010年去世後，骨灰安放於寺內。前年佢嘅作品《引福歸堂》於拍賣行拍賣，畫中鍾馗滿臉喜悅，左手持劍，右手引蝠，充滿吉意。而阿Sa外婆於去年逝世，阿Sa於社交網悼念：「婆婆你在天上和公公團聚了嗎？希望你現在可以沒有痛苦沒有牽掛，我會一直想念你，永遠愛你。」
