2019年4月24日 星期三

《復仇者聯盟4》:《復仇者聯盟4》劇透慎入 粉絲數十大驚喜位 __,復仇者聯盟,復仇者聯盟4,

慎入呀!漫威終極晒冷作《復仇者聯盟4:終局之戰》(Avengers:Endgame)今日於中港台率先上映,如果你未睇套戲,睇到呢句好去番出主頁欣賞其他 ...


慎入呀!


漫威終極晒冷作《復仇者聯盟4:終局之戰》(Avengers:Endgame)今日於中港台率先上映,如果你未睇套戲,睇到呢句好去番出主頁欣賞其他東網新聞喇!呢篇文章係專為已睇《復4》粉絲而設嘅,唔係唔畀你睇,係唔想劇透影響你觀映感受啫!咁已睇嘅粉絲呢,電影結局同所有人嘅命運都清楚啦,「你知我知單眼佬都知」就算,東網就同你盤點一下,今集十個粉絲應該冧爆嘅驚喜位!

作為十周年集合21部前作大成嘅電影,《復4》送上好多同前作有關嘅驚喜,睇少眼或者唔好記性就可能Miss咗,你又睇到幾多?

1.客串:「漫威之父」史丹利臨終前完成《復4》拍攝工作,22部漫威電影都有佢身影,佢今集做精靈司機,完美告別觀眾。而執導《美國隊長2》後成為漫威主要名導嘅祖羅素同安東尼羅素兩兄弟亦親身送驚喜,前者粉墨登場,於創傷分享會同「美國隊長」傾心事!

2.芝士漢堡:「鐵甲奇俠」係漫威元老級嘅角色,今集不單有佢個人系列鐵三角—即係佢同「Happy」及「Pepper」現身,後者堅着盔甲落場外,佢生下嘅囡囡仲愛食芝士漢堡,被「Happy」爆似足老竇。於2008年《鐵甲奇俠》中,「鐵甲奇俠」逃生後第一件事就想食芝士漢堡,仲一連隊咗幾個。

3.九頭蛇:「美國隊長」今集狂送懷舊驚喜位,於《美國隊長2》當中,佢喺電梯同被「九頭蛇」滲入嘅「神盾局」特工對手是為系列精彩場面之一,今集佢再次重現電梯困獸鬥,但已學精嘅佢只需憑對方組織暗語「Hail,Hydra」(九頭蛇萬歲)就解決問題唔使打!

4.「Peggy」:作為終極之作,電影仲有彌補遺憾位,「美國隊長」於第一集未能與女友「Peggy」完成共舞之約,今集終於憑時空穿梭去到自己變大隻嘅舊地見番對方,埋尾仲可以完成浪漫共舞場面,成為一大感動位。

5.布達佩斯:「黒寡婦」同「鷹眼」於今集拍住上搵「靈魂寶石」,佢兩個坐太空船上太空時又再提起於「布達佩斯嗰次」!如果粉絲好記性,佢哋於《復仇者聯盟》紐約一戰時,「黑寡婦」打外星怪物時就同過「鷹眼」講:「呢個場面令人諗布達佩斯!」今集亦再次提起呢場只有佢兩個先知嘅秘密之戰。

6.經典金句:今集仲有出現多個主角於前作嘅金句,「美國隊長」時空穿越後自己打自己,早年嘅自己被打到瞓底時講咗句:「我可以打足成日!」佢即時回應:「我知!」呢句對白係佢個人系列集集都出現,辨識度勁高!至於「鐵甲奇俠」今集大戰時亦講咗佢於《鐵甲奇俠》講過嘅名句:「I'm Iron Man.」秒速喚起粉絲回憶!

7.雷神重返聖域界:講到彌補遺憾,電影有「雷神」返到聖域界見番已故媽媽嘅一幕,因為殺唔死「魁隆」而放棄自我嘅佢獲媽媽點醒再發奮,同場仲有《雷神奇俠 2:黑暗世界》出現過嘅女友「Jane」同埋「洛基」,聖域界要角除咗「奧丁」都好齊人。

8.古一現身:唔止多部個人系列嘅要角再次現身,就連僅出一部電影嘅《奇異博士》都有「古一」現真身!今集「變形俠醫」去早年想搵「奇異博士」拎「時間寶石」,查實當時粒石係由佢師傅「古一」保管,最後佢都打動到對方,亦保證會歸還以令時空回復原狀。

9.雷神之錘:「雷神」今集穿梭時空去聖域界有拎番早年未被打爛嘅雷神之錘,末段大戰時佢甩咗手,「美國隊長」竟然拎得起仲救咗佢,「雷神」即時講咗句:「我都話你得㗎」呢度就呼應番《復仇者聯盟 2:奧創紀元》,眾復仇者曾分別去試拎要有資格先拎到嘅雷神之錘,當時人人都唔得,只有「美國隊長」郁到少少。

10.串星閃現:除咗一眾於前作出現過嘅要角現身,今集結尾仲有一個感人場面,眾人着黑衫出席已死要角嘅葬禮,當中一個「男孩」閃現,唔知粉絲認唔認到,佢就係《鐵甲奇俠3》當中,陪住「鐵甲奇俠」對抗驚慌症嘅小男童?




來源 source: http://hk.on.cc
鍾意就快D Share啦!
Related Posts Plugin for WordPress, Blogger...