林峯堅嬲唔探班 千語 BB澳門愁爆

6/5

唔好望得咁揚啦，峯峯豬睇住㗎！（設計對白）

周一（ 6日）千語 BB開始到澳門拍嘢，佢全程個樣勁灰，四處望，似乎好驚再俾人偷拍。乖啲，咪無事囉！

媽咪姐

林峯堅嬲唔探班　千語 BB澳門愁爆

媽咪姐成日同啲世姪女講，男女感情呢家嘢，就好似恆生指數一樣，瞬息萬變㗎！你一時「大意」，就好易出事。嗱，好似吳千語，趁林峯北上拍劇，同大班仔仔食飯唱 K劈酒，再上埋男人屋企斷到正。喺橫店拍劇捱到殘嘅峯峯豬，口話無嘢啫，其實堅嬲！去咗澳門同化妝師 Rick Chin拍 now節目《 Chin與千尋》嘅千語 BB，咪惟有千里傳情，電話「補倉」囉。

有幕後人同媽咪姐講：「出發去澳門前一個禮拜，千語已經好興奮咁同我哋講，話阿峯特登請假去澳門，睇佢跳 Bungee Jump喎！好寃氣㗎。」不過，俱往矣。一向 chok爆嘅林峯，依家條氣真係 chok住！臨時同劇組銷假，唔去澳門探女友。

19歲嘅千語 BB，有「富二代女殺手」之稱，梗知林峯係不能錯失嘅績優股，即刻「做嘢」！周一（ 6日）開始，一連三日喺澳門拍嘢都機不離手，猛㩒電話，用微信傳「 BB蜜語」俾峯峯豬。之但係，人哋態度明顯冷淡咗，唔似以前一 call即覆，令千語 BB成個人整天都謝曬，一改「公主」作風，喺電話喊曬口哀求：「我好驚呀，你過嚟澳門陪我一齊跳吖？」

不過，直至周三（ 8日）吳千語同 Rick Chin上到澳門旅遊塔拍攝，林峯都係……無影嘅！而呢位愁爆女友亦臨時決定唔玩 Bungee Jump。梗係啦！峯峯豬都唔嚟咯，仲使乜咁搏命引男友𠱁番。不如留番啲力，打包自己去橫店箍煲好過啦！千語 BB，呵。

新仔𥄫實唔放

吳千語被影到深夜送上門去雜誌編輯 Jimmy屋企，周二（ 7日）男方依然無避忌，狂𥄫澳門趕返港、行緊 show嘅千語 BB，同峯峯豬一樣咁癡纏喎。

8/5

原本大會通告話千語 BB會跳 Bungee Jump，但周三（ 8日）佢睇完其他遊客跳之後，忽然皺曬眉話好驚，淨係肯同 Rick Chin玩 Skywalk。 Well，驚唔驚得過俾之前講七次「好愛 BB」嘅峯峯豬撇先？

千語 BB孭住峯峯豬送嘅今季最新 Boy Chanel（約$31,000），喺氹仔官也街同工作人員傾拍攝細節，唧都唔笑。係啦，「人肉買袋機」發脾氣，點算呢？

7/5

夜蒲報道出街後，吳千語即時擺一棚人食飯相上微博，仲話：「純粹食飯！」林峯信唔信呢？媽咪姐淨係知千語 BB全程愁爆望電話、狂打字，勤力過小學生罰抄囉。

BB，你曳曳曳曳曳曳曳呀！（設計對白）

樂在其中

「峯語戀」現暗湧，同林峯情同母子嘅無綫製作資源部總監樂易玲就應該最 happy！事關峯峯豬同千語 BB拍拖之後，一個月豪請女友去三次旅行，推劇推 event，激到樂小姐死死吓。幕後人員話：「之前樂小姐約咗阿峯食飯，叫佢唔好顧住拍拖，搏多幾年先諗結婚生仔都未遲。點知阿峯聽唔入耳，反而愈嚟愈高調！近排呢『兩母子』都冇同枱食過飯嘞。」據知樂易玲仲諗住召林峯前緋聞女友陳嘉桓入 TVB，幫佢哋再塑造熒幕情侶形象，在公在私，挑戰千語 BB嘅正印地位！咦，咁媽咪姐要買定爆穀咯。

兩年前，有指林峯同陳嘉桓拍 MV撻着。望真啲，嘉桓 BB同千語 BB一樣係身高腿長 sweet爆型，再撻？話咁易。

其他影片

• 林峯堅嬲唔探班　千語 BB澳門愁爆

鍾意就快D Share啦！

下一篇 》