《星夢傳奇》再彈「翻版克勤」葉暐

媽咪姐

《星夢傳奇》再彈「翻版克勤」葉暐

周日（ 9月 22日），歌唱比賽節目《星夢傳奇》播出第 9集。繼上集鄭俊弘被羅鈞滿砌低，今集又俾鬼妹仔陳明恩攞咗冠軍。雖然戰況好激烈，但來來去去佢哋三個鬥餐死。

無計啦，呢兩集新加入嘅參賽者歌藝麻麻，好似上集嘅楊思琦同李豪，今集嘅何傲芝全部都一出即 out，唯獨以〈癡心的廢墟〉出賽嘅葉暐有得留低。

唔講唔知，原來葉暐曾經參加過 1996年全球華人新秀比賽，可惜入唔到圍。 1999年再參加藝訓班，同馬國明同期。不過佢條路比馬明 BB迂迴好多，雖然係咁，佢依然好阿 Q咁話：「之前都諗過轉行，記得 2000年拍《創世紀》嗰陣，有場戲得幾句對白我都 NG咗十幾次，點解人哋做到我做唔到呢？我諗只係時間問題啫。於是就咁一直做落去，依家有少少成績，都 OK呀！」

其實做呢行最緊要鬥長命， EQ高實捱到落去。雖然今次葉暐最終 5強止步，但假以時日相信會好似馬明 BB咁更上一層樓。媽咪姐撐你㗎，加油呀！

葉暐喺第 9集首次出場，以〈癡心的廢墟〉一曲，贏得評判張敬軒同陳潔靈讚賞。前者仲讚佢識得控制自己把聲，只係唔夠個人特色。

網民激讚

網民對葉暐嘅表現好 surprise，紛紛喺論壇大讚佢唱歌好聽。

葉暐同馬國明都係第 15期藝員訓練班學員，兩人捱足 14年都冇放棄，確係唔話得。

睇時裝劇，可能未必認得出葉暐。但相信大家都會記得佢喺《十兄弟》（左圖）同《大冬瓜》（上圖）嘅大口九同烏鴉嘴造型。

喺新劇《巨輪》，葉暐飾演差人，係李璧琦下屬。兩人先後參加過《星夢傳奇》，葉更大讚對方 nice，毫不吝嗇分享唱歌心得俾自己。

鍾意就快D Share啦！

下一篇 》