上週三（ 9日），梅艷芳生前位於壽山村道的故居供人參觀憑弔，除一切家居擺設服飾，以至獎座等外，阿梅的主人房亦曝光，房中的浴室內，裝設按摩浴缸，可見平時做得咁辛苦嘅阿梅，返到屋企亦要鬆一鬆。
真面目
似是故人：塵封 10年假髮定型水 阿梅故居浴室曝光
永遠天後梅艷芳， 2003年因子宮頸癌病逝。今年逝世 10周年，壽山村道故居丟空亦差不多 10年，上月以 1.47億高價賣出，上週六（ 12日）屋內超過 405項遺物正式拍賣，總值約 531萬港元，一代天後遺物四散，耗用阿梅遺產打輸官司的梅媽覃美金極之心痛。
上週三（ 9日），阿梅故居更開放給有心人探訪悼念。阿梅故居除各大獎項、歌衫及舊照值得懷念外，本刊亦發現在阿梅的浴室中，大部分物品依然原封不動，當中除了亦舒的小說外，更有數支阿梅患癌病化療期間，用來固定假髮的定型水仍放在原位，天後臨終前亦務求以最佳狀態示人，力求完美的精神令人尊敬。
一代巨星梅艷芳 03年因患上子宮頸癌逝世，其位於香港壽山村道的恆安閣故居亦一直丟空，至上月終以 1.47億元售出，亦因故居要交吉，因此管理阿梅遺產的滙豐信託基金要將屋內約 405項遺物拍賣，然後將拍賣得來的款項撥入梅艷芳基金中。
放滿愛情小說
在上週三（ 9日）開始，丟空近 10年，阿梅位於壽山村道的故居，亦開放給公眾憑弔，屋內除她生前所有的舞台歌衫、獎項外，更可參觀阿梅的睡房，而本刊亦在阿梅的主人房浴室內，發現阿梅生前原來是亦舒及梁鳳儀迷，在浴缸旁放置不少愛情小說；而浴室的儲物架上亦放上護膚品，當年阿梅臨終前因接受化療導致脫髮，要戴上假髮見人，如今架上放置的假髮定型水依然原封不動，封塵 10年更覺欷歔！
至上週六（ 12日），阿梅的遺物，包括獎座、相簿、衣服飾物、家具，甚至閨房大床等 405項約千件遺物公開拍賣，結果成功賣出 401項，成交率達 99.5%，結算總值約 531萬。
故居物品被拍賣，等如令遺物四散，阿梅契姐向華強太太陳嵐先轟：「咁樣好唔尊重阿梅，好心痛，如果一早知道阿梅遺物咁樣賤價拍賣，我一定會反對。」而阿梅生前好友，如曾志偉及張學友等，更託歌迷，以 101萬全數投得阿梅生前所得的 67個獎座，希望買回阿梅的尊嚴。
梅媽：掠水就唔好搞
講到最激心，一定係一直食阿梅遺產養埋大仔、已 90歲高齡的梅媽覃美金，於拍賣前一天，梅媽由阿梅阿哥梅啟明陪同下，召開記招，更當場哭訴：「將死者遺物咁判，仲有冇人性？將呢啲物品好似一嚿一嚿豬肉咁分，我唔甘心，如果分給慈善機構就冇問題。」
事後，本刊記者再追問梅媽有關曾志偉出手保住阿梅遺物一事，梅媽即發火：「又唔係畀我嘅，有乜咁開心？」問到志偉將於年尾搞一個紀念梅艷芳演唱會一事，梅媽更加火滾：「自從阿梅死咗之後，佢（曾志偉）都冇搵過我，打親畀佢都話唔得閒。如果佢搞騷，希望真係為慈善，掠水就唔好搞啦！」
遺物四散
阿梅的壽山村道故居已於上月賣出，由於要交吉關係，屋內每件物件在滙豐信託基金安排下公開拍賣，甚至私人物品，每項底價由 500元起低價出售兼四散，令不少歌迷心痛。
志偉出頭搞紀念騷
今年是梅艷芳逝世 10周年，除 TVB將推出梅艷芳紀念特輯作悼念，搵大班後輩如林欣彤、 Gin Lee等向梅姐致敬外，阿梅生前好友曾志偉亦帶頭，吹雞於 12月為阿梅搞慈善紀念演唱會，但現時日期、嘉賓人選及場地仍未定。
|
鍾意就快D Share啦！
|
|
|