22/10謝爆湊返學
上周二（ 10月 22日）朝早九點，克勤全家出動湊大仔 Ryan（右）返學。記者發現克勤當日狀態一般，眼袋頗深，冇厘精神，難怪要老婆盧淑儀做司機。
娛樂喧
供半億豪宅 月使 5萬學費 李克勤狂開騷跑數
做了老竇的李克勤，近年明顯家庭為重，為了見證兩位金叵羅的成長歷程，情願推 job減工作量，絕對嫌錢腥。
為了培育兩個仔成為資優兒童，克勤為他們報讀不同種類的學前班，終於穀到 6歲的大仔李立仁成功考入港島區名牌學府。而住在西貢多年的克勤，去年亦以半億買壽臣山道豪宅，方便大仔返學。
孭住幾千萬樓債，每月又要使近 5萬教育費，克勤今年突然發力𢱑銀，再掛「左麟右李」牌頭開騷，成功擸二千萬減家庭負擔。
近年樂於湊仔生活的李克勤，不時被拍得親自揸車送大仔李立仁（ Ryan）返學，十足廿四孝老竇。在娛樂圈拼搏接近 30年的他，一早賺到盤滿缽滿，絕對有足夠條件放慢事業腳步。不過他早前卻宣布再次與譚詠麟合體開《左麟右李演唱會》，除了在紅館開十場外，明年全年更舉辦世界巡迴。開騷開足一年，變相令克勤冇曬時間湊仔。
六十萬供樓
知情人士說：「克勤自從有咗家庭之後，凡事都以兩個仔為先，如果啲工作需要出埠或者太嘥時間的話，克勤寧願少接為妙。所以佢今次肯放咁多期嚟搞演唱會，大家都好驚訝，因為搞一個騷，又要開會、試造型、排舞等大把事前準備工夫。佢返得屋企嚟，兩個仔都瞓曬啦！」
克勤情願犧牲湊仔的快樂時光，也要花心神賣唱一年，無非因為家庭開支愈來愈大。大仔 Ryan去年獲位於黃竹坑的「加拿大國際學校」成功取錄，為了方便湊仔返學放學，住了十年西貢的克勤，去年以 5千 4百萬購入壽臣山道曉穎花園一個複式單位。知情人士說：「大拿拿半億，有足夠流動資金都唔會一炮過拎出嚟啦，克勤依家每個月供樓都要成六十萬。既然『左麟右李』仲咁受歡迎，克勤當然搵得就搵，搞埋世界巡迴足足賺二千萬歌酬，幫補下供樓。」
穀兩仔成才
除了每月六十萬供樓，兩個仔的驚人教育費，亦成為克勤搵錢動力。大仔 Ryan考入小一前，盧淑儀已為他報讀兩個由外籍教師主理 pre-school課程，狂穀其英語聽寫能力。至於今年 3歲的細仔李力司（ Rex），雖然已有十足把握，可以跟隨哥哥入讀加拿大國際學校，但盧淑儀亦一早安排他到銅鑼灣上 playgroup。單是兩子的教育費每月已接近 5萬，還未計其他使費，難怪克勤唔搏殺唔得。
上周二（ 10月 22日），本刊便拍得克勤和盧淑儀兩公婆湊住細仔 Rex，親自送 Ryan返學。記者發現當日難得不用籌備演唱會的克勤，成個人落曬形，明顯為工作和家庭心力交瘁。
周一（ 10月 28日），記者搵過克勤經理人 Ronnie了解，他說：「克勤成個 2014年都同阿倫做世界巡迴，走勻美加、星馬同大陸，真係好忙。（但佢仲要兼顧湊仔喎？）係呀，佢一向都係好爸爸。雖然辛苦啲，但佢自己覺得 OK咪得囉！」而克勤亦曾說：「家庭負擔好重呀，供樓要供到 100歲呀！」看來克勤要唱多幾百場騷先搞得掂。
名人聚居熱點
李克勤新竇位於港島南區壽臣山道西曉穎花園，樓齡雖然有 24年，但由於去年進行外牆翻新，屋苑外觀煥然一新。而克勤所買的單位三房間隔，建築面積約二千六百平方呎，另設千三呎天台及一個車位。今年中，屋苑附近地域擬改劃為住宅地，克勤則以造成環境汙染及滋擾居民為由，透過公司名義反對。
其實環境幽靜的壽臣山，一向屬不少名人及高官的心水居住地段，李嘉誠、田北辰、夏佳理家族亦聚居於此。
|
鍾意就快D Share啦！
|
|
|