今年 47歲的朱麗倩，現時已經懷孕 15周，開始見肚，因此劉華勒令她減少外出，盡量在家中安胎。《 Face》圖片
打頭陣
懷孕 15周 恐胎兒唔足磅 朱麗倩秘睇養胎聖手
劉德華恨仔恨到發燒， 8月尾他與歌迷會搞生日會時，亦講到出口「努力（造人）」，其實他再做老竇的消息已傳遍歌迷會。據知 9月尾，有位高僧更送了一道平安符賀他 52歲生日，保祐朱麗倩大小平安。
儘管劉華矢口否認，不過本刊得悉朱麗倩由未有喜到懷孕，都幫襯甚多明星客仔的中醫馬菁岐，年屆 90的馬醫師精通針灸和「指穴」。據知， 47歲高齡的朱麗倩，一心為劉華追仔，加上第一胎生女時， BB僅得 5.4磅，屬輕磅 B女，為怕第二胎唔足磅，她 keep住睇馬醫師調理身體，務求今胎生個肥 B。
本刊求證馬醫師，她承認朱麗倩曾求診，更謂：「佢都係平常人啫！」其實劉華今年於「華仔天地」官網中就親撰千字「家書」，分享做老竇的喜悅心情，更親述太太生囡囡時肚痛作動入院驚險過程，難怪他今次咁緊張啦！
去年 5月，劉華初嚐做老竇滋味，老婆朱麗倩為他誕下女兒劉向蕙（ Hanna）。朱麗倩懷第一胎時，恨做老竇的劉華曾喜孜孜向友人說︰「仔女都冇所謂，不過我鍾意女多啲，女黐老竇多啲嘛！家姐照顧細佬比較好……」講到明先生女後追仔。
指按穴位受孕
女兒出生後，劉華做老竇做上癮，兩公婆亦有共識急急追多件，湊個好字。大半年前，劉華獲一位圈中朋友介紹睇馬菁岐，兩夫婦聽從馬醫師所講，定時定候用手指按額頭、手腕、心口，並替他們開出藥方。知情者話︰「朋友第一次帶同劉華夫婦上去時，馬醫師仲同佢哋講︰『冇話一定得，放鬆啲，順其自然受孕機會都會大啲。』佢哋睇咗兩個幾月，終於搞掂。依家都 keep住睇，因為朱麗倩第一胎早產， BB屬輕磅，加上朱麗倩的體質並非長胎那種，所以搵馬醫師寫安胎藥方，希望今次佗得穩啲長胎啲。」
9月 25日，圓潤的朱麗倩被周刊拍得到中建大廈搵蘇偉基做產檢。不過，一向低調的劉華非常口密，更否認說：「多謝關心，未有 BB！」朱麗倩被傳媒曝光後，開始深居簡出，據知十月中，劉華到廣州開三場「 ALways世界巡迴演唱會 2013」，朱麗倩亦有同行。不過朱麗倩為免成為傳媒追訪對象，一直躲在後台，而且身旁亦有三名保鑣貼身護駕。十月尾劉華再到北京開巡迴，此行要坐四個鐘飛機，朱麗倩為免動胎氣，選擇留在港安胎。
心情靚爆回應
周日（ 27日），早上 7時許，心情靚爆的劉華到赤鱲角機場準備飛北京，本刊記者上前恭喜他再為人父，他心情靚爆說：「我講咗唔係㗎喇！ sorry……（但有傳你太太去睇馬醫師？）唔講啦！ sorry……」本刊記者趁劉華入閘前再度恭喜他，他笑笑口說：「係都要恭喜我嘅……」在旁的粉絲插嘴說：「恭喜咗就有㗎喇！」
本刊亦到訪馬菁岐醫師位於銅鑼灣的商住式醫館，記者未表明身份時，曾試探馬醫師的口風，問到朱麗倩係咪都嚟睇？她說：「小兒科啦！明星都係人一個啫！」
之後記者向她表明身份，再深入問她有關朱麗倩求診一事，她點到即止回應，十分避忌。
認朱麗倩求診
忽：聽到劉德華個老婆搵你睇？
馬：唓……咁嘅（明星）太太多啦……
忽：我哋知道朱麗倩都嚟呢度睇？
馬：佢係平常人，人一個之嘛！
忽：咁佢上過嚟睇幾多次就成功有咗？
馬：好難計得俾你聽，個個都唔同。
忽：有冇睇咗超過十次？
馬：我第日記住然後話你聽。
忽：見到好多名人明星嚟睇，係咪其他藝人介紹朱麗倩嚟睇？
馬：咁一定有人介紹。
忽：所以想生仔咪搵你囉。
馬：我唔係一定㗎，唔係包醫（生仔）㗎！
其實在「華仔天地」官網中，劉華亦曾親撰二千字「家書」向歌迷透露初為人父的心情。內容包括老婆突然作動，令他措手不及，他陪住老婆入產房，但過程驚險萬分。
做足保密工夫
生女不易，所以自愛女向蕙出生後，劉華除了工作外，九成的時間都用來照顧女兒。今年初他到英國工作時，女兒隔着電話用國語叫爸爸，劉華感動到眼泛淚光。
劉華為保護妻女免被追訪，更在加多利山屋外加置了閉路電視，並長期以每月 14萬租住私隱度甚高的太平洋酒店的酒店式住宅聽濤閣，作另一掩護居所，還有兩部七人車接載朱麗倩，保密工夫做到足。
雖然劉華保密工夫做足，但早前歌迷會為他慶祝生日時，起哄叫他快啲生仔，劉華直認：「我尋晚努力咗！」歌迷立即𠵱嘩鬼叫，劉華笑說：「講呢啲你哋就咁開心，你哋專諗埋啲邪嘢。」不過對粉絲祝佢追仔成功，他照單全收，「所有祝福收曬。」
星級中醫
90歲的女中醫馬菁岐，行醫超過四十年，她年輕時曾遇上一名醫術高明的尼姑，學得一套針灸療法。之後她當過教書、督學師，更邊教書邊學醫，曾到中國國醫學院學醫，跟四大名醫朱鶴皋、丁仲英、丁濟萬和陳信齋學醫術，更在美國考獲針灸師執照及東方醫學博士學位，是香港首批註冊中醫師。
她獨創「指穴」代替針灸的獨門療法，發哥、嘉玲、王菲，甚至前美國總統列根同老布殊都找她醫病。而梁朝偉和黃栢高更是她的學生，學習「指穴」療法。
穴位按壓與針灸助懷孕
馬醫師按穴位易懷孕，原理是因為女性下腹及手腳冰凍代表子宮寒涼、氣血不足，便難以成孕，所以用穴位按壓或針灸刺激某些穴位通氣血，令子宮運作回復正常。
據中醫師蔡宇國說運用穴位按壓法或針灸，刺激女性的三陰交（即內足踝對上約三吋）、關元穴（肚臍下約三吋）、合穀穴（人手虎口位置），可令女性氣血通暢。他說：「氣血通暢的話子宮便夠溫暖，會更容易成孕，至於用穴位按壓法或針灸，則各師各法。」
蔡醫師指用穴位按壓再配合中醫治療，功效會更大，不過成功懷孕後一般不贊成再用針灸或穴位按壓，因為擔心血行太勁會沖到胎氣，不利胎兒，所以有孕後還是用中藥安胎比較安全。
家書爆老婆待產
劉華向 Fans撰寫的「家書」超過二千字，總共有五張原稿紙。記者發現「家書」內容，大部分圍繞朱麗倩誕下囡囡劉向蕙經過，以下是部分節錄。
盼望小生命的忐忑
盼盼著，小生命的來臨，忽然？是心焦？是過敏？時間好像變慢了！一分一秒都彷彿很漫長，說是有患得患失的感覺!!
早上對著她（朱麗倩）說平安，晚上對著她肚裡的她說要健康，日復日，那天快來臨了。
心痛老婆作動
某天晚上，她在我髮邊說：「她動啊！動得有點厲害！」她顯得有點痛，其實我也痛!!胡亂的安慰後，跟醫生商量，先進院中待產會安全一點，我聽他的，進行。
不到一會，和她，還有早就準備好的用品也已經在途中了！途中說得最繁的一句話：「女兒呀！妳別急！」
血淋淋的喜悅
夢中的邊緣，微微聽到敲門的聲音，一跌一碰的急着開門，怕只怕吵醒她和她!!
門開了，護士說了，是時候了。
不到半個小時，一家人已經到了產房。
血淋淋，我看到她了，趕緊把臉靠近她說：爸爸在這兒！抱着她，靠近另一個她說：媽媽躺在那兒！
她哭了！她笑了！恭喜充斥了產房，在我咀中又除了謝謝就沒別的。
生日會爆湊女心得
記者在華仔天地官方網站發現，今年 8月劉華與歌迷慶祝生日會時，找來黎芷珊做主持，加插現場版《最佳男主角》環節。當時劉華破例大談老婆及女兒，更自爆最怕係老婆，仲話每日都要唱歌𠱁囡囡。
民間特首
劉華近日不但因為再做老竇成為傳媒焦點，就連他撐「發牌」言論，亦被唔少網友轉載，有人更推舉劉華當特首。
堪輿學家：生仔有風險
堪輿學家譚雲龍指，朱麗倩一生生仔都好有風險，他說：「今年佢行癸巳年，梟神奪食，有流產、小產數，個胎容易唔穩，佢要多做善舉，仲要好好保胎，所以有咗都不宜同人講， BB有機會明年出世。過咗明年，打後就冇生育數據。
而劉德華亦一樣，要好好把握明年嘅機會，佢一生最多可以有一仔一女，佢今年有胎動之數，出年生仔機會好大。」
|
鍾意就快D Share啦！
|
|
|