又見到你？
（真實對白）
娛樂喧
跑兩夜場執 50萬 黎耀祥遭大胸女狙擊
由雙視帝黎耀祥及陳豪鬥戲的台慶劇《法外風雲》，被指不夠專業兼劇情浮誇，大結局更似足鬧劇，劇集無聲無息落幕。
今年黎耀祥劇集套套出師不利，但三屆視帝美譽令他在內地爆紅。近幾年他每星期都會有一至兩次到內地登台、剪綵或出席活動，每次企硬 30萬人仔酬勞，年賺近二千萬，比在無綫拍劇足足多出十倍。
上周三（ 20日），黎耀祥拍完外景即上中山連走兩場登台，快食執 50萬。場內更有唔少大胸女自動拋波餅贈興，不過踩足 48小時冇瞓過的黎耀祥，肯定無福消受。
上周三（ 20日），黎耀祥在 TVB拍完《男大當婚》外景，嗱嗱臨與老婆坐中港保母車，坐足三粒鐘車程直踩中山小欖酒吧演出。
一如過往，他所到之處必引起哄動，現場數名大胸女及多名大漢爭著與他合照，黎亦無托手踭。可是，慘被逼埋牆角的祥嫂見情況愈來愈混亂，忍唔住發火：「夠嘞，唔影喇，要出場！」
踩足 48小時
當晚，黎耀祥第一場騷約晚上十二時開始，他站在唔夠半米闊的台上獻唱四首飲歌〈新鴛鴦蝴蝶夢〉、〈花心〉、〈舊歡如夢〉及飲歌〈紅蝴蝶〉。其間一名穿開胸衫露半球的 pink lady，不停夾胸追住黎耀祥握手。當黎經過面前，她更扯實對方雙腳，令黎險些跌倒。好在視帝祥臨危不亂，還打趣向對方說：「嘩！乜行到邊都見到你？」
唱完一場，黎耀祥立即上車， 45分鐘車程轉到石岐酒吧趕第二場，觀眾同樣熱烈瘋狂。由於一連兩場酒吧均屬同一老闆，黎收特惠價 50萬跑兩場（原本 30萬一場）。黎耀祥唱完已經是深夜兩點，返到香港，沖個涼換件衫，早上六時又要返 TVB拍外景，踩足 48小時冇得瞓。
為仔奔波
事實上，黎耀祥 08年憑《巾幗梟雄》柴九爆紅後，多年來不少內地電視台都有搵他拍劇。面對一套收近五百萬的豐厚酬勞，卻不為所動，他更揚言不會效法鄭嘉穎及林峯北上拍大陸劇，「我個仔十六歲，係成長關鍵期，唔想幾個月見唔到佢，依家接啲 Job，一、兩日就可以返屋企同家人見面。我人生冇幾多個十年，有得賺就賺啦，寧願辛苦啲，都想儲多啲錢留俾個仔。希望將來阿仔同自己生活可以好啲吖嘛！」老竇賺錢仔享福，過多十年他已六十歲，難怪要積穀防饑啦！
波鞋迷
「祥仔」黎正橋唔覺唔覺已經 16歲，鍾意打籃球、影相、踩滑板同做 gym，十分好動，又有儲波鞋習慣，喜歡買限量版波鞋。嗜好多多，難怪黎耀祥要為仔仔儲定多啲錢。
|
鍾意就快D Share啦！
|
|
|
