朱茵愁爆
躁底黃貫中與朱茵拍拖到結婚這些年來，經常四處辣火頭。如今連 80歲老父都遭他指責是「色老頭」，更揚言要手刃他。據知，與老爺關係不錯的朱茵頓成磨心。
滾熱辣
揭八旬老父中風 阿 Paul揚言殺父 磨心朱茵閉門冇眼睇
49歲黃貫中（ Paul）向來躁底，先後與 Beyond隊友黃家強和記者駁火鬧交，估唔到今次矛頭直指 80多歲老父。上周五（ 22日），黃於微博忽然上載一篇「殺父宣言」，警告老父若再打母親和老婆朱茵，便會手刃對方。
「殺父論」一出即被瘋傳，可是，本刊從多個途徑得知，黃貫中老父於兩年前已中風不良於行，長居大埔村屋深居簡出，與住在九龍城的朱茵相距十萬九千里，加上黃父、母早在黃貫中十歲那年已仳離，據知黃母已多年沒有與黃父相見，似乎老父「鬱手」之說仍存有疑點。向來和老爺關係不俗的朱茵，曾多番勸黃貫中做事不要魯莽，但有人卻火遮眼一意孤行，令朱茵慘變磨心，近日她一直自閉家中避傳媒。
自從 Beyond解散後，黃貫中一直以搖滾教父自居，但越老越好火的他，經常在微博發炮鬧人。上周五「手刃老竇」留言一出，即嚇窒網民，更引來大批記者在他和朱茵的九龍城寓所守候，可是連日來卻未見二人蹤影。
好友指亂諗
今次事件引來各方揣測，近日有報道指黃父因為上門強行拖孫落街，遭朱茵反對，盛怒下鬱手推撞新抱。本刊卻從黃貫中身邊好友得知，黃父早於兩年前已中風，現長居大埔林村寓所，出入要坐輪椅，甚至連起居飲食都要靠菲傭照顧。知情人透露：「我哋睇到段嘢都嚇一跳，佢（指 Paul）係咪將啲時空撈到亂曬龍。我哋識佢廿幾年，上佢屋企從冇見過佢阿媽。佢老竇前兩年中風，兩隻腳根本行唔鬱，行出行入都要人扶，最近仲要坐輪椅，連攞水杯都要靠人，點打人？」黃貫中微博出街後翌日，本刊訪問其現任樂隊成員 Jimmy，他指黃父近年患上老人病，不良於行。「佢爸爸好大年紀啦，都 80幾歲，又有老人病，話佢打朱茵，我覺得有啲奇怪！」
事實上，黃父、黃母除了早年離婚外，黃貫中和老父感情其實相當不錯。據了解，年輕時做玩具 sales的黃父，自離婚後，獨力照顧三個兒子，因此黃貫中對老父十分尊敬。記者翻查黃貫中在 89年推出的自傳《心內心外》，當時黃貫中大讚老父：「十歲那年，父母仳離，父親身兼母職，要出外工作，回家又要打理家務……我的心其實很尊敬他。」
老父朱茵分開住
其實，去年初朱茵發現有喜，原本和黃貫中住在大埔村屋的她，由於要經常到醫院做產檢，因此提議搬回九龍城居住。相反一直住在九龍城的老父，卻搬到大埔村屋居住，由黃貫中細佬黃貫其和菲傭照顧。一直與老爺關係不俗的朱茵，自生完女兒「叉燒包」後，亦試過和黃貫中帶埋女兒到大埔探望他。知情人透露：「其實阿茵生完後，自己忙住湊女，少咗入大埔探老爺，但佢哋關係唔差。有時阿茵都會託阿其（黃貫其）買啲補品俾老爺，所以唔明點解阿 Paul會咁寫！」據知今次阿 Paul忽然在微博寫「殺父論」，朱茵事前亦不知情。朱茵曾向好友表示，已有多個月冇見老爺，坦言擔心阿 Paul的精神狀態。
連日不見蹤影
連日來，記者分別到九龍城和大埔等候黃貫中、朱茵和黃父，雖然見到他們寓所在晚上開了燈，但一直未見各人蹤影。只試過在大埔黃父寓所看見其菲傭拖著黃貫中兩隻愛犬散步。記者亦曾問過村民，有人表示黃父這幾天不會外出，著記者不用等。
對於黃貫中言論，日前本刊致電前 Beyond成員葉世榮，他坦言對事件感到震驚，更不相信黃父會做出此行為。「係咪宣傳嚟咋？我最後見佢（阿 Paul）係七月喺自己個騷度，佢做嘉賓，當時佢好正常冇乜嘢，有講有笑。不過佢寫呢啲嘢出嚟，係人都驚咗佢，亦怕佢出事，大家俾啲空間佢啦。（你覺得黃父點？）我以前上過佢（黃貫中）屋企食飯，佢老竇好好人喎！（ Paul父、母一早離婚？）係呀，我諗阿 Paul係講細個俾老竇打啫，唔係講依家。」至於曾與黃貫中鬧翻的黃家強，在電話中表示：「希望阿 Paul有咩事慢慢講，要冷靜，如果唔冷靜，好多嘢都解決唔到！」至於朱茵和阿 Paul，本刊多次致電給二人，亦曾走訪過其九龍城寓所，經看更通傳記者採訪要求，但至截稿前仍未有回覆。
掟家強出街
黃貫中火爆性格街知巷聞，唔少圈中人都曾與他有牙齒印，近年，他與 Beyond成員黃家強更由好兄弟變仇家。日前，記者到過阿 Paul位於土瓜灣的 band房，發現 band房外其中一個垃圾籮內，竟有大疊 Beyond舊照，除了他口中不停說最尊敬的家駒舊相外，當中以家強單人照最多。對此家強說：「我冇乜所謂喎，冇用咪掉囉，我冇乜 hard feeling喎！」至於世榮則說：「係咪諗住去堆填呀？哈哈，可能佢遲啲會執番呢！」
|
鍾意就快D Share啦！
|
|
|
