周日（ 24日），鄭融出席商場活動。對於演唱會要網上穀飛一事，她口窒窒說：「我自己就知道……等我諗下先，喺 Groupon有得賣啦，喺卡拉 OK都有得賣啦！」
娛樂喧
個唱飛去得三成 鄭融半價促銷救亡
今年 29歲的鄭融，在樂壇打滾十年。憑性感形象，加上 hit歌〈紅綠燈〉，曾人氣高企。可惜她偏偏唔爭氣，多次被唱片公司雪藏，加上身形持續脹爆，星途停滯不前。
事業多次陷入穀底的鄭融，今年終於修心養性，除積極減腩外， 12月舉辦兩場售票演唱會。可惜個唱銷情慘淡，賣飛賣足兩個多月只去得三成，近日更要靠團購網半價促銷，認真慘情。
鄭融（ Stephanie）將於下月 6及 7日於九龍灣 Star Hall舉辦兩場個唱，回顧出道十年以來的音樂歷程。為求盡善盡美，她大打人情牌，邀請好姊妹薛凱琪及老死周柏豪做嘉賓，並預告屆時將以最性感的形象勁歌熱舞。
團購網放售
一如所料，演唱會的銷情不理想。 Neway為求盡快散飛，不惜於團購網割價促銷。知情人士說：「演唱會 9月已經開始賣飛，但到 11月中都係賣得三成，公司惟有放上團購網，賣得幾多得幾多。」記者上周亦親赴通利琴行詢問詳情，結果發現依然有大把飛賣，可想而知銷情有幾慘淡。
經理人打圓場
周日（ 24日），鄭融出席活動，對於個唱門票要靠團購網半價促銷，她顯得不知所措，答得吞吞吐吐：「大家一齊……大家一齊……其實因為新老闆……」身旁的經理人就搶答:「其實公司一路都 plan咗會開演唱會，公司都想用好多唔同嘅渠道啦，都想好多人知道有呢個演唱會。佢嗰度（團購網站）只係好少嘅數量。」但觀乎團購網賣飛不設上限，加上截至 26日（周二），記者發現經團購網已賣出 366張門劵（佔全場座位約兩成），都唔屬於少量喎！
昨日種的因
作為一名歌星，形象最重要。星途的起跌，往往與形象密不可分。可惜鄭融頻頻瀨嘢，自毀形象前途。
賣飛大不同
踏入年尾，唔少歌手輪住開騷，誓要標尾會吸金。但由於混戰情況激烈，分散觀眾，搞到唔少演唱會售票情況普通。
黎瑞恩六折衝刺
育有一子一女的小恩子，特地為慈善出山，本周五、六於會展舉行演唱會，以慈善作招徠。由於小恩子已闊別 11年，新一代後生仔女不熟悉她的歌，只靠忠實粉絲撐場，故仍需靠 Groupon作最後衝刺。
方大同三場唔爆
出道八年的方大同，一直以騷靈曲風迷倒不少少女。不過近年他專注台灣發展，明顯忽略香港市場，搞到本月 30至下月 2日三場紅館騷，開賣以來仍未爆滿，網上更出現有炒家睇錯市而蝕賣的情況。
左麟右李全院滿座
觀眾緣佳的譚詠麟和李克勤合體開騷，真係左鄰右里都嚟撲飛，就算加到 13場，依然供不應求。唔想喊濕幾個枕頭的話，惟有下回請早。
|
鍾意就快D Share啦！
|
|
|
