尷尬上錯車
其間她不慎上錯車，之後惟有再落番車，沿途一臉尷尬望住鏡頭。
滾熱辣
陳豪媽親配中藥 陳茵媺坐月服廿八方
陳豪上周三（ 4日）終於做人老竇，太太陳茵媺為他誕下重 6磅 11安士的豪仔 Aiden。由於陳茵媺今次選擇自然分娩，所以產後留院僅四天便可出院。上周六（ 7日），陳豪就急急安排太太和囝囝返回大埔比華利山寓所。
囝囝 Aiden心急見人，比預產期早個多星期出世，因此定居多倫多的陳茵媺父母，還未趕得切見乖孫，加上陳豪又不時搵奶粉錢，照顧陳茵媺兩母子的重任，就落在陳豪母親身上。
據知今年約 70歲的陳豪媽，是擁有 40年診症經驗的資深中醫。近日她更搬進比華利山，做埋陪月嗰份，除了照顧乖孫外，更親自調製廿八方（產婦坐月連續 28天服用藥方），幫新抱補身。陳茵媺有老公奶奶痛錫，相反輸家廖碧兒卻要落泊北上搵食，認真慘情。
初為人父人母的陳豪及陳茵媺，因為缺乏經驗，所以陳豪一早已安排做中醫的媽咪為老婆補身及湊 B。事實上，兩夫婦出院時亦因為緊張兮兮而連場蝦碌，所以有經驗老到的陳豪媽在旁照顧老婆，陳豪才可放心搵奶粉錢。上周六（ 7日），陳豪事先張揚，會在醫院大堂接受訪問，一心打算調虎離山，引開記者注意，讓陳茵媺兩母子從醫院後門離開。
粗碌茵媺上錯車
其實事發前，本刊記者早已潛入位於醫院二樓的產科，目擊陳豪和經理人嘉莉在二樓大堂緊張講電話，似在部署如何偷運兩母子。未幾，陳茵媺、一名抱實 Aiden的女子和陳豪媽，從 210號房離開，走到後門搭𨋢。與此同時，神情緊張的陳豪亦行去正門搭𨋢，準備分頭行事。
陳茵媺在陳豪媽陪同下隨後步出，不過途中因慌忙而上錯車，雖然過程甩轆，仍保持笑容。陳茵媺刻意身穿鬥篷遮身，但記者發現她下圍和雙腿明顯粗壯了不少。而一心諗住可以轉移視線的陳豪，得悉詭計失敗，只好匆匆完成訪問，尷尬上車離開。
豪媽從醫多年
雖然明星愛用陪月員，不過陳豪有個中醫媽咪，老婆補身當然不用假手於人。據知陳豪媽一早自動請纓任陪月照顧新抱。
陳豪媽於 40多年前已經任職中醫，陳豪爸爸早年中風離世後，陳豪媽為了養家，經常來往內地和日本出診。她不但識開藥方，針灸亦有一手。「陳豪媽好想繼續做，覺得行醫始終幫到人。不過個仔事業有成，猛叫阿媽退休嘆世界，陳豪媽先唔再出診，但佢 keep住睇相關書籍增進知識。所以陳豪媽一知道 Aimee（陳茵媺）有咗，第一時間話負責陪月。」知情者說。
木瓜湯穀人奶
為了全天候照顧陳茵媺兩母子，現時陳豪媽已由將軍澳都會駅搬到大埔比華利山暫住。雖然有些大藥廠亦有現成的廿八方出售，但因為每個孕婦體質不同，對中藥甚有研究的陳豪媽就自製獨門廿八方俾新抱補身。
「廿八方要飲足廿八日，陳豪媽隔日會為新抱把脈，亦好細心問清楚佢大便嘅情況，從而調校中藥分量。加上 Amiee餵人奶，陳豪媽仲會留意埋孫仔嘅身體狀況㖭！」據知陳茵媺十分聽話，現時已開始服用廿八方，亦即產後連續廿八天服用不同中藥。
「廿八方分 5個階段，按住特定日子輪住煲嚟飲（詳見列表）。陳豪媽不但親自去揀靚藥材，仲煲埋俾新抱飲，係廿四孝奶奶。除咗中藥，陳豪媽還堅持每日朝早上街市買木瓜、魚等，煲木瓜魚湯，幫新抱穀奶。 Aimee選擇順產外，更話要餵人奶餵足九個月，依家有奶奶煲湯水俾佢穀奶，真係事半功倍，佢個傷口好得快，奶水亦好足， Aimee仲笑住話冇諗過 BB咁大食。」知情者說。
茵媺父母拒改名
剛剛出世的 Aiden隨即成為兩邊陳家新寵，據知陳茵媺父母日內亦由多倫多返港探望心肝椗。其實 Aiden的中文名字，陳豪原本屬意由陳茵媺父母改，但兩老卻對此事耍手擰頭。「佢哋仲話陳豪媽中文程度好，都係由親家改好啲喎！」
周二（ 10日），陳豪出席活動時說：「我應該自己改番中文名，唔會搵相士。我以前嗰代，用兩個字老土，但依家就型。不過好多名都俾人用曬冇得剩，依家諗緊適合佢人生嘅名，要特別啲！」
解構廿八方
坐月期間是產婦調補身體的最佳時期，因此富有中醫經驗的陳豪媽就特別為新抱調製獨門「廿八方」。自然分娩產婦可於生產第三或第四天開始飲用，而剖腹產婦則可於產後第八至十二天開始飲用，連續飲用廿八天，剛好對應產婦的坐月需要。
●分階段服用
總括來說，「廿八方」包含了五款中藥藥方，產婦需要分階段服用。
第一方 去惡露、袪風驅寒
服用日子：第 1至 7天
所需藥材：當歸頭 4錢、白背木耳 3錢、川芎 3錢、桃仁 3錢、炙甘草 2錢、炮薑 2錢
第二方 防風寒
服用日子：第 8、 10、 11、 13、 14、 16、 17天
所需藥材：西歸頭 5錢、川芎 3錢、白芍 4錢、紫蘇葉 3錢
第三方 補血潤腸
服用日子：第 9、 12、 15天
所需藥材：當歸身 4錢、熟地黃 5錢、光南杏 3錢、肉蓯蓉 4錢、川芎 3錢、雪蛤膏 2錢、陳皮 1錢
第四方 壯腰補腎
服用日子：第 18至 24天
所需藥材：當歸頭 5錢、玉竹 4錢、川斷 4錢、白芍 4錢、杜仲 5錢、杞子 5錢、川芎 3錢、陳皮 2錢
第五方 補充元氣
服用日子：第 25至 28天
所需藥材：巴戟 4錢、黨參 5錢、北芪 4錢、川斷 3錢、白芍 4錢、淮山 4錢、春砂仁 2錢、金狗脊 5錢
●按產婦體質調配
「廿八方」雖然有特定藥材，適合一般產後進補，但因為不同產婦有不同體質，未必位位啱用。資深中醫何顯亮說：「唔好以為個個產婦一定體虛，虛都分為陰虛同陽虛，例如白芍有補血作用，燥熱嘅產婦就唔適宜用咁多，建議搵番相熟中醫配方。」
●價錢參差
陳豪媽除為新抱挑選上等藥材，據知她亦買定人參、鹿尾羓、鹿茸同雪蛤膏，在坐月尾段加入藥方中，用來大補元氣。何醫師就說：「睇下每個人經濟能力，最好自己去中藥舖執上等藥材，進補程度都唔同。」
據了解，「廿八方」所有藥材由千幾蚊至三千蚊不等，若果加入其他如高麗蔘等名貴藥材，價格不設上限，有大藥廠更調配好藥包販賣，方便唔識煲藥的孕婦。
星級媽咪易修身
有指剛生完仔冇耐的陳茵媺，復出價高見 150萬。雖然銀碼吸引，但據知她產後將會停工半年至九個月，主力照顧囝囝之餘，並配合餵人奶運動修身。其實近年不少星級媽咪，修身進度良好，不單止可以大曬家庭樂，而且仲非常大方分享瘦身之道。
凱特
皇妃凱特誕下喬治不足三個月，便已經回復產前小蠻腰，早前她落場打排球時就露出平坦腹部。有指皇妃參考瘦身女皇出版的《產後完全健身指南》，照足指示多做腹部運動修腰。
|
鍾意就快D Share啦！
|
|
|
