在無綫捱了足足 10年的鄭俊弘，憑《星夢傳奇》彈起，可惜未真正大紅已得罪師傅。
娛樂喧
師徒反面 鄭俊弘拒簽英皇 辣㷫巫啟賢
唱〈心酸的情歌〉走紅，近年主打內地市場的巫啟賢，早前因擔任無綫《星夢傳奇》「魔鬼」評判而人氣回升，更「做好心」收埋鄭俊弘為徒。
近日巫以樂壇大哥姿態簽約英皇，本刊收到消息，原來英皇曾叫他出面斟埋徒弟一齊過檔，以收宣傳之效。當時無綫仍未成立唱片公司「星夢娛樂」，一直發歌星夢的鄭俊弘當然𦧲飯應。但隨後無綫突然開唱片公司，並以「一哥」身份利誘鄭，鄭順理成章選娘家而棄師傅。
有人臨門反口，令師徒關係生變。心酸的巫啟賢上周四（ 5日）出席英皇簽約記招時吞吞吐吐迴避問題：「係……無綫捧紅佢，咁佢……都應該飲水思源。」
在無綫撈了十年專做閒角的鄭俊弘，多得《星夢傳奇》捧起，師傅巫啟賢又無條件益佢做演唱會嘉賓，令他一唱成名。早前無綫更食住個勢，成立「星夢娛樂」唱片公司，力捧鄭俊弘做一哥。至於近年主力內地市場的巫啟賢，同樣憑《星夢傳奇》做評判而人氣反彈，近日英皇睇中他，邀簽約成為旗下歌手，有傳巫兩年穩袋五百萬。
唔做英皇二打六
兩師徒因《星夢》撈到風生水起，但據本刊得知，鄭俊弘在《星夢》奪冠前，英皇已有意羅致他做歌手，更斟巫啟賢與徒弟一齊簽約，以收宣傳之效。知情人透露：「巫老師之前帶阿 Fred（鄭俊弘）見吳雨（英皇 CEO），三個人傾得好開心。阿 Fred仲賣口乖話英皇係大公司，一定識捧新人。」
由於當時無綫還未決定成立唱片公司，只簽無綫經理人合約的鄭俊弘尚算「自由」，因此當日巫啟賢出面遊說徒弟時，一直恨唱歌恨到發燒的鄭俊弘，未傾酬勞已𦧲飯應答允。其後，無綫見「星夢幫」個勢唔錯，實行肥水不流別人田成立唱片公司。此時鄭即向師傅打退堂鼓，表明不打算簽英皇，令一直打師徒如意算盤的巫啟賢大失預算。
鄭俊弘背棄師傅，理由十分簡單，「英皇雖然係國際級，但阿 Fred話如果過到去，都係同吳浩康、洪卓立一個級數。佢話簽『星夢』就唔同， Herman(老闆何哲圖)講到明會最先幫佢出碟，捧佢做一哥，仲搵 Eric Kwok幫佢寫歌，聰明人都知應該揀邊度啦！其實 Herman都有搵過巫老師加盟㗎，不過佢嫌『星夢』幫唔到佢繼續發展大陸市場！」知情人說。
拒做處男碟監製
原本師徒檔十拿九穩，現在臨門撻 Q，最激氣的當然是巫啟賢，一來不滿有人下巴輕輕反口覆舌，二來在新老闆英皇面前感冇面。據知最近鄭俊弘搵師傅為他監製處男碟，但巫則以唔得閒一口拒絕！
師徒面左左
上周四（ 5日），英皇與巫啟賢舉行簽約記者會，有份出席的樂易玲及何哲圖亦帶埋鄭俊弘撐場。不過現場所見兩師徒鮮有交談。直至英皇眾星及高層上台與巫祝酒，司儀才叫鄭俊弘上台。當鄭欲與師傅傾偈，巫卻有意無意擰歪面，場面尷尬。此時吳雨更趁機公開撬鄭俊弘：「幾時先過嚟英皇呀？ Herman快啲放人！」令唔識應對的鄭有點手足無措。
記者現場向巫啟賢求證二人因過檔鬧翻一事，他吞吞吐吐迴避問題：「其實…… Herman都有搵過我，但我覺得英皇適合啲，佢哋可以幫到我大中華市場。咁我同阿 Fred……雖然唔同公司，但有機會都可以合作。佢始終係『星夢』捧出嚟，係無綫捧起佢，咁佢……都應該飲水思源嘅。」問到他拒絕為徒弟監製唱片一事時，他即拋了句「有時間先啦！」然後匆匆行開。雖然硬食師傅檸檬，但鄭俊弘回應時卻說：「真係希望師傅有時間可以幫我隻碟監製，就算寫一隻歌都好。」雖然開曬口求師傅，不過師徒再合作都要等巫老師過咗啖氣至得。
當眾撬過檔
對鄭俊弘好有興趣的英皇 CEO吳雨，當眾問鄭：「幾時嚟英皇？」搞到鄭十分尷尬。
師徒多恩怨
娛樂圈乃是非地，講到錢銀轇轕連親人都冇面俾，圈中曾見多對師徒人前搭曬膊頭，最後卻因利益而反面收場。
|
鍾意就快D Share啦！
|
|
|
