熱爆娛樂: [壹週刊 1240] 日唱 6粒鐘　左麟右李紅館加床 M1,

2013年12月12日星期四

[壹週刊 1240] 日唱 6粒鐘　左麟右李紅館加床 M1,

探熱針

日唱 6粒鐘　左麟右李紅館加床

加加埋埋開過百多場演唱會的左麟右李，今年慶祝合作十周年，卻撞正紅館無期，十日要唱十三場，唯有連日場都做埋。一日要唱六粒鐘，體力唔講得笑，何止六十三歲阿倫，就連四十六歲克勤都要諗計。由朝到晚留守紅館，兩人唯有在各自的休息室內加床，做完日場，就在房間短睡半粒鐘叉電，瞓醒再唱過！

一定要食飯

不經不覺，左麟右李已經組成十年，演唱會服裝亦愈嚟愈誇張，多年來為克勤做出騷歌衫的 Henry Lau，承認今次設計比過往大膽。「 Opening套衫鑲滿石，重達三十磅，件衫好有 Star War feel，以往克勤未試過！」

十日唱十三場，麟李無偷懶，堅持每場唱足三粒鐘，主辦單位更相當體貼，運送兩張大床到紅館，讓二人可趁空檔休息。「呢張嘢好有用，唱完日場，就喺度眠一眠，落完妝，就瞓嘞；大概半粒鐘啦，之後就食飯，都係食住家飯，少油少鹽，因為要有體力，所以一定要食澱粉質，飯好緊要。」李克勤說。

克勤帶記者入後台，參觀他為期十日的私家床。

做騷期間，克勤食得十分清淡。

克勤下午五點到達場館，先跟校長彩排部分歌曲，之後才埋位準備，他更試戴一副之前未有戴上台的眼鏡。

左麟右李跳鄭多燕舞，台下克勤的媽咪及外母，跳埋一份。

首場騷後，眾人在台上為當日生日的克勤切蛋糕，連看三場的拉姑，更帶補品到後台探班。

克勤事前無透露會在台上彈結他，加上一身 rock友造型，給觀眾帶來驚喜。

未開騷，後台加緊練習。

黃子華度橋

為搞新意思，更秘密請來在電視劇《 My盛 Lady》中 hit爆的黃子華度台詞，例如講「 BB出世時，攞出世紙同時，可以攞埋幼稚園、小學、大學入學證，好唔好！」，又話「老人福利降到二十五歲」，不過麟李演繹，效果始終唔及棟篤笑專家。搞爛 gag之外，麟李亦針對跳舞弱項努力操練，更加入「肥師奶」偶像鄭多燕的健康舞，難得克勤台上跳，克勤媽咪、外母台下叉腰舉手跟住鬱，兩個阿媽睇得非常投入。

除咗跳健康舞，克勤亦秘密學結他在演唱會上露兩手。「本來係學嚟玩，等個仔未學自己學識先，後來玩玩嚇，覺得可以喺個騷度做喎！」

由細聽阿倫歌大的克勤，專登寫了首歌送給校長，兩個大男人一個唱、一個聽搞到眼濕濕。「好感動！佢係聽我歌大，但估唔到佢個仔都係聽我歌大，成日唱 Marianne Marianne， would you stay for me！」校長搞笑說。