娛樂喧
雯女宣萱爭港視一姐 無綫靠超儀強姦戲反擊
港視開台在即，但隨著張可頤與港視約滿，「港視一姐」地位懸空。由於阿佘、胡杏兒、楊怡留守無綫，港視只好向自由身的宣萱及鄧萃雯埋手。
一直與港視傾合作的宣萱，之前因不欲屈居宿敵張可頤之下，以致拉鋸一年仍未成事，最近雙方已秘密斟掂，只欠動筆。另一方面，鄧萃雯本來吊高來賣，不過，當她得悉宣萱有所動作，即主動要求港視提供劇本給她，隨時搶先簽約。
港視搵上位花旦做台柱，無綫也急急找外援方力申及黃秋生助陣，更度身訂造劇本俾賭王千金何超儀。劇中何超儀飾演單身母親，身世坎坷，更有場意識大膽的強姦戲，繼續重口味。
宣萱與張可頤多年前拍罷《難兄難弟》之後交惡，此後兩人明爭暗鬥多年。直至 2012年，港視找宣萱傾過檔時，宣萱亦睇住宿敵來開條件，要求比「一姐」張可頤更高。當時港視未知幾時開台，宣萱又企硬，合作一直未能成事。
「依家 Maggie（張可頤）冇續約，港視都心急搵女主角，而 Jessica（宣萱）休息咗成年，都心鬱鬱想復出，雙方已傾到七七八八，差少少細節。其實港視都滿意 Maggie，但佢受甲狀腺炎影響成日水腫，港視都擔心佢狀態唔穩定，所以拍完《客家女人》後，雙方未有合作計劃。」知情者說。
雯女主動睇劇本
少了張可頤，港視亦有向與無綫交惡的鄧萃雯招手。鄧萃雯最初對港視多多要求，台前幕後班底都要過問，搞到港視都驚咗。「不過雯女收到風話宣萱同港視傾到埋欄，態度即刻軟化，仲主動要求港視嗱嗱聲俾劇本佢睇，擺明想搶宣萱頭啖湯。皆因港視搵到鎮台花旦，相對佢就冇咁馨香。」據知，鄧萃雯手上有兩個劇本，一個是商戰劇，另一個是愛情劇，拍檔好大機會是陳錦鴻。
雯女經理人表示：「雯女係睇緊港視俾佢嘅兩個劇本，不過佢唔喺香港，未知佢諗成點。」
就力邀宣萱加盟，本刊向港視發言人鄭小姐求證，她說：「好多藝人都有接觸過，宣萱係有實力嘅演員，我哋當然有興趣。」
至於宣萱就直認傾過劇本：「係有傾過，有導演同我傾過劇本，題材類似《 Sex& the City》，近期都有去探班，絕對有興趣同港視合作！」
角色誘超儀
港視發力，無綫亦急到電影圈搵外援。據知樂易玲親自邀請何超儀拍新劇，定名《再戰明天》，由她夥拍吳啟華做男女主角，更講到明為她度身訂造角色。「無綫睇準超儀唔計較錢，戲最緊要搶，力說佢新劇有多場內心戲。何超儀演的跛手失婚婦人，為了養兒子，執紙皮維生外仲要坐監，監製再加多兩場強姦戲同受虐戲俾佢發揮。超儀一聽即刻好有興趣，好快就應承。」
除了何超儀外，樂易玲亦搵了未拍過電視劇的謝婷婷，拍一部大律師（ barrister）新劇，劇名暫定為《四個女人三個 bar》，更有意找林峯或鄭嘉穎做男主角。至於曾志偉亦為 TVB請到黃秋生，拍住黎芷珊主持節目，借秋生人面，邀請更多星級嘉賓受訪。
本刊致電何超儀的發言人魏先生，他承認超儀是被角色吸引：「價錢唔方便透露，個角色係好特別。（特登加多兩場好激嘅強姦戲俾超儀？）佢接呢套劇，都係因為好有挑戰性。」兩台惡鬥，令多年一池死水的電視圈重拾朝氣，都是觀眾之福。
無綫外援組
四花旦留守無綫
香港電視急於搵一線花旦入台坐鎮，皆因市場上選擇不多，有身價的花旦多有合約在身，未能跳槽。加上與港視合作開的張可頤因水腫令狀態反覆，造就自由身的宣萱及鄧萃雯爭做港視一姐。
|
鍾意就快D Share啦！
|
|
|