開解女兒
上周二（ 14日），彭羚與大女林泳在銅鑼灣利園嘆下午茶，其間談到拍拖問題，情竇初開的女兒不禁掩嘴偷笑，而彭羚則耐心聆聽，沒有擺媽咪款，難怪阿女視她如朋友。
娛樂喧
瞞惡爸拍拖 林海峰大女搵彭羚訴苦
林家有女初長成，林海峰與彭羚的 14歲長女林泳，已長得亭亭玉立。本刊收到消息，剛由女拔轉到漢基國際學校的林泳，由於父母關係，加上性格開朗，是校內風頭躉，雖然正在箍牙，但仍引來不少狂蜂浪蝶。
據知林泳近日情竇初開，卻因初戀煩惱，要搵情同姊妹的媽咪傾訴。上周二（ 14日），記者發現剛放學的林泳約媽咪到銅鑼灣利園 high tea。其間記者聽到林泳訴心聲：「有啲唔開心，唔知點算好！」彭羚隨即加以安慰：「媽咪都後生過，試過你依家咁……」阿女被情困，周四（ 23日）開騷的橋王林海峰，唔知會唔會醒幾招俾阿女？
彭羚自從與林海峰結婚誕下兩女後，選擇為家庭退出樂壇。雖然有家傭，但彭羚每天由早餐至晚餐，都會親自下廚煮飯，又管接管送阿女返學、放學和補習，從不假手於人。有賢內助睇實屋企，無後顧之憂的林海峰，才可放心出去搵銀。近日他便與老友葛民輝在紅館開一連九場的「軟硬騷」，豬籠入水過肥年。
與台灣仔拍拖
據知林海峰在家飾演「嚴父」角色，雖然忙於搵錢，但對於兩女的一切都瞭如指掌，不論女兒識甚麼朋友，成績如何都知得一清二楚。早前，林海峰為讓女兒學好正統英文，安排大女林泳，由女拔轉到漢基國際學校。由傳統女校轉到洋溢開放氣息的國際學校，林泳在短短時間內，亦沾染鬼妹仔性格，引來不少狂蜂浪蝶。知情人透露：「林泳喺學校好受歡迎，因為佢好識同人溝通，遊水又叻、讀書又唔錯，就算隔籬班嘅男同學，小息嗰陣都專登去班房搵佢。佢最近就同個高我哋兩級嘅台灣男仔行得好埋，成日喺學校糖黐豆咁。」
搵阿媽傾心事
據知，情竇初開的林泳，近日卻因小事和初戀師兄鬧交，未懂處理感情事的她，惟有搵似家姐多過似媽咪的彭羚傾訴少女心事。
上周二（ 14日），送完細女林清去補習的彭羚，便陪大女林泳到銅鑼灣利園嘆下午茶。慳家的彭羚沒有叫嘢食，只點了一件 cake及熱朱古力給女兒，偶爾才拿起阿女的朱古力呷兩啖。其間記者聽到受情困的林泳向媽咪訴心聲，托著腮的她說：「有啲唔開心，唔知點算好！」媽咪彭羚隨即加以安慰：「媽咪都後生過，試過你依家咁……你咪帶個男仔嚟俾我見嚇。」林泳此時突然緊張拉實媽咪手說：「記住唔好同爹哋講！」彭羚即拍拍她的手點頭。兩母女再喁喁細語一輪，原本愁眉不展的林泳，在媽咪的開導下，重拾笑容。
街邊買絲襪
傾了半小時少女心事，林泳急急往補習，至於要在銅鑼灣等兩女放學的彭羚，則獨自行街。不過貴為富太，亦是潮人林狗的老婆，彭羚沒有趁機行名店，反而到渣甸坊光顧附近平民改衣店，又步行到渣甸坊女人街買了三對 12蚊絲襪。買襪期間，店舖老闆更和她熟絡地打牙骹，看來彭是熟客仔。其後她到莎莎買了一枝價值$15的修護指甲油。彭羚在街邊及水貨店買平貨，但她對兩個女兒的健康卻一絲不苟，不單到 Fancl專門店為女兒掃護膚品，更詢問店內職員，為愛女選購維他命 C食品，絕對廿四孝媽咪。
泳照流出老竇發火
據知林泳和學校師兄拍拖，做女的只與媽咪傾訴，卻不敢告知老竇林海峰，全因她早前相約校內同學開船 P，事後在同學的 facebook中，流出數張穿上火紅泳衣的照片，令老竇大發雷霆。知情人士透露：「阿 Jan（林海峰）成日 check個女個 facebook，講明唔准 post啲唔正經嘅相，所以嗰次流咗幾張林泳著泳衣嘅相，激到阿 Jan死死嚇。阿 Jan管得咁嚴，都係驚阿女拍拖，俾男人呃。對於女兒多人追，林海峰坦言：「就算家傭出去識男仔，我都一樣擔心，何況自己個女，梗係要睇到實一實。」惡父開到口驚阿女拍拖，難怪少女心事只可以話俾阿媽知囉！
|
鍾意就快D Share啦！
|
|
|