熱爆娛樂: [壹週刊 1246] 無綫捧富商包　通宵更時薪$32　脫星鄭艷麗麥記賣包

2014年1月24日星期五

[壹週刊 1246] 無綫捧富商包　通宵更時薪$32　脫星鄭艷麗麥記賣包

雖然鄭艷麗由昔日索爆脫星，變成今日白髮蒼蒼的肥婆，但標致輪廓，令她仍然搶眼。轉行做麥記，服務態度一流，對每個客人都講：「多謝曬，下次見！」

娛頭

無綫捧富商包　通宵更時薪$32　脫星鄭艷麗麥記賣包

無綫出身，憑住一副 34、 24、 36逼爆身材成為九十年代脫星的鄭艷麗，當年曾被力捧，拍劇對手有梁朝偉，又與歐陽震華合作三級片，也是已故台灣富商黃任中的契女，以大包身材行走娛圈。

做脫星有期限，末路的她早已脫離娛圈多年。風光不再，鄭艷麗放下身段，做麥當勞，時薪$32，照啃！

昔日大把色迷買飛入場睇佢賣大包，已年屆四十二歲，吹脹了的鄭艷麗在老麥通宵賣包，住公屋。為兩餐能屈能伸，絕非尋常人做得到。

踩通宵月入唔過萬

鄭艷麗由無綫清純小花轉型行性感做三級片女星，在電影《借種》中露曬點，可惜無助她事業更進一步，反而意外惹來台灣富商黃任中的垂涎。

有疏財契爺照住，風光日子食好住好滿身名牌。直至○四年黃任中病逝，頓失經濟支柱，鄭艷麗一度淪落到夜總會登台搵食。○九年，她在曾志偉執導的賀歲片《 72家租客》當大茄後，便再沒出席公開場合，在娛樂圈銷聲匿跡。

這位過氣艷星，近年因經濟拮據，為搵兩餐，已無心眷戀昔日風光；歸於平淡的鄭艷麗甚至刻意跟圈中好友楊玉梅、林偉等斷絕聯絡。

昔日自攜「胸器」搵食，拍戲登台酬勞以萬計的她，今日卻要靠雙手，在時薪只有三十元的麥當勞捱騾仔。因為夜更時薪比日更賺多兩蚊有三十二元，加埋每日六十元津貼，日踩十粒鐘，在一間廿四小時麥記做夜更的鄭艷麗，月入也不過萬。

九五年拍罷幾套三級片後，得台灣富商黃任中睇中，成為他的紅顏知己，供養生活。

在娛圈打滾時，鄭艷麗自爆為防 34D上圍下墮，要 24小時戴胸圍承托住。

改名避耳目

脫離娛圈六年，鄭艷麗的天賦搵食架生在麥記無用武之地，索爆身材不復再，取而代之是脹了幾碼，似生育過的熊腰巨躉，加上一頭白髮和戴眼鏡，令四十二歲的她看來比實際年齡更蒼老。

縱然外形走曬樣，根本不容易被人一眼認出，但鄭艷麗還是將昔日在娛圈所用的英文名 Judy改為 Constance，選擇人流較少兼賺多兩蚊一粒鐘的通宵更，避人耳目。

在娛樂圈的日子，鄭艷麗算是爛做一族，性感寫真、三級片、夜總會登台乜都撈；如今為兩餐在麥記打工，一樣密密做；由後勤到前台招呼客人任何崗位都沾手。本著做好呢份工，鄭艷麗為客人執齊食物後，總會殷勤地說：「多謝曬，下次見！」笑容十足的她，全沒因人生大起大落而露出半點委屈。

每日踩十粒鐘，鄭艷麗近乎做唔停手，就算午夜時分客人稀疏，不少同事都乘機歇一歇，但她仍是攞住毛巾周圍抹，把大部分粗重工夫攬上身。

外形變樣，但「咇呢叭啦」性格依舊，同事笑她過度勤力，她就大大聲回應：「鬼叫我新嚟，乜都係我做囉！」其間有幾個女同事見無客企埋一邊食消夜，並力邀鄭艷麗加入「蛇竇」，「我減緊肥，唔食嘞！我做埋啲嘢先。」鄭艷麗說。

拍完三級片， 02年鄭艷麗出噴血寫真搏反彈。

包冚避記者

被本刊發現她在麥記賣包後，本週二淩晨返工的她，為怕再被追訪，她戴住口罩匿喺廚房。

當日黃任中來港一拖六轟動娛圈，得寵的鄭艷麗一直貼身服侍他。

打工重拾自尊

走上三級之路，但賺來的一點名利，卻無法補償她被對手借床戲上下其手的侮辱。鄭艷麗曾在訪問中抱怨過：「明明同對手講好只摸我個胸上方，點知一開機佢就直接摸落嚟，我好唔開心。」

如今打份牛工，重拾尊嚴的鄭艷麗跟麥記的同事有講有笑，相處融洽，對同事的好奇逼供，大情大性的鄭艷麗毫不介意：「問啦，我講得就會講，但太私人嘅問題我唔會答！」女同事打蛇隨棍上問她何以如此大轉變？吞咗大聲公落肚的鄭艷麗忽然收細聲浪，與對方咬耳仔。

據悉，離開娛樂圈後，鄭艷麗數年前曾攞住登台賺來的積蓄，到台灣開私房菜，有指她經營不善，失敗收場。

「佢好易信人，又唔識計數。聽講佢好似投資咗六位數字，做咗一年左右就蝕曬，跟香港個同居男友又散埋，人財兩失！之後就唔再同圈中人聯繫。」知情者爆。

由脫星轉為快餐店員工，連同事都好奇向她逼供，其間唔多願講的鄭艷麗脫下眼鏡抹汗。

午夜時分麥記客少，班女同事聚埋一齊食消夜，鄭艷麗仍企喺 counter搵嘢做，勤力到班同事都頂佢唔順，勸佢抖一抖。

雖然已屆四十二，但她仍不缺當年的調皮性格，對住同事扮鬼臉。

膠袋當手袋用

天光七點，鄭艷麗終於收得工。連制服都懶得換，除低帽穿上大褸，再攞住一袋打包麥記行去搭巴士返家。以前一身名牌，今日隨便執個蘋果電腦的膠背包就當手袋。當日住明星名人聚居的跑馬地，今日住公屋，一切都大不同。

記者上前訪問鄭艷麗，被認出的她即加快腳步「逃走」。

問她何以有如此轉變及是否已婚等問題，鄭艷麗說：「我無嘢好講！」追問她甘於平淡的原因，一直低頭急步走的她答：「呢啲咁普通嘅嘢，唔知你哋想講咩！」之後不再回應。

本週二淩晨（一月二十一日），返到麥記開工的鄭艷麗一見記者，繼續封口，換上制服後索性戴埋口罩，在廚房匿埋伏低。避世多時，這位一代脫星，再不願曝光鏡頭下。

一聽到記者叫她鄭艷麗，她起初反應停一停。及後追問她何解離開娛圈轉行，是否已婚生仔等問題，她便拋下一句：「我冇嘢好講！」之後急步避記者。

清晨放工後，鄭艷麗打包麥記回家歎。昔日一身名牌，但今日歸於平淡的她只孭住一個膠袋，且由住跑馬地轉到住公屋。

三級片式微，鄭艷麗在○三年拍住其他同期出道艷星到澳門及內地登台搵銀。

成為黃任中紅顏知己，間唔中返港的鄭艷麗又被拍到跟富商林建名孖住睇騷。

逐漸歸於平淡的她，在○四年被拍到跟鬍鬚男友在跑馬地行街。

黃任中照顧

現年 42歲的鄭艷麗， 88年奪無綫銀河新星冠軍入行，第一部電視劇即有機會跟梁朝偉合作《俠客行》，發展平平的她，九十年代初轉移到影圈發展，拍過不少三級電影如《慈禧秘密生活》、《二奶村之殺夫》、《滅門慘案 II借種》等。

00年，鄭艷麗被台灣富商黃任中睇中，有大水喉照顧的她，曾計劃開夜店食肆做老闆娘。 03年，黃任中被台灣政府控逃稅，鄭艷麗回流香港，由於「沙士」影響，冇戲拍的她跟住一班同期艷星楊玉梅等不時到澳門及內地登台維持生計；更來者不拒任台下觀眾任錫。 09年，仍未走樣的鄭艷麗客串賀歲片《 72家租客》後，從此不再公開亮相。

八九年清純的鄭艷麗拍維他奶廣告，又跟梁朝偉合演劇集《俠客行》。之後一個轉型，走脫星路線，夥歐陽震華拍三級片。

隱形六年的鄭艷麗，據悉為重過新生活，刻意跟圈中好友斷絕聯絡。其中曾和她拍住登台的楊玉梅也稱不知對方近況。

巨胸模出家

另一個九十年代艷星巨胸模秦蔚文，近日被發現在屯門一間寺院剃度出家，斷絕七情六慾。

由模特兒轉入影圈，秦蔚文的星光比鄭艷麗更暗淡。撈唔起，十多年前轉做保險。有指她曾跟一名江湖人物拍拖數年，甩拖後開始誠心修佛。二千年，秦蔚文叫埋老友梁思浩、亞姐羅麗莎等，為西方寺搞籌款活動，十分落力。

感情一場空，但她卻一手撮合傅明憲與前夫葉建波的姻緣。歸於平淡的她，近年漸漸疏遠圈中朋友。