出道 6年， G.E.M.在港已經進駐過 3次紅館、晉升巨肺天後行列，不過在內地就知名度欠奉，《我是歌手 2》首曝光，一鳴驚人。
封面
內地爆紅 身價 double G.E.M. 2千呎複式閨房曝光
未睇過《我是歌手 2》？未聽過 G.E.M.唱〈存在〉？咁你就輸喇！ 22歲鄧紫棋作為香港代表，參加強國最高收視歌手鬥唱節目，唱贏內地老牌歌手韓磊、叮走台灣金曲歌王曹格，唔只做咗香港之光、仲爆紅全國，邊個仲敢話香港樂壇已死？
排名一集高過一集、微博粉絲人數集集倍升、賺夠名氣，人仔自然亦都跟住嚟。本刊發現， G.E.M.去年一個月內連掃荃灣韻濤居兩個單位，首做業主自製 2千呎複式豪宅，今時今日， 1,300萬港紙對小巨肺嚟講濕濕碎！
兩週前，在強國仲係默默無聞、人人淨係知佢係林宥嘉女朋友，兩週後，風頭已經蓋過男朋友仔、成為強國 00年後最愛美女巨肺歌手， 22歲港產歌星鄧紫棋今次由強國威返嚟香港，最重要係識揀，《我是歌手》首季去年收視全國第一、湖南衞視年年全國冠軍、仲要接住爆紅節目《爸爸去哪兒》出街，再加埋絕不失禮的巨肺，想唔成名都難！
40萬仲有得升
紅到呢步一啲唔容易，去年 11月， G.E.M.錄影無綫節目《勁歌金曲》，接受主持鄭丹瑞訪問時，已經透露過北上發展困難重重：「我以前上去內地，介紹自己係香港歌手，工作人員就會隱隱約約聽到人講『香港歌手即係唔使聽啦！』。去到內地真係重新做一個新人，要好勤力至得！」
出道 6年的 G.E.M.在港一早是一線歌手、演唱會開到入紅館，不過據悉在人仔市場一直係奀星價。近兩年主打走南創北積極打入內地市場後， G.E.M.去年騷價有增進，達到六位數字，不過真正高峰則是《我是歌手 2》播出以後，知情人士透露，已由 20萬急升至 40萬，直達梁詠琪、陳慧琳，同多位成名多年的上岸級天後看齊，再播多幾集，肯定仲有得升！
2廳 6房
荃灣韻濤居 2000年建成， G.E.M.購入的複式單位由前業主自製，兩層面積共 1956呎，原本各層有三房一廳一工人房及儲物房，上層的三間房被打通成為無敵客飯廳及客廁，樓下則有主人套房外加兩個睡房，另外還有一個工人房及兩個儲物房。咁多間房，練琴作曲招呼朋友大把地方俾 G.E.M.用！
21歲買千萬樓
參賽兩集已經粉絲、騷價雙線標升，據知 G.E.M.現時已錄影至第四集，而網絡更盛傳她將以大熱姿態進入最終回決賽，睇怕本來租屋獨居的 G.E.M.都預見自己潛力無限，一年前已經膽粗粗做業主，仲要一次過掃兩層。
3年前開始搬離娘家遷入韻濤居獨居，先租後買。據田土廳資料顯示， 12年 12月， G.E.M.先行以 625萬買入高層一個近千呎海景單位，一個月後再以同樣價錢掃入樓上單位，當年 21歲女已經坐擁韻濤居唯一一個自製複式單位。雖然唔係一炮過買入，仍然要按月供樓，但照最近騷價狂飆、名氣急升走勢，睇怕付清餘款再次入市話咁快！
G.E.M.認置業：租樓太貴。
年紀小小坐擁複式單位， G.E.M.刻意低調保持沉默，絕少向傳媒提及已經置業，連最愛自鋪自拍照的社交網絡，亦小心翼翼避過屋外景色及室內樓梯。不過本刊獲悉 G.E.M.香閨是韻濤居唯一複式特色單位， 11年曾經被報章地產版位詳細介紹，雖然未有靚裝修，不過全海景同巨廳巨房，已經見到獨居 G.E.M.之霸氣同財力。
週一 G.E.M.在電話承認做業主：「租樓真係好貴，咁我彈琴做歌又怕嘈親人，的確需要大啲嘅空間，唔想影響鄰居，就買咗樓，可以令自己多啲動力努力工作。」講到《我是歌手 2》令她爆紅，她就話：「其實今次個比賽係湖南衞視主動搵我，原來《我是歌手》總導演特登嚟香港睇我唱 live，但係聯絡我參賽就係幾個星期之前嘅事。」
內地身價急升， G.E.M.直認工作量增加，加上工作已排至 2015年，「打嚟搵我做嘢真係多咗，但係有冇加價就唔知，因為要專心比賽，全部都推咗，根本未傾到價錢，我真係唔係富婆嚟㗎！」𠵱家唔係好快係㗎喇！
出口術
內地綜藝、選秀節目大行其道，除咗贊助商捨得畀、請得鬱各路巨星、製作又認真外，宣傳手法亦鋪天蓋地憑出招。《我是歌手》採取淘汰再替補機制，每兩集有人被 out亦即是有人入選，除咗第三集落實的內地歌手張傑，官方微博最興 tag中港台歌手、引起網友懷疑討論增加話題，香港歌手林憶蓮、衞蘭、新加坡歌手孫燕姿、仲有 G.E.M.男友林宥嘉都有份被抽水。
出賽潮
贊助商億億聲科水、全國觀眾人數又係輕易過億、想增加強國知名度和人仔財路，中港台藝人都知要借綜藝、選秀節目上位。其實除咗 G.E.M.，香港仲有兩位樂壇代表出賽，表現仲唔弱添！
謝安琪深圳衞視《中國音超》
賽制由全國八大唱片公司分隊制鬥唱，謝安琪身為金牌大風隊長帶領內地歌手，雖然個人表現出色，可惜隊友唔爭氣、深圳衞視收視亦遠遠不敵湖南衞視，累 Kay人氣輸 G.E.M.幾條街。
|
鍾意就快D Share啦！
|
|
|