熱爆娛樂: [FACE 349] 二人世界　愛的宣言升級　柏豪偷運女友巴黎蜜月柏豪,周柏豪,MF,

2014年1月29日星期三

[FACE 349] 二人世界　愛的宣言升級　柏豪偷運女友巴黎蜜月柏豪,周柏豪,MF,

23/1　 11:28pm

剛到機場的柏豪對於現場有記者採訪表現愕然，但亦大方任影，仲話畀記者知係去歐洲。雖然柏豪只係單拖出現，但一個男人拖兩個大行李喼已經出賣咗佢。

真面目

二人世界　愛的宣言升級　柏豪偷運女友巴黎蜜月

樂壇頒獎禮隨住月中舉行的《勁歌總選》而圓滿結束，歌手們鬆一口氣，休息再迎戰 2014。好似天後容祖兒，就靜雞雞孖住男友師兄及屋企人蘇梅島享受陽光與海灘。

在《叱吒頒獎禮》上勇奪 3獎的周柏豪，得到「男歌手銀獎」時，向一直神秘低調、任職 I.T時裝買手的女友 Stephanie公開愛的宣言：「我會跑快啲，跑到我哋嘅終點……我愛你。」雖然冇開名，不過 Stephanie甜到入心。柏豪言出必行，為獎勵女友多年在背後默默支持，頒獎禮後決定豪請女友往巴黎、英國預支蜜月兩星期，並於上週四（ 23日）出發。當晚被本刊發現單拖現身機場的柏豪，被問到女友點解冇同行時笑說：「唔知呀，唔得閒啩？」其實二人只係分開入閘，貫徹 Stephanie樂做隱形女友作風啫！

1/1　　　我會跑快啲，跑到我哋嘅終點……我愛你！（真實對白）

《叱吒頒獎禮》上公開多謝女友，仲喺台上大聲講「我愛你」，今次攞銀獎都 high到咁，攞金仲得了？

出道 6年，周柏豪由模特兒逐步升呢，再慢慢步上各大電台年尾頒獎禮，緋聞多多的周柏豪曾與鄭融、何超雲、吳雨霏及連詩雅傳過緋聞，不過全都曇花一現，柏豪每晚返屋企對住的，仍是跟他拍拖近 6年的同居女友，任職 I.T時裝買手的 Stephanie Chu。

派定心丸

剛於 1月 1日的《 2013年度叱吒樂壇流行榜頒獎典禮》的頒獎台上，柏豪 3次上台領獎，終於在領取「叱吒樂壇男歌手」銀獎時，忍唔住要公開對女友發放愛的宣言。

「想多謝一個人，人愈大愈發覺需要認同，原來俾自己愛嘅人去認同係最重要。好感謝你，係你一路陪住我成長，陪住我度過好多難關。我會跑快啲，跑到我哋嘅終點。我愛你，多謝你嘅耐性。」

當晚柏豪雖然冇開女友名，但柏豪開口講「我愛你」，明顯想給女友 Stephanie名分。柏豪身邊人說：「柏豪其實都已經肯定 Stephanie正印地位，人人都知佢哋同居；而 Stephanie亦得到柏豪屋企人認同，所以佢唔介意向女友公開示愛，只係為免影響對方生活及自己事業，所以唔開名住。」

22/12

去年做冬當晚，柏豪帶住女友、父母去中環食日本菜慶祝，二人雖然冇拖手，但一齊行一齊食飯，女友又入曬屋，拍拖接近 6年，婚期看來不遠。

臨飛巴黎前，柏豪孖住官恩娜，連詩雅同吳雨霏去睇軟硬，不過由於要趕飛機，柏豪冇等完場就「閃」。

雖然已完成第 9張專輯，但工作狂柏豪已經準備新碟，柏豪仲喺 Instagram曬工作進度。

坐特選經濟位

喺check-in櫃台柏豪焗住向地勤講目的地係巴黎，間接爆咗畀記者知。

完成各大頒獎禮，加上去年柏豪的成績大家有目共睹，故柏豪請埋女友 Stephanie同遊巴黎、英國預支蜜月，二人並已於上週五淩晨（ 24日）出發。據知雖然二人不是坐頭等或商務客位，但柏豪是以飛行哩數換取較經濟艙闊落的特選經濟客位，讓女友舒舒服服到達目的地。二人將於巴黎及英國各留約一星期，並於農曆年後返港。

上週四（ 23日）晚，柏豪與連詩雅等人先往紅館睇軟硬演唱會，未睇到完場，柏豪先行離開，約 11時 20分在機場見到記者初時表現錯愕，但馬上即露出笑容。柏豪被問到去邊度旅行時，柏豪猶豫：「歐洲囉！（幾時返？）過埋年啦！（女朋友呢？）唔知喎，唔得閒啩？」

完成 check-in手續，柏豪急急腳入閘，與女友展開兩星期甜蜜假期，分分鐘回港有好消息公布。