上星期，小恩子接受老友劉小慧邀請，上電視做《 BB日記》嘉賓。被問到離婚一事，佢只係話：「暫時唔會答有關婚姻嘅事，只可以講我目前生活得好開心。」當日佢化咗淡妝，近鏡睇，塊面都幾緊緻。
媽咪姐
秘戀已婚免稅店老闆 1年 黎瑞恩赴韓瘦面迎春
早前被爆離婚嘅黎瑞恩，帶埋對仔女，由曾家大宅搬去沙田嘅凱悅酒店暫住，擺明去意已決。啱啱，竟然傳出佢戀上已婚免稅店老闆鄭應南！
有個打 golf嘅朋友同媽咪姐講，其實幾個月前已經見黎瑞恩同鄭應南喺 golf場拖曬手鬼咁 sweet。之前小恩子開演唱會，聽講鄭生仲幫佢落力 sell飛㖭！咁又難怪女方對佢另眼相看。再逢第二春嘅黎瑞恩，就突然變得貪靚。媽咪姐八到，上年中佢主動約埋一班闊太，去韓國做蛋白線瘦面療程。唔怪得相比三年前，小恩子今日塊面明顯尖咗又靚咗，呢啲咪叫女為悅己者容囉！
講開又講，黎瑞恩老公曾智明雖然多年嚟身邊都有唔同嘅密友，不過佢係識得返屋企嗰隻，尤其聽到老婆有人追之後都好緊張，亦有認錯，又試過用仔女做理由挽救婚姻，就連老爺曾憲梓同奶奶都出面力挽！無奈黎瑞恩對老公已心死，又有新戀情衝擊，最終都係帶埋仔女離開。所以話，奉勸一班鍾意北上嘅男人，都係及早回頭是岸，否則好易連老婆仔女都冇埋呀。
隱形富豪
鄭應南已婚，育有一女，名下有過百間公司。佢任主席嘅皇權集團除咗主力發展免稅店業務，又投資國內房地產、米店、酒、茶同節能事業。
識飲識食嘅佢，仲喺香港開咗君蘭餅店同多間中、日、泰菜館。上年小恩子開完演唱會就喺佢間和食店搞慶功宴。除此之外，鄭應南仲用自己英文名 Antares為品牌，推出太陽眼鏡同家電等，又收購咗法牌 Agatha同英牌 Patrick Cox。
身為香港職業高爾夫球協會永遠名譽會長嘅佢，又喺香港機場興建航天城高爾夫球場，寓興趣於事業，真係識嘆。
埋線變 V面
根據詩琳纖體美容馮小姐表示：「蛋白線拉面係新一代嘅拉皮方式，用人體可吸收嘅縫線 PDO（ Polydioxanone），固定喺臉部鬆弛、需要提升嘅部位。當線刺入皮膚後，傷口同線會誘發輕度急性反應，促使皮膚啟動修復程序，刺激骨膠原增生，令皮膚恢復彈性緊緻，改善鬆弛、雙下巴等問題，費用就由三萬至四萬不等。」
埋蛋白線視乎各人輪廓而定，針線數目由數十到百多條不等。埋線過程簡單，復原期只須幾日，而且效果相對持久。不過手術始終涉及風險，各位想靚嘅姊妹媽媽諗清楚呀。
|
鍾意就快D Share啦！
|
|
|