熱爆娛樂: [忽然1周 969] 馬上晒冷 MW,

2014年2月21日星期五

周日（ 16號）嘅渣打馬拉松適逢寒風襲港，所有參賽嘅選手天未光就要起跑，室外氣溫只得 7度，聽見都凍到騰騰震啦！不過咁，睇見徐濠縈以 3小時 50分跑完 42公里，跑贏陳山聰半個鐘頭，都真係要俾個「叻」字過佢。

之前日練夜練都係為咗比賽呢一日，俾老公陳奕迅改名叫「肯亞徐」嘅徐濠縈，今次完成咗佢首個 42公里嘅全馬。雖然天氣極凍，但都可以喺 4個小時內完成，當晚除咗大搞慶功宴，仲話：「跑完全馬咩都得，生多 10個都得。」咁康堤想要細佬定係細妹呢？

為慶祝阿徐完成首個全馬賽事，好友一早訂製了寫上「 FULL HILARY」嘅蛋糕牌送俾佢，仲預備定香檳慶祝㖭！

近半年不斷以跑步瘦身嘅陳山聰，一早就大事宣揚話要參加賽事，更要挑戰全馬比賽。雖然成績就唔夠「肯亞徐」快，要成 4小時 25分鐘先完成賽事，比預期 4小時慢，但後腿抽筋都能夠堅持到最後，意志可嘉。

跑馬拉松唔單止係自我挑戰，對鍾舒漫嚟講，亦係一種練氣方式。今次佢參加 10公里公路賽，以 1小時 14分鐘完成，又凍又大風仲吹到頭痛㖭。唔怕，返到屋企就有吳浩康呢個廿四孝男友錫番！

每個參加馬拉松嘅跑手，都會喺事前不停咁練習，但周柏豪就話自己冇時間練習，今次靠天才波無壓力所以跑得好輕鬆咁話。而且成績又確係唔錯，只係需要 1小時 02分就跑完 10公里，跑得咁好下次應該參加全馬嘛。

近幾次嘅馬拉松，心悠 BB都有份參加，不過今年天氣真係凍咗好多，連女神都要著番件外套加對厚手套先去比賽，最終當然順利以 1小時 07分完成 10公里啦。

鍾意就快D Share啦！