十多年前黎瑞恩同車婉婉在麻雀枱建交，從此變成好姊妹，經常孖住出席大小場合，又同是藝人高爾夫球會（ AGA）會員。可惜此情不再。
探熱針
車婉婉背後唱姊妹 黎瑞恩割席決裂
上月被本刊踢爆 40歲的黎瑞恩，因無法再忍受老公金利來三少曾智明、兩年前搭上內地女子，長期置家庭及一對子女不顧，決定結束十一年夫婦關係，並於數月前轉投與妻分居多年的免稅店大王鄭應南懷抱。
婚變新戀情連環揭發，一波未平一波又起。近日黎瑞恩在微博呻遭好友背後放毒箭，有指此「好友」正是早前公開表明跟黎瑞恩冇來往的「好姊妹」車婉婉。
據了解，車婉婉去年曾在背後唱衰好姊妹，黎瑞恩獲悉後十分傷心，從此關係決裂。
唱衰新戀情
本週日（二月二十三日），黎瑞恩忽然在微博訴心聲，直指遭一名相交多年的朋友背後放毒箭，令她非常失望。
「做朋友做咗接近十七年，今日終於睇清楚你喺我心目中，朋友嘅定義。你有事我第一時間兩脇插刀，但係換嚟嘅係落井下石，黃蜂尾後針。你傷咗人，亦同時失去一個曾經為你赴湯蹈火嘅朋友。」
黎瑞恩所指，據悉是由麻雀腳變成好姊妹，多年來經常孖公仔出現的車婉婉。
黎瑞恩爆婚變後再傳跟「免稅店大王」鄭應南相戀數月，在這段非常時期，車婉婉不單沒有出言維護半句，反而公開「割席」，聲稱跟對方無來往，也不在乎她瞅睬與否。
與此同時，有指二人交惡原因，是車婉婉不值黎瑞恩與密友的關係，曾向姊妹好言相勸，結果好心做壞事，反臉收場。
但近日在高爾夫球圈子卻傳出另一版本。指十七年姊妹情一朝決裂，真正原因並非好言相勸多事惹禍，而是有人背後唱衰姊妹，義氣錯付的黎瑞恩才會用上「黃蜂尾後針」的形容。
「阿恩一直當阿車係姊妹，完全信任佢，乜嘢秘密都同佢講。但佢估唔到同 Antares（鄭應男）一齊之後，阿車會周圍唱佢！起初阿恩都唔明點解，有啲佢同阿車嘅共同朋友會忽然疏遠自己，到後來阿車唱佢嘅事傳返去阿恩耳仔，佢先知俾人『落毒』。
「阿恩好嬲好傷心，打電話質問又鬧爆阿車；點知阿車態度好寸，阿恩就同佢割席。雖然冇朋友做，但阿恩冇同人講；過年嗰排小慧吹雞搞麻雀大賽，小慧都唔知阿恩唔嚟原來係同阿車反咗面。直至上星期阿車走出嚟講同阿恩冇來往，成班朋友問番阿恩先知咩事。」一名波友爆。
借出八十萬應急
相交十七年，據悉黎瑞恩對車婉婉極為照顧。數年前，車婉婉接手打理母親遺下來的「車氏粵菜軒」，曾一度周轉不靈，得悉姊妹有困難，黎瑞恩二話不說借出八十萬助她解決燃眉之急。此外，她還要求老公曾智明「幫拖」，當車婉婉是親人看待。
「阿恩唔單只借錢，為關照阿車有生意做，無論約朋友食飯定雀局，佢都提議幫襯『車氏』；又叫埋 Ricky（曾智明）多啲約班富二代去『車氏』食飯，就係咁，阿車同 Ricky愈來愈 friend，就算明知好姊妹個老公玩得好犀利，又同個廣州女人一齊兩年，搞到阿恩決定離婚，阿車最後竟然都係企喺男嗰邊。」有指車婉婉表態後，不少波友都為黎瑞恩不值，打電話剷爆阿車。
縮骨惹衝突
上月才搬離夫家的黎瑞恩，據悉早於去年中已跟曾智明簽訂離婚協議，數月後便可正式回復自由身。但有傳二人上月中在商談離婚條件發生衝突，並指黎瑞恩碌爆兩張加埋只有數十萬限額的附屬咭。
夫妻關係破裂，加上有人提出「縮骨」離婚條件，另一方難以接受，結果引爆衝突，大打出手。
「傳聞話男方每月俾廿萬生活費三母子，但嗰日傾離婚個男嘅好縮骨，阿恩接受唔到嘈起上嚟，仲俾人推咗落地，之後兩個就互揪，男嘅俾人抓傷手臂同胸口，女嘅手亦受傷。佢哋冇報警，只係各自去醫院驗傷。嗰次之後，兩個只係透過律師接觸。」知情者說。
記者以短訊求證黎瑞恩在微博所指的忘恩朋友，是否傳聞中的車婉婉，她沒有否認，只表示不作回應。至於車婉婉，於截稿前仍未回覆本刊。
一面倒
黎瑞恩與車婉婉相交十七年，彼此有不少共同朋友及波友，二人決裂後，大部分人都撐黎瑞恩，力證她為人有情有義。但講到車婉婉，就不提也罷！
羅敏莊
「我睇完佢（黎瑞恩）段微博，知道佢好 hurt！我係阿恩識咗廿年嘅朋友，知佢為人有情有義，絕對唔會好似嗰位十七年朋友咁對佢。（有傳佢所指嘅係車婉婉！）呢個我唔知，佢從來唔講朋友壞話，佢仲係個盡曬做老婆、媽咪同新抱責任嘅女人。」
|
鍾意就快D Share啦！
|
|
|