同你吟一吟
甘比陳慧珊 各行各路
做咗大劉劉鑾雄女人後，甘比陳凱韻五年抱兩，一女一仔湊成好字，功德圓滿。
照顧一對仔女，甘比落手落腳，成擔心機！上星期三（二月十九日），甘比拖住大女，甘比媽就拖住 Joseph Junior，由保鏢傍住經 ifc行去上車。天氣凍，六歲秀樺兩件 Moncler羽絨打孖著，戴住對舒服熊手襪，全程彈住行，得得意意。
第二日，《壹》仔喺同一個場，見到都係姓陳嘅陳慧珊，帶住八歲囡囡鍾律然，同外傭喺 citysuper買完嘢，跟住搭𨋢落停車場攞車。見到鏡頭，左邊眉骨撻住塊膠布嘅陳慧珊，抱起囡囡疾步走，唔願入鏡。
○六年再婚生女，兩年前老公破產要復出拍劇嘅陳慧珊，又鋪定路為將來返美國教書喺港大讀碩士學位，湊女搵食讀書靠自己， 43歲硬淨到呢！相對由娛樂記者變到要風得風嘅 34歲陳凱韻，兩個女人，兩條路，其實一樣唔簡單！
命數天定，但點行，始終係個人決定。
|
鍾意就快D Share啦！
|
|
|