網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年5月15日 星期四

[壹週刊 1262] 膀胱駁管剩 70磅 變賣所有物業 司馬燕:全部錢俾晒兩個仔 M1,




娛頭

膀胱駁管剩 70磅 變賣所有物業 司馬燕:全部錢俾曬兩個仔

自一二年底發現患上胃癌,一直積極面對病魔的司馬燕,接受完切除整個胃部手術後,至今依然要服用口服化療藥,因此令手臉長出黑斑,體重更一度由一百磅跌到六十幾磅,皮包骨的她常自嘲似患了厭食症。

經過一年多的治療,體重上調至七十磅的司馬燕,今年初跟丈夫吳忠義飛荷蘭補行婚禮回港,甫下機便被送入醫院,四日內做了兩次手術。以為癌魔再臨,司馬燕甚至做好心理準備簽定割腎同意書,猶幸只是尿管發現纖維瘤,手術須切除少許肋骨,再以膠管支撐。

今日不知明日事,當下的司馬燕只想盡快變賣北京物業,她說:「我會將全部錢俾曬兩個仔。」

十三吋傷口

二月中接連做了兩次手術,外間隨即傳出司馬燕癌病復發消息,連她自己亦一度懷疑要重新跟癌魔打硬仗。

「我由荷蘭返到香港機場已經要坐輪椅,淩晨十二點,跟住就直入醫院做手術。醫生話尿管好似電話線咁攣曬,腎膜好厚,如果再遲幾日會中尿毒,右邊腎會廢埋。第一晚做完通尿管手術,第二日醫院即刻幫我做 test,驚 cancer復發,我已經簽曬紙同意割腎;十五號做完第一次手術,十九號再做第二次,由尾龍骨開刀到胸口,傷口有十三吋長。

「而家我成身都係人造人魚線,六嚿腹肌,仲切咗少少肋骨,不過唔會好覺眼。醫生話我好幸運,只係纖維瘤塞咗條尿管,唔係癌病復發,大步𡃁過。」依然樂觀的司馬燕說

去年底,割胃後接近一年的她全身黑打扮出席活動,當時已經得 70磅。

去年 7月,一家四口在影樓影全家福,細仔吳景耀攬實她擺甫士,司馬燕笑得零舍開心。

三月搬到紅山半島,新居背山面海環境清幽,令本來鍾意玩的她,不想離開屋企。

相架中放著二人 N年前 ball場合照,當時仍留長髮:「都係兩個仔鍾意先留。」

在溫哥華有物業,她每年聖誕節都會去度假。

司馬燕在天津有物業,她間唔中會帶兒子去當地度假。

在荷蘭古堡行婚禮,老公興奮得將她抱起,其實當時司馬燕有胃酸倒流,十分辛苦。

去年暑假電視劇《衝上雲霄》大收, Sam哥出席活動,曾經是舊同事的司馬燕亦特登上前握手敍舊。

兩年三刀

司馬燕一直積極面對癌魔,因胃癌要切除整個胃部外,最近再發現體內長出瘜肉壓住膀胱尿管而要做手術。

無「胃」人生

12年 10月,證實患上胃癌,由於情況危急,需要即時入院,三日後進行手術切除整個胃部,留醫三個星期後出院,之後進行了三次化療,體重降到 80磅。她在手術後個多星期才通知朋友報平安。

抗癌成功

13年 7月,完成八次化療抗癌療程後,只有 77磅的她,靠遊水、做氣功調理身體,並努力增磅扮靚,再同老公飛荷蘭古堡補行婚禮,兩名兒子做花仔,順道慶祝結婚 17周年。

死過翻生

今年 2月同老公到荷蘭旅遊期間,因腹部劇痛臨時取消行程返港入院,發現瘜肉增生壓住膀胱尿管,即時進行了兩次手術,包括切除部分肋骨以及植入膠管。

植入膠管

四日內做兩次手術,在第二次大手術中,膀胱跟腎之間要用膠管支撐,每隔三個月需要更換一條新膠管,八個月再視乎情況,決定是否拿走。經歷割胃後只能坐著睡覺,並要忍受每晚痛醒的煎熬,但一切痛苦,在司馬燕口中,只是微不足道。

「都係肚脹時比較唔舒服,唔係咩大礙。我同朋友講,啲病好似便利店,周圍都有,我算好彩,唔係執到心臟病,突然間無咗,就見唔到大家。」

一病接一病,現時司馬燕仍需要花多一年時間服用口服化療藥,縱使服藥後臉和手長出黑斑,人又變得容易疲倦,接受訪問期間開始頭昏腦脹的她,仍不停會鼓勵自己。「有啲人食維他命幾十年,我咪當自己食維他命。」

上週二下午,她打扮靚靚跟朋友在 IFC的 robuchon歎下午茶。

大仔今年十七歲,去年帶埋女友陪司馬燕去睇首映,氹得她十分開心。

全靠老公

去年這個時候,仍在跟癌魔打仗的司馬燕,病得沒辦法走出房門,只能坐在床上跟兒子一起度過母親節,當時不懂中文的老公,加上兩個中文半桶水的寶貝仔,三父子用拼音合唱了一首國語歌送給她,令司馬燕暖在心頭。到今年母親節,一家四口亦推掉所有約會,在屋企食住家飯慶祝。

捱了三次刀,司馬燕能夠處之泰然,老公吳忠義居功不少。為重拾昔日拍拖感覺,過去一年坐郵輪、到荷蘭古堡補行婚禮,心靈上的支持,令司馬燕高峰期上過七十七磅,但大病後,又回落到七十二磅。

「試過跌到 30kg(六十六磅)都冇,當時唔敢同老公講,佢冇期望我可以增磅,只要唔好再跌, keep住一個穩定磅數已經開心。」

為要盡快增磅,有段時間,司馬燕總是叫滿一枱食物,她說:「我好想食好多嘢,但始終冇咗個胃,食物直落,食太多、太少都會唔舒服會痛。囝囝氹我,話而家好多人羨慕我,因為可以食極唔肥,又有 model身材。」

大仔吳澋滔第一次拍戲,她全程在馬來西亞陪住,捱更抵夜,更負責做阿四影相。

吳澋滔拍第一部電影《父子》,就獲 07年最佳新人獎及男配角獎,做星媽的她威曬。

變賣物業

兩個囝囝生性,放學回家會自動波攬著媽咪錫講「 I Love You」,今年暑假,大仔 Ian要到英國搵學校,司馬燕亦未能陪伴同行。但身為母親,亦早已為兒子作好一切準備。

「如果要走,無嘢係可以帶走,我嘅物業唔留俾佢哋,仲可以俾邊個。我只係覺得走嘅時候,做應做嘅事,我會將國內物業變賣,所有錢留俾佢哋,始終今日唔知明日事。」司馬燕說。

割胃後又發現大動脈有惡性瘤,因不能動手術,她要每隔兩星期化療一次,一直認為病人唔應該收埋自己,出席活動的她精神奕奕,唔似病人。

11年,未大病前,已是兩子之母的司馬燕依然好弗。

08年,她帶住兩仔到泰國旅行,她說以前生活太匆忙,旅行會一手揸相機,另一手攞攝錄機,未懂好好享受真正生活。

分享每秒

繼續積極生活,司馬燕的決定,未有向兒子提及過,她希望直至自己離開了,才讓他們知道媽媽的心意。

「我相信路係要自己行出嚟,就算到時先知都未遲,有日我真係走咗,爹哋都會 take care佢哋,我當然希望睇到佢哋畢業、結婚、自己做奶奶,但唔到我去 plan。不如而家實際啲,同佢哋 share每分每秒,其實無論邊個人走咗, life都會 go on,世界唔會因為我而停頓,所以我唔會諗老公將來會唔會再識第二個女朋友,阿仔會唔會同黑妹拍拖,而家只要成個 family齊全就夠。我覺得呢刻最重要係養好身體,爭取同自己愛嘅人一齊。」司馬燕說。

向來愛蒲愛熱鬧,司馬燕去年底孖住老公去睇古惑仔演唱會,到後台探謝天華班。

好友洪羅拔生日,她跟肥媽、周美鳳等一班好朋友搞 P,雖然不能飲酒,但她說:「而家聞咗就等於飲咗。」



鍾意就快D Share啦!