徐錦江的畫作在展出期間，即使有人問價他都堅決不賣，他指不是嫌錢腥，只是要儲畫在北京開他的個人畫展。
探熱針
一代色男 膠劇沙僧 徐錦江作品揚威巴黎
現於無綫黃金檔播，遭觀眾藐爆的膠劇《西遊記》，至今唯一熟口熟面的，只有飾演沙僧的徐錦江！拍過三級片，又試過剝清光拍寫真的徐錦江，其實系出名門，作畫多年，他的作品去年尾在巴黎大皇宮美術館展出，內地郵政部又為他的畫作發行郵票，唔講得笑。
拍到發脾氣
徐錦江一一年拍落的《西遊記》，被無綫當寶斥重金購入，外間反應一面倒 unlike。
「其實我都冇睇過套劇，至於後期特技我哋更加冇份參與，我孤陋寡聞，唔知道係《魔戒》班底主理，只知道張紀中老師好著重要跟足原著，甚至入面取西經嘅路線都同原著所講一樣。我（沙僧）孭住嗰個箱，足足八十斤重，後來減到五十斤，其實套劇製作好認真，拍嘅時候超級辛苦，我拍到發脾氣，第一個想做逃兵唔拍嘅人係我，如果香港觀眾唔鍾意，一定有佢哋嘅理由，如果真係腰斬，作為演員冇得可惜，亦冇辦法。」徐錦江說。
北京開畫展
過去十年，徐錦江長時間在內地拍劇甚少在香港蒲頭，觀眾對他的印象，十居其九是三級港產片中的粗獷色男！但入娛樂圈前，徐錦江其實是畢業於廣州美術學院，更是嶺南畫派宗師關山月的關門弟子，擅長畫作及雕塑。
去年，徐錦江終被賞識，被「世界畫家聯展」邀請，在巴黎大皇宮美術館展出兩張水墨畫。
「上年我開始減少幕前演出，專心畫畫，巴黎大皇宮美術館專誠派人到我北京嘅畫室，揀咗兩張水墨畫去展出，啱啱過咗嘅四月，亦喺巴比松（ Barbizon）展出過另外唔同風格嘅畫，兩次經驗都好難忘。」徐錦江說。
作品受外國重視，也受到內地關注。去年中國郵政部就將徐錦江部分作品發行為一系列郵票、名信片，亦有贊助機構計劃為他開畫展。
「希望可以十月喺北京搞作品展，所以而家更加要全心全意畫畫，暫時都唔會拍劇，一定要儲多啲畫先。」徐錦江說。
|
鍾意就快D Share啦！
|
|
|