掃呢頁CODE去手機

2014年6月27日 星期五

[忽然1周 987] 歌迷會上自爆 劉華停騷追仔 劉華,劉德華,MW,




劉華請咗成班相熟藝人去自己嘅歌迷聚會,個個都著曬波衫好認真。身為資深華仔粉絲嘅前名模歐陽妙芝仲霸到後排中間位,你睇佢幾開心!

媽咪姐

歌迷會上自爆 劉華停騷追仔

呢排晚晚要追世界盃,媽咪姐同 honey真係「捱」到金睛火眼,要煲幾次涼茶降火,但屋企都係多咗兩隻「熊貓」囉!不過攰還攰,星,仲係要追嘅。好似周六、日( 21/22日)劉華一連兩日同來自中港台嘅歌迷聚會,媽咪姐梗要去八嚇!

上周六喺九展舉行嘅「華仔天地」 26周年晚會就好有心思呀!食正世界盃熱潮,用「 Andy World Cup」做主題,除咗萬眾期待嘅劉華之外,仲請咗梁靖琪、梁烈唯同莊思敏等一眾藝人好友著曬波衫做嘉賓,同一班歌迷分組玩遊戲。劉華仲親自落場同大家踢足球友誼賽,嘩!華仔只係掂一掂個波咋,一班 fans已經嗌到拆天!

劉華每次舉行歌迷聚會,例牌唔准拍片影相,只會喺佢同歌迷嘅私密網站上 post相。玩得放心,你睇華仔幾 happy!

九展開波

上周六喺九展搞嘅歌迷聚會食正世界盃熱, set曬龍門俾大家踢波玩遊戲,勁有心思,收$420入場費都抵。

到周日( 22日)嘅盆菜宴,就充滿溫情。劉華除咗喺台上抽獎外,仲逐圍枱走埋去同大家傾 5分鐘偈,一傾就 3個幾鐘!有幾個 fans就同媽咪姐講,話成個歌迷會都好希望幾年無開騷嘅劉華快啲再喺紅館開演唱會,「不過華仔話希望唔成,因為老婆朱麗倩始終都已經 48,所以想呢兩年努力造人,仲話如果呢兩年唔得就會放棄㖭!佢話囡囡依家好精靈,識叫 daddy,自己拍完戲都想休息多啲,搵多啲時間陪老婆同個女。」

啱嘅,劉華都 52歲,好似隻牛咁做咗咁多年,係時候做下其他嘢,好似生仔咁。人生唔應該只得工作嘅!

替父慶生

家庭觀念重嘅劉華,年年帶埋屋企人同佢口中親如「家人」嘅歌迷聚一聚。上周六華仔父母同家姐就著到靚靚去九展,咁啱嗰日係劉父生日,全場歌迷仲唱生日歌同佢慶祝㖭。

整餅冧女

啱啱過咗嘅 5月,劉華親手焗咗個生日蛋糕俾 2歲囡囡劉向蕙,仲將炮製過程 post上私密 fans網,開心 share。個蛋糕係簡單啲,但父愛贏曬!

當然,身為劉天王嘅寶貝女,小向蕙萬千寵愛,收蛋糕都收到手軟。華仔將佢哋放曬上網,嘩!個個都靚到唔捨得食呀!

屯門談心

周日,華仔又去到屯門嘅仁愛堂體育中心同 fans食盆菜,每位$350,開成 50圍,勁!佢鬼咁興奮,喺台上走嚟走去抽獎。落咗台又搵 fans盡訴心中情, nice!

拍片救細路

劉華一向鍾意小朋友,生咗女之後,更加父愛氾濫,佢啱啱拍咗套內地片《失孤》就演一個誓死解救被拐兒童嘅善心老百姓。拍攝期間,華仔同一班小演員玩得好投入,難怪佢咁想生多個

華仔除咗同小演員簽名,仲畫埋公仔㖭!

劉華喺內地拍片好辛苦,但見住一班小演員就開心,只係好掛住囡囡向蕙囉。



鍾意就快D Share啦!