[FACE 368] 大茶飯 阿佘細佬打骰 Eason秘開上海鐵竇 Eason,佘詩曼,阿佘,陳奕迅,MF,

Eason曾自爆患有人群恐懼症，在港只偶然陪老婆夜蒲，今次自己開私竇酒吧，場內裝修有型又夠潮，同香港夜場冇乜分別！想匿埋點玩都得！《蘋果日報》圖片

真面目

大茶飯　阿佘細佬打骰　 Eason秘開上海鐵竇

明星賺錢容易，一個廣告代言閒閒地收過百萬，錢多使唔曬，除了買磚頭投資，最好當然係利用自己個名開鋪做生意，人紅賺到盡。

自嘲近年變咗「巡迴歌手」，不停唱搵埋唔少的陳奕迅，去年靜靜雞首度做老闆，同朋友在上海開高檔酒吧「 K歌之王」，打正旗號借歌神飲歌吸客；甚少做生意的 Eason亦相當穩陣，專登由劉嘉玲的 M2酒吧高薪挖角，請到打滾上海酒吧界多年的佘詩曼細佬做店長。做到冇停手，老婆又掛住周圍跑馬拉松， Eason開個鐵竇輕鬆下好應該啫！

阿佘上月到上海工作兼提早慶祝生日，不過佢冇捧細佬場，反而去咗霆鋒間 Linx玩，霆鋒仲識做送香檳俾壽星女添！網上圖片

近年忙住做巡唱周圍飛，前排又要拍杜琪峯新戲《華麗上班族》，同周潤發及湯唯合作， Eason仲話同湯唯朝見口晚見面對得太耐，有少少愛上對方，搞到老婆徐濠縈即刻宣示主權，「啲人話包包（康堤）似佢（湯唯），又有人話我喺一部戲入面似佢，所以阿臣咪鍾意佢囉！」

64間 VIP房

開騷拍戲密做冇停手，有錢冇碇使的 Eason，除了豪裝過億買樓外，去年更同朋友合資在上海開設「 K歌之王」酒吧，更力邀管理酒吧經驗豐富的佘詩曼細佬做店長，貪佢在當地有強大人脈網絡，兼可以借阿佘之名吸引大批明星客。

位於上海黃埔區金陵東路的「 K歌之王」，走中高檔路線，每人平均消費起碼 500人仔，除了酒吧區外，亦設有卡拉 ok，更聲稱全店使用英國高級音響，又有紅酒雪茄吧及桌球枱，另外全店有 64間 VIP房，啱曬鍾意夜蒲又要私隱的明星客仔，有幫襯過的網友大爆見過阿佘現身，證明阿佘確有親身捧細佬場！

佘店長

同家姐佘詩曼感情深厚的佘弟 Darce（右），在上海酒吧界打滾多年，經驗豐富，難怪連 Eason都要挖角撬佢擔任酒吧店長。網上圖片

「 K歌之王」的官網寫明 Eason係股東之一，但就冇阿佘份。網上圖片

阿佘有捧場

父親早死，姐兼父職的阿佘非常疼錫家人，尤其是與她感情深厚的細佬， 09年 3月其弟 Darce結婚，阿佘亦叫埋好姊妹周家怡到場祝賀，早前出席活動時更唔肯透露細佬近況，「間酒吧我冇份，其他嘢你問番佢」

家姐口密，反而佘弟接受本刊電話訪問時盡顯店長風範，幾乎有問必答，「呢間鋪開咗 1年，我家姐唔係股東。（ Eason呢？）佢係，不過近排佢忙住做巡迴，冇時間落嚟，之前佢嚟開上海都會過嚟坐！（家姐有冇上嚟探你？）佢係我家姐，當然會嚟睇我（點解會去上海做嘢？）我一直都喺上海做嘢，其他唔講喇！」

「 K歌之王」 club

嘜頭招徠：場內印有唔少 Eason頭像做裝飾，慌死有人唔知 Eason係老闆喎！網上圖片

「 K歌之王」面積達 5萬多呎，有大型舞池，亦有錄音室俾貴賓練歌。網上圖片

網上圖片

每逢酒吧搞 party，佘弟（右二）都會以店長身份一齊影合照留念，地位崇高。網上圖片

阿徐巡跑

今年 4月開始內地巡唱的 Eason，暫時已完成了四川及昆明等站，本月中將往廣州、北京、青島等地，一直唱到 12月深圳尾站；而上海站則安排在 10月 11、 12日舉行，到時又可以返私竇 relax下！至於老婆「肯雅徐」則繼續周圍飛「巡跑」，兩公婆都咁忙，要陪嚇 9歲康堤好喎！

拍完《華麗上班族》後， Eason又要北上做內地巡迴。《蘋果日報》圖片

剛去完台灣跑馬拉松的阿徐，興奮同奧運跑手偶像 Joan Benoit合照。網上圖片

上海夜場爭崩頭

上海夜生活好豐富，酒吧夜店開到通街都係，唔少港星都爭住分一杯羮，單係劉嘉玲已有 3間酒吧，其中位於淮海中路的「 M2」，今年 3月多了一個競爭對手，就係謝霆鋒的「 Linx Shanghai」。兩間吧位於同一條街，真正打對台，至於 Eason的「 K歌之王」，則開在 15分鐘步程以外的金陵東路。咁多選擇，真係唔知點揀！

霆鋒主場

今年 3月開張的 Linx，屬高檔酒吧，當日開幕時霆鋒亦有到場支持。

06年已殺入上海開酒吧的劉嘉玲，現時已擁有 3間分店。《蘋果日報》圖片

鍾意就快D Share啦！

下一篇 》