王敏奕自拍完中女劇後，頻頻出騷搵銀。她說：「最近多咗人搵，加咗少少價想快啲還曬去美國進修啲錢。」 12年王敏奕到紐約進修演戲，十幾萬學費由經理人麥曦茵（左）畀住先，𠵱家搵到錢梗係要還畀恩師。
真面目
有前途 準老爺關照 王敏奕升呢電影女一
大台中女劇落幕，但就成功捧紅劇中一班𡃁版女演員，令各少女版成功入屋，其中以𡃁版李麗珍王敏奕最搶，食住劇集個勢最近狂接騷。
王敏奕因拍中女劇兼跟曾志偉寶貝仔曾國祥拍拖引起關注，據知在 9月，王更會接拍由曾志偉監製的電影《兵》，擔正做「女一」，話冇未來老爺「睇住」都冇人信。
中女劇播完，除令一班過氣中女翻身，亦令一眾少女版冒出頭。當中以 22歲𡃁版李麗珍王敏奕第 1個跑出，除了有演技，她更因與劇中監製曾志偉兒子曾國祥拍拖，而被傳受未來老爺特別「關照」，於中女劇戲分大增。不過上年中女劇開拍時，王並未同曾國祥拍拖，其實並冇明顯利益輸送跡象。
9月拍志偉新戲
但冇可否認，中女劇播出後，王敏奕食住個勢兼曾志偉「新抱仔」身份而人氣急升。除密密接騷，據知大台一眾監製都有意搵她拍劇，可惜最終都被王敏奕經理人麥曦茵推掉，原來王敏奕現時除於 J2主持節目《山系女行 Yama Girl》外，稍後便要全身投入電影工作。
王敏奕現正趕拍其經理人兼導演麥曦茵的新電視電影《曖昧不明關係研究學會》，踏入 9月更會拍準老爺曾志偉監製的新戲《兵》，導演亦係她的經理人麥曦茵。
「真係咁啱囉」
對於未來新抱，曾志偉曾公開表示：「個仔開心就得，佢同邊個拍拖，我冇意見。」但據知準老爺對同曾國祥拍拖半年的王敏奕相當有好感，知情者說：「個女仔做戲好又乖，最緊要個仔拍拖後成個定曬，志偉自然想幫下佢（王敏奕）」
週日（ 8日）王敏奕出席東港城世界杯活動，記者向她提起 9月開拍新戲，王敏奕表現得相當興奮，「嚟緊會拍一套講觀音兵嘅電影叫《兵》……。」不過當記者提起《兵》係由曾志偉做監製時，站在王敏奕身旁的經理人麥曦茵即搶答：「其實兩年前已構思喇，嗰陣咩事都未發生，咁真係咁啱囉。」
好帶挈
中女劇入屋，令一眾少女版演員齊升呢。除王敏奕、陳嘉寶一星期執幾個騷外，就連舞台劇演員、少女版江欣燕賴慧玲都多騷接，她說：「以前一個都冇，𠵱家已經有 3個。」
|
鍾意就快D Share啦！
|
|
|
