中華廚藝學院男更衣室上演一場復仇記。 Jacky（右一）嘲笑同學阿敏（右二）衣著似妓女，遭大班同學圍毆，被打至下跪求饒。 Jacky接受本刊訪問時，仍堅稱無辜：「無講過點認啊？」
新聞耳目
中華廚藝學院二十抽一 恐懼鬥室
中華廚藝學院男更衣室一角，上演了一齣「恐懼鬥室」。
少女阿敏（化名）因為某男同學一句說話，吹雞廿多名同學進行復仇計劃。一班人輪流用冷熱水淋他，又盡情大力掌摑，再用衣架狂抽，更拳打腳踢。儘管男生遍體鱗傷跪地求饒，阿敏情緒反而更加失控，使出終極酷刑，舉起鐵枝狠狠地擊中男生眼角。
樣子甜美、身材姣好的阿敏，是父母心目中的乖乖女，同學間的萬人迷。萬千寵愛在一身，卻受不了嘲笑謾罵。
自卑空虛的心靈，是一個恐怖的計時炸彈，一旦引爆，殺傷力驚人。
酷刑最終在法庭落幕，廿多名在場的同學中，只有四名有份出手打人的同學被起訴。他們分別被控普通襲擊、襲擊致造成身體傷害及刑事恐嚇等罪名。
站在犯人欄內的案件主腦阿敏，變得懦弱怕事，每次上庭都低頭啜泣，不敢直視法官，與其向同學行私刑當日判若兩人︰「法官大人，我知我今次做錯咗！我會承擔責任，希望你今次俾次機會我。」她聲淚俱下求情，但遭裁判官怒斥：「將來喺社會你會遇到好多呢啲咁嘅人，講更加難聽的說話傷害你，大家都試過，但唔一定要用呢啲方法解決！」阿敏邊哭邊點頭表示明白，最終獲輕判十八個月感化，其他同學亦被判感化。
不過，阿敏步出法庭立即故態復萌，牽著男友的手有說有笑，急不及待問男友要煙。身旁的父母沒有半句怪責，只是默默等候阿敏抽煙。
「我做咗我會認囉，但正常一個女仔夏天著套咁嘅衫都俾人話係雞嘅，我都無嘢好講。我真係好嬲囉，嬲到無曬理智！」阿敏事後接受本刊訪問，直言毫不後悔當日所為。但搞到惹上官非又留案底，只不過抵不住同學嘲笑她︰「乜著到咁似雞！」
學校風頭躉
現年十六歲的阿敏，中二時因為成績太差而無法升讀中三，但她對烹飪情有獨鍾，入讀中華廚藝學院的酒店管理課程。
皮膚白皙的阿敏嬌小可愛，性格豪爽，很快成為學校風頭躉。同學珊珊指每當同學不開心，阿敏都會陪伴安慰，有時同學兼職工作，她亦會等對方下班，等上幾個鐘也毫無怨言，「你會 feel到佢係真心想同你做朋友，而唔係酒肉朋友。因為佢對人好好，所以我哋好鍾意佢。」
珊珊亦盛讚阿敏有「雷氣」，朋友開聲永無「托手踭」：「佢有個朋友衰販毒，差啲累到佢。因為阿敏幫手聽交收毒品嘅電話，點知係差佬放蛇，拉咗阿敏，阿敏都唔知發生咩事。不過佢話幫朋友無計，好彩最後無事。」他們心目中的「義氣」，就是不分是非黑白也「兩肋插刀」，就像今次的大報復一樣。
乜佢著到咁似雞
阿敏接受本刊訪問時，大方換上當日被嘲諷似妓女的衣著，說︰「一啲問題都無！」又拿出 Jacky的證人供詞，直指 Jacky當日立即報警，事後卻假惺惺跟警方稱不想把事情鬧大，只是被母親逼供才報警追究，故至今仍然憎恨 Jacky。
今年四月十四日下午，阿敏身穿黑色緊身背心、牛仔喱士短褲、腳踏白色波鞋在學校走廊行過，鄰班同學 Jacky（化名）見狀掩嘴竊笑，並指手畫腳說：「嘩，乜佢著到咁似雞嘅！」此話觸動阿敏神經，立即向男友 Otto（化名）和同學哭訴告狀。
Jacky事後接受本刊訪問時坦言被屈，「由頭到尾我只係講過『肉酸』兩個字，係佢哋平時唔妥我夾埋一齊做我！」據珊珊所講，身材高大健碩的 Jacky，極不受歡迎，經常「𢱑煙食」，又常以練習泰拳為由，將同學當沙包打。他又吹噓自己「跟大佬」，親戚是西九龍督察，「黑白兩道玩曬」。
Jacky犯眾憎，但阿敏一直以順利畢業為前提，勸同學息事寧人。但今次 Jacky膽敢惹怒眾人小甜心，很多同學也為她抱不平，群起計劃好好教訓 Jacky，「想睇佢點折墮！」
廿人行私刑
翌日放學，阿敏男友 Otto召集廿多名同學到男更衣室懲處 Jacky。 Jacky甫入更衣室便覺勢色不對，但已無路可逃， Otto大聲斥喝：「你係咪話我條女似雞吖！」又問：「仲有邊個唔妥佢嘅？」全場起哄附和，情緒高漲。
後來阿敏來到男更衣室，一見 Jacky便不斷哭泣。轉眼間阿敏突然變了另一個人似的，喝令 Jacky跪低，又命人掌摑及拳打腳踢，再一人一杯冷水和熱水向 Jacky兜頭淋，在男更衣室「有咩攞咩」來打 Jacky，好端端的衣架也被扭成藤條，狂抽 Jacky至他道歉為止。
一場公審演變成集體欺淩，就算 Jacky屈服跪低，但阿敏仍未收貨，更換上當日被嘲似妓女的衣服，撕破喉嚨大嗌：「我係咪好似雞啊！係咪啊！」
阿敏愈說愈激動，身高一米五三的她，隨手拿起幾乎高過自己的鐵枝，打落 Jacky身上。 Jacky被擊中眼角，當場血流披面，「當時已經無人阻到佢，有人試過掉開支嘢，但阿敏又發咗癲，好似隻狗咁衝埋去執番，完全失控！」珊珊形容當時阿敏完全陷入瘋狂狀態。
最後 Jacky送院，眼角縫上四針，事後驗傷證實身體有多處傷痕，後腦及雙頰都被打腫。
父母溺愛
因為一句嘲諷而發狂失控，旁人看來微不足道的小事，但對習慣高高在上的阿敏，卻是一生最大的羞辱。
阿敏廣州出生，兩歲隨母來港與父親團聚。家境並不富裕，父親是裝修師傅，母親做散工幫補家計，一家三口住沙田圍公屋，父母對獨生女阿敏，由細到大有求必應。阿敏每星期有五百元零用錢，若然不夠，父親自動加碼。縱然阿敏無心向學，十三歲開始食煙夜蒲，父母也只是「話佢兩句」，從不打罵。
阿敏早熟，自小不乏裙下之臣，珊珊形容阿敏「男朋友多到十隻手指都數唔曬」，「佢真係好多『兵』，十三歲開始拍拖就無停過，啲仔又好錫佢，鍾意佢夠可愛！」阿敏有一名要好男友阿源，但二人因為小事鬧分手，阿敏故意與同學 Otto拍拖氣走阿源。誰不知當日逞英雄替阿敏出頭的 Otto，被捕後把一切罪名推在阿敏身上，氣得阿敏分手並指證 Otto，而阿敏亦與阿源和好如初。母親亦不惜與阿源打成一片，還讓男友搬來一同居住，只是希望綁住女兒在家，總好過在外學壞。
為家人煮餐飯
阿敏人前表現得像公主般驕縱，但一提及父母和男友，便變回庭上的知錯小女孩：「我老豆今次係咁鬧我，話我衝動，但我一句都無頂到，因為我知自己做錯咗。我喺入面時阿媽日日都有嚟，日日都喊。」
阿敏直言知道父母寵愛自己，不想辜負雙親。阿敏尚算懂事，在麥當勞兼職賺零用錢。她因為本案而被踢出校，但坦言會朝著廚師的夢想進發︰「我能力太低喇，又唔識英文，出到社會都好難搵嘢做，我都想幫手養家。」男友阿源亦慨嘆：「其實我哋同時下年輕人好唔同，我哋好黐家好少出去蒲，又唔係邊青嗰啲。」阿敏已報讀了明愛甜品課程，現在是感化期間，每日只出門一次，不怕汙糟辛苦，到街市買餸煮飯，總會借機問父母是否回家吃飯，「我可以煮定飯等佢哋返嚟食，咁我無嘢做吖嘛！」
十六歲的阿敏，有一個心願，就是每天窩在心目中的「安全屋」，為家人煮飯。
|
鍾意就快D Share啦！
|
|
|