陸駿光陪未婚妻揀婚戒
現年36歲的「港版半澤」陸駿光與港視藝員合約將於明年4月屆滿，雖然前途未卜，幸好身邊愛侶未有嫌他窮，對他不離不棄。早前陸駿光向比他年輕十載的圈外女友茵茵（Sherraina）求婚成功，決定明年8月拉埋天窗。陸駿光最近忙拍港視新劇《風雲》，日前抽空與未婚妻去銅鑼灣揀婚戒。
下午三時許，陸駿光與茵茵手拖手走入銅鑼灣一間日本婚戒專門店，兩人在飾櫃前看了一會，便有售貨員上前接待，並拿出十幾隻婚戒供兩人選擇，見陸駿光細心為未婚妻試戴上手，似預演交換戒指甜蜜一刻。現場所見，陸駿光最後揀了一隻無鑽石的簡單款式，而茵茵亦只揀了一隻碎鑽戒指，似乎是預算所限，埋單五位數。之後兩人在時代廣場一帶閒逛，除在海賊王巨型展覽公仔前留照外，還買了兩串魚蛋醫肚，十分慳家。
■陸駿光為茵茵試戴戒指，似預演交換戒指甜蜜一刻。
飛機暈倒即求婚
記者昨日致電陸駿光，他透露與女友拍拖兩年幾，感激對方沒有嫌自己窮，他說：「佢陪我度過好多日子，上年6月我哋坐飛機去峇里，佢突然喺飛機上暈倒，嗰刻我好想照顧佢，佢醒番我即刻求婚，佢係青住塊面點頭應承。」他並計劃揹背囊去歐洲度蜜月，他笑說：「想體驗寄居生活，茵茵唔介意亦好捱得，佢都唔使要奢華事。」雖然去旅行要慳錢，但陸駿光仍無時無刻錫住未婚妻，他說：「遲啲先影婚紗相，因為𠵱家太熱，怕未來老婆辛苦。」問明年4月約滿後去向？他說：「當然希望港視爭取發牌成功，但如果真係冇得續約，我會去考健身教練牌，為未來生活打算。」
採訪：盧妹
攝影：沈健程
■陸駿光比女友大十年，但兩人溝通沒有隔膜，還讚女友不追求奢華。
■陸駿光拖住女友茵茵行銅鑼灣，在街邊拮魚蛋，拍拖好慳家。
|
鍾意就快D Share啦！
|
|
|