同新歡約會飲夜茶，欣欣煙駁煙，反而鬍鬚男一支都冇食。
探熱針
棄嫩男 江欣燕攬啜鬍鬚佬
去年與吳積遜結束十二載夫妻關係的江欣燕，多得身邊好友群策群力撥大葵扇，令恢復單身不到一年的她，火速撻着家族做糖果生意，有「嫩版伊健」之稱的 Kenneth。
年齡相差十年，無阻姊弟戀發展，但「重新上市」的欣欣，勢估唔到自己 46歲依然有市場。上週五（九月五日）晚，欣欣身邊已經換畫，同一名中年鬍鬚男，在圓方酒吧談心，情到濃時更當眾嘴嘴。
嫩男與中佬二選一，欣欣終於搵到 Love。
轉移視線
婚姻破裂，加上十九歲愛貓 Tasha證實患上眼癌，面對雙重打擊，令欣欣情緒波動，身邊好友擔心不已。
「 Tasha兩隻眼完全盲晒，欣欣已經好傷心，每次講起隻貓就喊，我哋作為朋友，都想佢開心；過去一年不斷介紹男仔佢識，希望佢拍吓拖，有其他嘢分散注意力，心情會好番啲。」欣欣身邊好友說。
朋友坐言起行，欣欣單身不足一年，已撻着比她年輕十歲的 Kenneth。
「 Kenneth高大又靚仔，成個鄭伊健咁款，其實欣欣同佢相處完全冇代溝，不過細十年咁多，佢始終有顧慮。」
唔煙唔酒
已經四十六歲，外表已非欣欣的擇偶重點，而在朋友刻意安排的「相睇」聚會中，其中一個五十餘歲的鬍鬚男，亦早對欣欣心動。
「聽講個男人幾好，平日唔煙唔酒，最緊要係大家年紀差唔多，話題同思想比較接近，二選一，欣欣最終都係決定同 Kenneth做番普通朋友。」知情人說。
上週五（九月五日）晚十點，欣欣同鬍鬚男在尖沙咀圓方平台露天酒吧拍拖談心。週末日子，周圍都係人，兩人未有太親密，只見欣欣一邊抽煙，一邊與對方傾偈，而鬍鬚男亦如傳聞中所講，整晚不煙不酒，只點了一杯檸檬梳打，同女友兩份飲。
溫馨嘴嘴
到接近十二點，客人走得七七八八，兩人開始放下戒心，鬍鬚男兩度主動錫向女友肉嘴，雖然欣欣照單全收，但始終是公眾地方，只見欣欣錫完下意識四處張望，似怕被留意到。
夠鐘閂門，職員上前要求埋單，鬍鬚男主動找數。俾完錢，兩個並未有即時走，反而愈坐愈埋，鬍鬚男偶然會伸手摸摸女友大髀，欣欣亦冧笑回禮。
凌晨十二點半，職員再次上前示意要收鋪，欣欣於是繑實新歡臂彎，行去攞車，其間鬍鬚男偶然會扶住女友腰間，中年戀愛，始終比較含蓄。
希望在明天
46歲江欣燕，失婚一樣有市場，嫩男、中佬爭要搶，其實圈中亦有唔少失婚女，再婚反而更幸福。
|
鍾意就快D Share啦！
|
|
|