Taomy將客人送來的殘舊電結他，印上迷彩圖案，即變得十分新淨。
看似簡單的步驟，但其實要印得靚，一定要將溫度和濕度控制好，做得不好，要將已印了的水印磨走或上底色，重新再做。
壹盤生意
大男人潮玩「水轉印」
「男人的浪漫，絕對不只是一碟豆腐火腩飯。」
這是今期主角、彭金桃（ Taomy）的心聲。
他本來做建材 sales，月入二十多萬，但內地建材公司頂爛市、爭生意，過去一、兩年，他的人工跌到只有一兩萬。堂堂男人，不但要開始捱火腩飯，最難受是：「四十幾歲被老闆當眾鬧，覺得好𤓓﹗」
人到中年，決定轉行。
今年初開設「 Alphalokgraphics」，專做「水轉印」，即透過水壓將圖案印在硬物上。
他把不同類型的迷彩圖案，印上 iPhone case、頭盔、甚至呔軨及車尾翼。像一個價值一千元的頭盔，他印上迷彩圖案，能賣四千。
銷售對象，正是和他一樣──要面的男人。
開鋪三個月，月賺三萬，距離目標尚有距離。
然而，這行已暴露了三大問題，由本刊找過來人為他指點迷津。
走進 Taomy的工作室，放有一部注滿水的「水轉印」機器； Taomy正把一塊膠膜放在水面，再淡定地把四個白色手機殼，貼着膠膜。一秒後，利用水壓，四個手機殼已染上了迷彩圖案，就像魔術般。 Taomy笑說：「你唔好以為好容易！」這過程就像撈金魚，太快太用力，紙膜會穿；太慢，紙膜則會在水中溶化。「之前仲有好多功夫，先將不須染色的手機殼部分貼上貼紙，免得到時染埋色。又要將手機殼噴上底色，同時要剪膠膜，將它放在水面，噴上活化劑，讓膠膜在水中溶化。印完又要洗乾淨，噴保護漆。」完成整個過程，要一個半小時。
Taomy現時印得最多是迷彩頭盔，印一個可賣四千元。三十四歲的客人 Andy，就預訂了一頂頭盔。採訪當日他穿上迷彩裝，被問到是否剛剛打完 war game，他尷尬地說：「唔係呀，係我自己都鍾意咁著。印咗我最鍾意嘅數碼迷彩，出面無得賣，勁似美國軍用頭盔，四千蚊好抵呀。」他又買下一個數碼迷彩 iPhone 6手機殼。另一客人、 band友 Johnny說：「我就喺結他上印多地形迷彩（ MultiCam），三千蚊！之前喺大陸印，佢哋印到有窿都照出貨。」現在鋪頭七成營業額，都是來自印製 war game用具；兩成來自汽車組件，一成來自散客，如印眼鏡或者手機殼等。開鋪三個月，已有三萬盈利，但 Taomy不滿足。他把店名改做「 Alpha」，正是希望做第一。但這刻他發現，要把這盤生意發大，有不少問題：
水轉印過程
問題一 人手做 發唔大
內地也有做「水轉印」的工廠，記者曾查詢，由於他們以機器做，只接一千件以上生意；而 Taomy的生存空間，就是單做一件貨都接。「因為我用全人手做，我肯定每一件由我印，賣出去的貨都是完美。」不過，他得一對手，又印得幾多？ Taomy指每做一件貨都要兩小時，按照現時銷售額，一雙手尚能應付，但他擔心客人愈來愈多時，就必須增加人手，這又衍生另一個問題，他說：「就算請人，我都只係敢請親戚，唔敢請外人，怕佢學識自己去開鋪，我都唔知點做好。」
Prudence提議 請退休人士
Chocolate Rain創辦人 Prudence，設計的 Fatina公仔，賣點是每件都是人手製，由一間小型工作室，發展成品牌，歐洲亦有銷售點。她亦曾面對怕被抄橋的問題。
「如果怕給人抄，就唔請人，等同於斬腳趾避沙蟲，永遠冇得發大，到時出貨的速度跟不上，一樣被市場淘汰﹗親戚幫到一時，幫唔到一世。我部分工序會請退休伯伯和姨姨，因為他們已經無衝勁再創業，也不會記得太多商業機密，可以叫他們做些花時間但簡單的步驟，如噴漆、黏膠紙。如生意額未足夠請長工，人工可以斷件計！當生意上軌道後，有本錢買多部機器時，可考慮找社企幫手，並且要教他們如何製造，社企不會偷橋、另起爐灶。因為幫手做的都是一些天生有缺陷的人士，可以幫到人，又幫到自己。」
問題二 機器平 門檻低
水轉印靠的是一部叫轉印缸（ Dip Tank）的機器，可控制水溫及隔塵等，數年前在美國、台灣開始流行，一部機器入場費五十萬，門檻甚高，故當時香港幾乎無人做。但隨着科技發展，機器愈來愈平， Taomy現時用的機器，由美國運來，總投資才三十萬。他透露：「其實喺家中做水轉印都得，就係買部手提冰箱，一部才八百蚊。」但由於不能控制溫度，印到的成功率較低、物件尺寸也有局限，故只能「柴娃娃」玩玩。然而相比之下，門檻已較數年前低，容易吸引競爭者。
今年初，當 Taomy仍在家接 freelance水轉印生意時，已有一間水轉印店鋪在元朗開業，價錢每呎三百元起，每呎收費較 Taomy便宜一百元。現在全港只有兩間鋪，尚可有錢齊齊搵，但面對之後的競爭者，就很難說。 Taomy擔心地說：「呢篇報導出街後，我都預咗會多人做水轉印，亦擔心競爭激烈，自己無得賺。」
Ivan提議 個人化 做大個餅
HK 3D Print Centre的老闆 Ivan，去年引入日本 3D打印技術，用百多萬買入機器幫客人拍照做立體公仔，但不久已出現了不少「跟風者」，但生意額有升無跌。
「放心，一定會有人抄 Taomy，好似我之前咁。但換個角度想，有競爭者，意味個餅大咗夠吸引，所以度橋不怕天馬行空一些，鍊贏對手！最簡單，就是令你的服務更加個人化，如搞上門收件服務，有客人想將大型傢俬印花紋，你幫佢哋運送；又可以學我一樣，推出套票才有某類服務，及折扣優惠。可以嘗試開興趣班賺外快，教些簡單的水轉印步驟，當然要保護好機密，只分享一些無傷大雅的小要訣，做完學生自然會放完成品在網上，免費幫你做宣傳。這又增加大家對水轉印的認識，長遠對生意會有幫助。
問題三 要求高 報銷大
除了機器，每次印貨需要用到的膠膜，由於 Taomy要求高，成本亦頗貴，入貨價每呎需要一百至六百元，視乎花紋而定， Taomy說：「因為是美國進口貨，所以會貴些，但質量好好多，唔會咁易刮花。」連 Taomy的手工，印製每件貨，收費每呎四百至一千多元不等。如印一個迷彩頭盔，須用約兩呎乘兩呎膠膜，連手工收費達四千元。每做一件貨，溫度、膠膜溶化的時間和濕度都重要，其中一項「衰咗」，膠膜就要報銷， Taomy笑說：「雖然已經印咗幾年，到而家印十次都衰四次。」報銷機率頗高。記者上淘寶看過，這些膠膜，竟然五蚊一呎都有， Tamoy解釋：「佢哋係無 license，只係複製，質素差，易刮花。」
為了求質又求量，他說：「最近同永高行 war game用具店、 OTG航拍攝影機、兩間車行合作。我會喺佢哋店鋪放上印有花紋的陳列品，例如有客人想買航拍機，而又想喺上面印花紋，就會轉介客人給我。」
Jessie提議 一定要堅持
包車公司 Colours Concept，老闆 Jessie用不同顏色的薄膜貼紙覆蓋車身，包車薄膜貼紙一架成本要八千元，佔總成本一半左右，到現在營業額逾五十萬，堅持不降低質素。
「水轉印同我哋有個共同點，就是成本費貴，佔了手工費一半，浪費一張已經賺少好多，惟有考慮增加手工費。我哋做呢行靠口碑，識貨的客人覺得，價錢貴些不是問題。要做，就做對生活品味有要求的客。就算之後競爭大了，也不要和其他人鬥便宜，反而是維持高價。我唔認同佢同車房合作，這個產品在香港認受性未夠高，車房唔會花力氣幫你推。車行本來可以賺多一筆噴漆錢，唔會無辜讓你賺多一筆。唔好依賴人，最好靠自己﹗」
老闆：「我想買番架 Benz﹗」
Taomy本來是建築材料 sales，但由月入二十萬到近年只有萬多元，「我做咗 sales二十年，到而家四十幾歲，先要睇老闆面色，壓力大到瞓唔到！」風光時，他買過三隻勞力士深潛手錶，駕五十萬的豐田日本版七人房車，「不過最近賣咗架車，換架十萬元的二手平治。」他無奈地說。三年前，他從網上發現用手提冰箱，可以玩水轉印，於是花心思鑽研，間中在網上接單。他說：「唔做唔知，原來有好多男人鍾意呢樣嘢，就算網上接單，都有人幫襯。」人到中年，才決定正式創業，他有他的夢想：「希望盈利可以去到三十幾萬，搬去一千多呎的工作室，同買番部新款嘅平治！」
營業資料（ 10/14）
營業額 $100,000
入 貨 $35,000
人 工 $15,000^
雜 費 $10,000
租 金 $6,500
盈 利 $33,500
^老闆人工
開業資料（ 07/14）
租 金 $18,000^
器 具 $350,000
材 料 $100,000
雜 費 $20,000
裝修費 $30,000
總 共 $518,000
^兩按一上
|
鍾意就快D Share啦！
|
|
|
