阿刨被問到同仙姐關係時，阿刨表現得驚青，眼珠不停轉動。
探熱針
師徒反目 唔拜任劍輝 龍劍笙老點白雪仙
粵劇名伶龍劍笙（阿刨）為紀念恩師任劍輝逝世廿五周年，專登由溫哥華返港，重踏台板演出《任藝笙輝念濃情》折子戲，阿刨公開表示每場演出，都會預留對正台中間靚位俾師傅白雪仙（仙姐），但由上星期四（十一月十三日）開鑼，至本週二（十八日），仙姐一直無現身捧場。
據知，去年阿刨因為講大話呃師傅，欺師大罪，導致師徒關係決裂。
稱病劈炮
白雪仙與龍劍笙師徒關係決裂，事件要追溯到去年初，其時，仙姐決定在任姐（任劍輝）逝世廿五周年舉行紀念活動，曾要求在加拿大的阿刨，今年一月返港同老拍檔阿嗲（梅雪詩）演出《再世紅梅記》，為「任白慈善基金」籌款。
「阿刨最初都話師傅叫到都會做，連價錢都傾埋，但仙姐想幫基金籌多啲錢，叫阿刨考慮減價，阿刨話諗吓，點知轉個頭就話舊患唔舒服辭演，仙姐唯有臨時搵陳寶珠頂上。仙姐當時有為呢件事唔開心，但好快都冇乜嘢；其實嗰陣老人家唔知道啫，阿刨唔想一月返嚟，係因為佢同人哋傾緊十一月會返嚟演出，如果年頭做完年尾又做，佢唔驚影響賣飛，係怕體力應付唔嚟。」知情者說。
當場斷正
先有辭演事件，師徒關係進一步惡化，導火線是去年仙姐曾親自飛過去溫哥華拜祭任姐，到埗後，她打電話約埋長住當地的阿刨一齊去，但對方聲稱她人不在加拿大。
「好邪㗎！即晚仙姐就喺當地一間餐廳撞到阿刨同 Emily（阿刨同性密友）一齊，當時氣氛好尷尬，仙姐好嬲，但佢當無事發生；講完大話仲要斷到正一正，阿刨𤓓爆，但都硬住頭皮行去同仙姐打招呼，仙姐亦好有禮貌，照同佢講嘢。其實兩個徒弟之中，無論任姐抑或仙姐，最錫都係阿刨，佢竟然咁樣講大話，仙姐真係好傷心。」
阿刨稱病推仙姐，卻答應與丘亞葵合作搞《任藝笙輝念濃情》演出紀念任姐，被瞞的仙姐心裡有數，所以當她被問到阿刨未能演出由她監製的《再世紅梅記》會否有遺憾時，仙姐一臉不悅說：「唔知道！要問阿刨先知。」
今年九月，阿刨由溫哥華返港為十一月的演出做準備，亦有到仙姐位於跑馬地寓所探望師傅兼補鑊。據知，當時仙姐反應冷淡，兩人打完招呼後，便再沒有對話；阿刨無癮，在仙姐屋企逗留了唔夠半小時便離開。
驚青回應
上星期四（十三日）阿刨開鑼演出，但連日仙姐一直未有捧場，被問到激嬲師傅一事，阿刨表現得相當緊張。
記者：壹 龍劍笙：刨
壹：今次開騷事前有冇通知仙姐？
刨：唔係通知（突然退後兩步，神情驚恐），我哋唔敢咁樣講……
壹：仙姐乜嘢原因呢幾日都冇嚟睇你？
刨：佢（仙姐）有講過佢一有時間就嚟㗎。
壹：之前仙姐去加拿大拜任姐，叫你去但你冇去，所以激嬲咗仙姐？
刨：唔係呀……我唔知，唔知呀。
壹：嚟緊會唔會見到仙姐。
刨：廿五號會一齊去君悅一個懷念任姐嘅活動。
頭號愛徒
現年 70歲的龍劍笙（阿刨）， 16歲開始學藝， 60年入選任白組成的「仙鳳鳴劇團」，成為任白門生， 68年首次有機會與師傅同台演出《白蛇新傳》。直到「雛鳳」成立，被視為主帥的龍劍笙反串男角，飾演文武生深入民心，令她在同輩中成功跑出。
92年，阿刨宣布暫別舞台移居加拿大，在師傅白雪仙要求下，阿刨夥拍拍檔梅雪詩復出多次，吸金力超強的她於 07及 08年重演《帝女花》場場爆滿，不過盛傳酬勞有人以蝕錢為由扣起，令阿刨大感不滿，自此師徒關係開始不如前。 09年，一眾愛徒出席任劍輝 20周年逝世紀念活動，獨欠任白頭號愛將阿刨，有指就連師傅白雪仙生日，她亦未有致電祝賀，師徒感情逐漸變淡。
反面無情
人情紙咁薄，利字當前，無論任何關係，都可以因為一個錢字，反目成仇。
|
鍾意就快D Share啦！
|
|
|
