本月五日， Serigo陪 GiGi到尖沙咀出席飯局，佗 B五個多月的她雖然腳有水腫，但精神不錯。
探熱針
梁詠琪老公 停工做陪月
結婚三年，梁詠琪老公 Sergio錫老婆錫到燶， GiGi佗女五個多月，大肚婆自嘲一孕傻三年，變得沒有記性，幸好有老公充當秘書，事事提點；她還考慮不請陪月，到時由老公落場，自助湊 B。
為此， Sergio原本計劃請一個月假做陪月，「講數」後，假期雖然要折半，但卻得公司體諒，彈性安排工作。你好我好！
冇薪假侍妻
佗女五個多月的梁詠琪，預產期明年三月。
「老公全程都好參與我懷孕成件事，所以想過唔請陪月，自己親力親為，老公亦希望同公司請假幫手，身邊啲朋友都覺得我唔可能唔請陪月，但我哋實在唔習慣屋企多個人。」
據了解，由於 Sergio手上有不少工作 project，對他考慮申請冇薪假陪老婆坐月，亦令公司大頭痕。
「 Sergio喺雀巢牛奶公司負責開發新產品，雪糕、咖啡都係佢嘅工作範疇，嚟咗香港兩年幾，公司同事初時都唔係好慣佢嘅西班牙人 style，後來慢慢磨合，佢又肯學講啲簡單廣東話，慢慢同大家拉近距離，跟同事關係算 OK。其實佢有唔少大假，但之前陪老婆已經放得七七八八，今次仲想申請成個月 no paid leave（冇薪假），但佢 hold緊幾個新 project，出年年初嗰段時間會好忙，好難行開，所以佢改咗請一至兩星期假。」知情人說。
公司體恤
「其實 Sergio未正式向公司申請任何假期，因為明年度嘅假期申請未開始。不過佢公司知我出年生，所以都有同 Sergio商量點樣彈性分配佢嘅 job，等佢可以抽多啲時間陪我同 BB。」梁詠琪說。
佗女至今已重了二十多磅，因為雙腳出現水腫，家中有八成的鞋都穿不下； GiGi更自爆大肚以來最大的改變是記憶變差，要老公提醒和監控她的飲食，仍會偷吃朱古力的她日前因為食錯嘢肚痛，令 Sergio嚇餐死。
照顧大肚婆， Sergio採取人釘人方式。 GiGi到尖沙咀跟張智霖、劉心悠等出席飯局， Sergio做跟得老公，兩公婆不時在人前晒恩愛，當眾摸面，勾住手指尾行， sweet爆！
七個月先買床
Sergio希望 GiGi保持適當運動，二人定期去行山，連腹中 B女，亦同老豆一樣好動。
「醫生話 BB對腳比同週數的 BB長，可能佢對腳比較長， feel到佢喺裡面游來游去。」 GiGi說。
產前準備，包括買定嬰兒用品。
「長輩話要等到七個月先好買 BB傢俬， BB衫都要忍手，只係睇冇買。」至於 BB女的名字， GiGi說：「我同老公會先揀好三個名，等佢出世後同佢玩一個遊戲，睇佢對邊個名有反應就用嗰個。」
肉緊星爸
Sergio愛妻心切，攞假為 GiGi做陪月，圈中還有不少星爸均是愛妻號，視迎接小生命為大 project。
劉德華搬屋鎖𨋢
朱麗倩佗囡囡劉向蕙時，劉德華豪花千萬豪裝加多利山獨立屋，打造妻女安全屋。由於加多利山新竇被傳媒踢爆，劉德華一度舉家搬到月租十七萬的尖沙咀服務式住宅聽濤閣暫住。為加強私隱度，大廈給予劉華特權，出入會有專人負責「鎖𨋢」，不用同其他閒雜人共用升降機。
|
鍾意就快D Share啦！
|
|
|
