熱爆娛樂: [壹週刊 - 1290] 食女斷正　周家蔚發爛　洪天明守行為贖罪洪天明,周家蔚,M1,

2014年11月27日星期四

[壹週刊 - 1290] 食女斷正　周家蔚發爛　洪天明守行為贖罪洪天明,周家蔚,M1,

探熱針

食女斷正　周家蔚發爛　洪天明守行為贖罪

洪天明跟周家蔚結婚兩年，一直有女埋身，經常留在內地開工的他，跟內地索模及性感女約會先後斷正，已再度懷孕四個月的周家蔚，雖然口講相信對方，但私下對經常玩失蹤的花弗老公，十分不滿。

據知，上月中在內地開工拍電視劇《潮拜武當》的洪天明，遠離老婆視線範圍又再作反，跟劇中一班妹妹仔玩到癲，其間更偷召內地女友前往探班，在港養胎一樣收到風的周家蔚，忍唔住跟老公鬧大交。返到香港，洪天明全天候陪老婆，戒夜蒲甚至唔玩微信，暫時斷絕其他野花聯絡，守行為補鑊。

由朝陪到黑

上週五（十一月二十一日），在內地拍劇作反，自由自在三星期後，洪天明終於返屋企交人。早上十點開始，揸住百萬積架新車載老婆到太子道食早餐，落車後跑去幫老婆開車門，再拖實入餐廳。食完再送老婆到彌敦道睇牙醫，一個鐘後離開診所，洪天明跟住揸車到九龍城買日用品。泊好車，摩打腳到街巿掃貨再去銀行，周家蔚留在車上小睡；唔夠半句鐘，完成任務的洪天明折返，先走一轉紅磡，才返油塘屋企。

在家一粒鐘，兩公婆再孖咇外出，過海到上環睇寫字樓租盤後，再揸車落灣仔；原來當晚約好了佘詩曼、曾志偉、錢嘉樂夫婦等食飯，之後一齊過伊館睇阮兆祥做棟篤笑。散場後，原班人馬到新光食消夜，全日陪老婆活動。

上週五，洪天明載周家蔚去食早餐，落車後即兜向左邊，幫老婆開車門。

回港謝罪，食完早餐，洪天明做阿四去九龍城買廁紙及日用品。

連走幾場，周家蔚攰到要在車上瞓覺補一補。

講心事爆喊

返到香港變廿四孝老公，事出有因！早前在武當山拍劇期間，無王管的洪天明變甩繩馬騮，對劇中一班妹妹仔十分嗒糖，幾乎個個都啱，周家蔚收到風後，發晒爛渣嘈大交。

「天明好鍾意黐埋班妹妹仔玩，玩到好癲，有時飲大幾杯就捉住人哋講心事，仲會講到喊，話自己同老婆近排有問題好唔開心。大家安慰佢，提議佢帶老婆出去玩，天明又話兩個人溝通唔到，又話自己連老婆電話都唔聽。後來啲女仔都覺得天明只係製造話題『搵食』，大家都自動閃開。」知情者透露。

妹妹仔唔落疊，向來朋友多的洪天明索性叫內地女友去探班，在當地逗留三星期，有幾個女性朋友不怕千里迢迢，特登到武當山跟他食飯短聚，洪天明亦會識做撇開劇組，跟來探他的朋友聯誼。

夜晚得閒唔使開工，洪天明又跟一班女仔在房敷 mask。

到伊館睇阮兆祥，周家蔚約埋一班姊妹包括佘詩曼、梁靖琪、文頌嫻等一齊食飯。

在武當山拍外景，洪天明跟一班妹妹仔玩到癲，試過扮大爺要其他女仔按摩。

喪玩剝褲

拍劇期間，洪天明又同蔚雨芯、功夫新星出身的何佩珉玩剝褲並放上網，鏡頭外，楊怡及林秀怡都有份一齊剝。

聽話唔玩微信

洪天明花弗唔定性，再被觸動神經的周家蔚即使隔空找晦氣，他亦好少理，激到有四個月身孕的老婆比未大肚前瘦多三磅。回港休息兩星期，知衰洪天明即時做嘢，連日來自我守行為，做老婆阿四。

「天明應承 Janet（周家蔚）唔會單獨去夜街，就算約人飲嘢都唔會， Janet唔想佢同班女仔繼續聯絡，要天明刪咗之前個 WeChat，佢都即刻照做。下個月返內地拍新劇，到時點都得忍一陣，冇乜所謂。」知情者說。