葉念琛在 10月已將劇本分派畀各演員，佘詩曼收到時個樣都似係滿意喎！
網上圖片
真面目
監製上身 麻煩改戲 三度延期 張智霖阻阿佘搵食
43歲童顏張智霖（ Chilam）去年憑《衝上雲霄 II》 cool魔一角翻 hit，加上以 5千萬賣身俾蕭定一係威係勢，今時今日講句嘢都有力啲！
14年前經典劇《十月初五的月光》，今年落實開拍電影版，主角初哥哥（張智霖）和祝君好（佘詩曼）鐵腳走唔甩，上月 8日正式開鏡，可惜拍唔到半日， Chilam下令叫停，捉埋佘詩曼和導演兼編劇葉念琛入房密斟並要求改劇本，據知劇本一改再改，最新消息指要明年 3月至埋到尾！年尾流流阻住佘姐接騷搵錢， Chilam好大膽喎！
00年一套《十月初五的月光》收視最高去到 46點超經典。如今《十月初五的月光》拍電影版，都算叫人期待。
拍到農曆年
《十》片中秋節開始寫劇本，本於上月 8日正式第一日開工，原以為舊班底大家都有默契會順順利利，可惜今時唔同往日的 Chilam卻即日發難，嫌導演對角色不了解，劇本親熱鏡頭又太多，要求葉念琛在兩個星期內改好劇本。
導演和演員溝通後對劇本作出更改絕對平常，其他組繼續開拍，編劇專心改劇本唔阻進度，但今次 Chilam一句即令全部演員齊齊停工齋等，首當其衝佘詩曼應該影響最大。據知原安排 11月開始拍的《十》片會於年底煞科，但現電影需要拍至過完農曆新年，隨時阻住阿佘喺黃金搵錢檔期掘金。
週日（ 23日）有份參與《十》片的唐文龍向本刊直認電影或需拍至過年，「劇本係需要調整，到𠵱家都未收到新劇本。據知部戲要拍到過咗農曆年，甚至係 3月，我係有接到工作嘅，不過劇組方面都好願意去配合，呢啲係無辦法預料嘅困難，𠵱家都商量緊去就番個期。不過劇本調整都係好事，就算要等都係值得！」
而老闆蕭定一週一（ 24日）就對電影一延再延回應說：「絕對無咁嘅事，因為我哋接咗個綜藝節目，所以 26至 30號就要去韓國，要 30號先返嚟，所以咪要 3號先開到工囉！劇本已經改好咗好耐㗎喇。」咩原因係其次，阻人搵食大件事呀！
惡頂演員
演員做戲要有自己 style先至搶到鏡，但不少有經驗的老牌演員，就往往因為加插自己意見而改劇本，不過改劇本呢家嘢，好聽啲叫專業，難聽啲就係阻人收工，連影帝秋生哥都俾人話過㗎。
配合場景 王喜
已經離開大台嘅王喜，曾經都係電視台搶手貨，可惜拍《烈火雄心 3》時，唔知碇同當時得令嘅鄭嘉穎不和，結果被嘉穎向樂易玲告狀王喜擅自改劇本，當時王喜都直認：「我有改！不過都係配合場景而改，絕對唔會影響對手接落去。」變成麻煩演員的他，最後被大台提前解約。
|
鍾意就快D Share啦！
|
|
|
