以分手嚟講，胡定欣既坦率亦淡定，自稱療傷五個月後才公佈「分訊」，不過就難在她臉上找到情傷痕跡。
封面
掟煲唔掟蓋 胡定欣分手霸住渣甸山
花旦之中，胡定欣都算係坦白過人，月中（ 15日）出席大台新劇宣傳，竟然自動波向傳媒宣布與拍拖兩年的廣告界闊少沈柏淳（ Patt）分手多個月，自爆回復單身。不過宣布分手個多星期來，定欣多次見記者談及舊愛還是刻意維護，又暗示復合靠緣份，難得分手分得佢咁溫和！
分得咁有保留，定欣其實仲住緊二人位於渣甸山豪宅愛巢未捨得斷纜！原來 34胡定欣放不下 Patt更放不下等嫁的心，闊少 Patt未絕望喎！
外表硬淨，處理感情亦都有自己一套，繼吳浩康、馬明之後，胡定欣再次宣布與拍拖兩年的廣告界闊少沈柏淳分手，再次回復單身。不過人分手佢分手，胡定欣分得寧舍淡定，公布消息時自稱已經療傷五個月兼走出情傷。
照返舊愛巢
拍拖兩年、同居一年，年初至話求婚成功、預計明年初結婚，明明五月至被影到拍拖行街、八月至高調結伴睇杜德偉演唱會，毫無先兆之下話分手的確來得突然，胡定欣解畫亦解得模稜兩可：「之前為療情傷放咗四、五個月假，𠵱家專心工作……好難用性格不合嚟形容一段關係，相愛先拍拖，總之我哋知乜事就可以，唔想交代咁多。」
宣布分手後，定欣一邊忙新劇宣傳，一邊趕拍新劇，不只表面看不出異樣，正如她口中所講已經平伏心情，而實際生活起居亦同分手前一樣，繼續出入一年前遷入、與 Patt同居的港島渣甸山花園大廈愛巢，擺明掟煲唔掟蓋藕斷絲連。
好姊妹胡杏兒當年同黃宗澤分手，避談舊愛又第一時間搬新居，連 Bosco鄰居都唔肯做，胡定欣分手後唔只續住愛巢，連言論都明顯有保留疑似護舊愛。外界揣測 Patt花心出軌，定欣翌日即主動向媒體澄清：「佢冇對唔住我，佢對我好好、好錫我！」被問到聖誕安排及有沒有復合機會，亦不急着排除可能：「唔知道，我聖誕要開廠，佢工作又好忙。（復合有望？）要睇緣份，我唔知道。」據悉二人對外話分手，其實處於感情冷靜期，恨嫁定欣對於原定的明年訂婚大計仍未死心。
舊愛報喜
週日（ 23日），胡定欣憑《點金勝手》卓太一角獲得馬來西亞「我最喜愛 TVB電視角色」一獎，據悉胡定欣在該頒獎禮年年冧庄女配角獎、今年再奪電視角色獎，其實失望多過興奮，早為長踞女二位、不獲大台扶正而灰心。
事業失意感情觸礁，又會咁啱前度吳浩康宣布求婚鍾舒漫成功、另一搭上強國𡃁模舊愛馬國明亦絕情拒絕翻撻：「掛住足球多過女人！」胡定欣一心想在 35歲前出嫁心願凍過水，目前手上唯一籌碼就係同 Patt的兩年感情和愛巢，難怪掟煲唔掟蓋，置諸死地而後生，呢招高呀！
胡說八道姚唔出
胡定欣、胡杏兒、胡蓓蔚再加埋姚子羚同黃智雯，出晒名情同姊妹，合組胡說八道吹水談天聯絡感情！本來已經黐到實嘅幾位，呢期又見多咗！無他嘅，好姊妹連同甩拖都約埋咁滯前後腳，咪又多咗時間聚會囉！即係咁，幾位會員條件好要求更加高，不如學似胡蓓蔚一樣，粗粗哋搵豹哥嫁咗佢，唔係好易變胡氏單身好友！
胡杏兒 冇米粥
兩年前同黃宗澤甩拖後再無着落、年初「我找到了」玩出火被網民負評，最近傳出蜜運，不過剛剛在 35歲牛一派對宣布絕無此事。好難捉摸！
|
鍾意就快D Share啦！
|
|
|
