掃呢頁CODE去手機

2014年11月27日 星期四

[壹週刊 - 1290] 瞞住阿媽翁靜晶 劉萬儀風騷處女下海 翁靜晶,劉萬儀,翁靜晶個女,M1,




現場直擊

瞞住阿媽翁靜晶 劉萬儀風騷處女下海

今年廿七歲的劉家良大女劉萬儀,有大律師唔做,幾個月前背住阿媽翁靜晶,偷步簽樂基兒掛單的 Calcarrie's模特兒公司入娛圈,處女下海出席 Swatch活動𢱑銀。

我哋由她開騷前化妝裝身開始貼身直擊,全程表現淡定的她,對傳媒對答揮灑自如,「我唔緊張,反而好期待新工作,完成 event後我會整 cupcake慶祝吓。」學翁靜晶話齋,做娛樂圈會無晒私隱,當日完騷後已經有狗仔隊咬住佢唔放死跟,劉萬儀都嚇咗一跳話:「吓,好驚呀!」

鬼妹率直

劉萬儀話,媽媽知她要入娛圈,第一句忠告就是「小心」!「佢話我會無晒自由、私隱,以後要化妝先出得街,咁我都想做自己,無化妝就無化妝啦。」自小在香港讀國際學校,大學在倫敦 Exeter大學修畢法律的她,性格果真鬼鬼哋夠率直,話說攝影師想她化好妝後,擺些甫士影相,她面有難色喃喃自語︰「 I don't want to do.」在旁的模特兒公司職員即表現尷尬,一邊游說她,一邊打圓場,「不好意思,佢仲未 warm up。」

勉強擺了幾款「模特兒」甫士後,她披上亡父劉家良的大碼外套準備出發,這才回復自我,「其實我好 tomboy,著拖鞋就出街,平日最鍾意著爸爸啲衫,佢啲功夫衫就被阿妹偷咗,嘻嘻。」廿七歲女頓時變得調皮可愛,更自動波擺出型款任你影。

晨操

劉萬儀每星期有三日在家中後花園練武,「以前百厭時,阿爸就唔教,要求他先肯教我。」

化妝

她不慣有化妝師幫手扮靚,「同我自己化好唔同。」最後化妝師妥協,化到她滿意。

披上亡父的外套後,劉萬儀表現調皮,跟兩分鐘前要她擺靚女甫士判若兩人,「想自然啲 be myself。」

偷報戲劇課程

自認在十歲時已想拍電影的劉萬儀,其實讀書一直聽命於翁靜晶,就連讀法律都是阿媽的主意,「由小學到中學都鍾意表演,佢話要供我去外國讀書好貴,自然想揀將來對我生活有保障的科目,阿媽講咗就係咁,都決定咗,費事問。」她不敢明言是母親所逼,但透露每晚都讀到喊,捱到第三年才對法律產生興趣,「終於可以讀吓鑑證科學,所以畢業後在新加坡實習時,都專門揀刑事及家庭範疇。」

身在曹營心在漢,劉萬儀一直想趁年輕圓了表演夢,「再等我都三十歲,到時會後悔,不如試吓自己啱唔啱先。」所以兩年前她在新加坡實習時儲了十多萬學費,先斬後奏報了紐約 The Lee Strasberg Theatre and Film Institute讀戲劇,「阿媽知道後有不同反應,係有唔高興,我同佢講道理,我話我在讀大學時,你答應過只要我做晒你要求我做的事,我就可以自由發揮,咁佢講 OK。」唸畢課程後,她在紐約做過舞台劇演員,加速她對幕前的興趣,「阿媽有叫我不如返香港做律師,咁我又唔係放棄唔做,個牌永遠唔會走。」

出騷前

出騷見記者前,她的公司同事教她惡補「蘭花手」晒錶甫士。

出騷中

她對娛圈不熟悉,當日夥拍林峯女友吳千語出騷便零交流。

攝影師想她擺些女性化甫士,直率的她即時表情勉強。

她做律師口才肯定了得,面對記者提問無難度。

唔要整容減肥

至於今次回流入娛圈,她更不設時限,「我無任何期望,咁俾自己好大壓力,但我對自己都好有要求,對面貌反而有少少擔心,我見好多明星個樣都變咗,整到好瘦嘅身材,我問媽咪要唔要整到符合社會的美麗標準,她話唔應該,喺佢心中我是完美的,變咗就唔係佢個女。」愛吃甜品蛋糕的她,目前靠每星期三天在家後花園習武三小時保身形,「阿爸走咗後,我諗有乜方法可將爸爸的精神傳給我的仔女?依家人大咗,更加明白爸爸點解對功夫咁熱愛,原來每一個動作真係有意思。」

劉家良老來得女,兩父女年差五十歲,一個滿口 ABC,一個則是老師傅,點都有代溝吧!「我都幾 old fashion,好鍾意睇黑白片,例如 Grace Kelly的戲、聽 Beattle同 Tom Jones的歌,我同阿爸會講呢啲,所以無想過有代溝。」至於男友?劉萬儀掩住半邊嘴說:「上年就有男友,而家要事業穩定先。」後忽又鬼馬地補充說:「我屋企有個七年嘅男友,佢叫 Xbox。」

整餅時間

劉萬儀開心時會整蛋糕,太大壓力又會整蛋糕,這天處女開工後,她便去了餅房做 cupcake,「凌晨肚餓,我都會起身整蛋糕。」

她除做了十多個玫瑰 cupcake(圓圖),還做了個招牌南瓜派(上圖左),「曾經做嚟答謝在凌雲寺替爸爸誦經的師傅、朋友。」

她經常參加整甜品比賽,下圖這個公仔蛋糕,是她做給母親的生日禮物。

兩姊妹自小都會「整色整水」跟父母出席活動。

她跟細妹劉幸儀都是法律生,阿妹目前更在攻讀碩士。



鍾意就快D Share啦!