全知言
率先揀 我最喜愛男女歌手金曲係……
呢個年代成部手機 song list都係韓文歌。講真你今年又有勁 loop邊首廣東歌呢？雖然歌係少咗人聽，但各大頒獎禮 must go on。陳奕迅、容祖兒依然係唔少歌手心目中大熱，就快嫁人嘅 Ella BB就扒冷估周柏豪，人妻梁詠琪就話鍾意睇王菀之套《老表》仲話：「佢今年個勢好勁。」熟知大台規矩，果然世事都俾 GiGi看透！
官恩娜選柏豪 Gin Lee
我覺得 Gin Lee真係唱得幾好嘅，我真係幾喜歡佢嘅聲音同演繹。咁男歌手就周柏豪啦，幾好呀，佢啱啱個演唱會都好成功！啲歌都愈來愈好。最感動嘅歌，我諗〈高山低谷〉（林奕匡唱）令我幾有共嗚嘅歌。
小肥揀安仔 祖兒
今年最佳女歌手我會揀容祖兒啦，佢自己好勤力，我本身就好鍾意。金曲我覺得係許志安〈流淚行勝利道〉，真係聽到我呢……。好順利成章，（男歌手）我會揀許志安，因為好多小道消息都傳係佢啦，我覺得係佢！
梁詠琪貼菀之 Eason
我心目中嘅男女歌手呢，就係陳奕迅；咁女歌手呢，我諗係王菀之囉。佢今年個氣勢好似好勁，咁我有睇過佢拍嘅電視劇呀，同埋好鍾意聽佢唱歌。
鄧麗欣買千嬅 安仔
我心目中最受歡迎男歌手係許志安先生，而女歌手係楊千嬅小姐。因為安仔啲歌好好聽，尤其〈流淚行勝利道〉啦，我亦會揀呢首做金曲嘅，聽咗一次就喺我腦海中，我覺得呢首歌係非常成功，好講得中好多人心聲。
各有各 Like
現今香港樂壇頒獎禮，基本上陳奕迅、容祖兒玩晒，不過後生仔就唔係咁諗，佢哋心目中各有喜好！原來吳若希首〈越難越愛〉真係好 hit㗎！
倉鼠 17歲 愛柏豪
周柏豪囉，唔知喎，一出道已經睇佢喇喎。女歌手？其實冇喎。金曲周柏豪〈還記得〉囉。
阿 Mi 20歲 冧若希
林峯，佢唱歌好聽囉，樣又靚仔。女就吳若希，金曲佢嗰首〈越難越愛〉啦。
|
鍾意就快D Share啦！
|
|
|
