21歲
鍾健峰（阿峰）
公大公共行政學系 Yr.1（夜校）
18歲
鄭逸朗（ Leon）
港大工程系 Yr. 1
雖然連車馬費都冇，但 Leon同阿鋒照樣落足心機派宣傳單張，難怪連 Holden都大讚佢係民建聯新星！
Main Camp
港大仔做民建聯新兵 霸氣 Leon：「我要做功能組別阿頭！」
高登仔一向奄尖難服侍，難得港視套《選戰》被評為神劇，劇入面嘅保皇「振民黨」仲令人神憎鬼厭！講真電視劇煲吓就話冇咩所謂，現實叫班後生加入政黨，肯定大多耍手擰頭，仲要加入親中民建聯，好多年青人都肯定 say no！
不過都有例外，好似現讀香港大學工程系 year1嘅鄭逸朗(Leon)，中五就加入民建聯青年團，喺城市論壇發言，就算俾高登仔起底兼同學仔排擠， Leon都話未驚過：「冇動搖過我立場」！
𠵱家啲學生 10個有 9個都係黃絲帶，但 Leon話佢自己身上流住藍色嘅血。成功考入港大工程系嘅 Leon，今年參加學校 O camp時因為政見不同，而被視為異類：「嗰時咁啱傾開一啲關於佔中立場嘅話題，咁我係藍絲帶當然唔支持佔中，覺得佔中破壞緊社會秩序，就算佢哋咁做都改變唔到個選舉制度，一講完已經俾幾個黃絲同學仔圍插，連之前開落嘅 whatsapp group，裡面啲人仲退出晒添！」不過 Leon解釋，放低政治立場，佢其實與同學仔之間嘅相處好融洽。
想做議員
堅撐藍絲，只因 Leon細個受「 0分校長」呂宇俊啟發，覺得做藍絲先係理智，「有年學校請咗呂校長嚟演講，佢舉咗一個令我好印象深刻嘅例子，『與其做一班喺學校不滿老師教學手法，成日同老師作對嘅滋事分子、壞學生，倒不如讀好啲書做一個好老師取代佢哋。』根本𠵱家黃絲學生上街佔領、靜坐都唔會改變到個選舉制度，仲會被視為破壞社會秩序，與其係咁不如自己去參選議員改變社會！」
Leon細細個已經為從政鋪路，仲試過因為喺城市論壇提出：「六四事件前人嘅決策、點解要後人找數？」，而被高登仔瘋狂起底，亦因勇於發言而俾現任民建聯青年團主席周浩鼎（ Holden）賞識，成為咗民建聯青年團骨幹成員兼 Holden義工助手，就算義工助手連車馬費都冇， Leon各樣青年團活動從不缺席，義工服務永冇托手肘，問到佢喺黨裏面想有咩作為，佢就坦白講：「我要做功能組別工程界阿頭！」霸氣到呢！
公大阿峰：「我愛國愛港！」
霸氣 Leon想挑戰老牌議員入立法會，但唔係個個都咁有鴻圖大志，現就讀香港公開大學公共行政學系嘅鍾健峰話，加入民建聯青年團純綷為興趣，佢一面正氣咁話：「我崇尚愛國愛港，而且我鍾意民建聯係一個有建設性嘅政黨，而且青年團好俾機會後生仔為黨發言，所以我揀民建聯。」
|
鍾意就快D Share啦！
|
|
|