真人騷
好想 24小時瘋狂做嘢 黃美棋：我係工作狂唔係 sheshe！
新一屆視后視帝出爐， sorry，大部份人並不留意結果，只關心：點解視帝唔係《選戰》智叔？飛躍男藝人點解唔係王宗堯？
冇錯！大台「選戰」不代表我們，港視劇倒是更多話題更有口碑。小道消息盛傳，播埋《選戰》就到《我阿媽係黑玫瑰》，總算輪到美棋 BB出場！
6歲開始做童星， 22歲因為一輯發育圓滿生活照再走紅於網絡，港視開台不成搞到做足三年紙上明星，終於等到作品有得見人時，一不離二的負面新聞亦接踵而來，今日話佢對前經理人過橋抽板反轉豬肚，聽日又話佢寸嘴藐爆星二代。
表面上就是個嬌小可愛的典型港女，我沒想到實情的黃美棋卻總是讓我看不透：
一波接一波的負聞打擊不了她，一講父母卻秒殺淚腺，喊到兩行黑眼線；從來就是媽媽的乖寶貝，大學畢業竟然夠膽私簽港視先斬後奏；身為女神，從小到大沒有男性偶像，戀愛真空三年也半點不着急；再加上口齒伶俐、頭腦理智、拍起照來又太不善於拋媚眼，我忍不住問：「你肯定你唔係 she she？」
美棋 BB話：「我真係唔係 she she呢！但係個個都知我係鐵人，最恨就係自己有日可以好似細個見到啲大哥哥大姐姐咁，廠景接外景，外景接廠景， 24小時瘋狂做嘢啫！我唔係唔鍾意男人，不過未係時候囉！」
諗都唔使諗，答案俾得太快囉。
最想同佢黐住過 24小時
女神有冇男神？
冇喎……
由細到大都冇？
真係冇話特別鍾意邊個男偶像，女仔就有，鄭秀文。
咁你拍《行運一條龍》時咪好開心？
係呀！唔只添，我仲同佢合作過另一套戲，《愛你愛到殺死你》。我有搵佢傾偈，又同佢影相，佢仲記得我添，因為之前已經合作過。
嗰個年代嘅鄭秀文盛傳脾氣好唔香？
嘻嘻嘻……嗰陣時我咁細唔識諗呢啲嘢，又唔識嗰啲花名點解，我家姐鍾意佢先，我咪跟住家姐一齊聽歌睇演唱會囉。
家姐幾多歲？你同佢邊個靚啲？
家姐大我兩年，佢靚過我！哥哥就大我五年，佢哋仲早過我拍廣告，係媽咪朋友介紹一齊拍主題樂園廣告。不過得我就拍埋電視同電影，𠵱家仲入埋呢一行。
好多毒男會幻想同女神一齊廿四小時會點過，作為女神，你最恨同邊個廿四小時黐住一齊過？
嗯……我會揀我經理人。如果佢需要廿四小時都傍住我，即係話我工作量都 ok。因為我係工作狂，佢哋都話我係鐵人，最鍾意見到自己啲期排到滿晒。可能我細細個入呢行，見慣啲大哥哥大姐姐廠景接外景，外景又接廠景，真係好渴望呢啲生活。
你細個都算高產童星，廿四小時又點過？
我最忙應該係小三、小四時期，有電影又有劇，媽咪一直講到明，學業行先，一定唔會幫我請假，一定係做晒學校嘅嘢，有時間先去拍嘢，當一門課外活動一樣，我知功課做唔晒冇得玩，通常就會喺學校做完功課先，到放學就會有工作人員嚟接我去開工。
咁你真係好鍾意拍戲！咁放學開始拍要拍到幾多點？
小朋友開工有限制，唔可以開工多過九個鐘，又唔可以遲過 11點收工，所以唔算辛苦。
初戀男友做唔番朋友
所以就算你合作嘅係周星馳、鄭秀文，片場其實你最大牌？
係呀，一嚟到片場都係話，快喇，嗱嗱聲俾小朋友拍咗先。
外國好多童星大個都會學壞，或者變得好喪，點解你可以把持得住？
會嘅，佢哋早過其他小朋友見識世界，對得大人多，亦早過人老積，呢個時候屋企人最重要，就要睇父母點樣 lead住個小朋友喇。我小學時，會有小朋友唔鍾意我，會話：拍戲好叻咩。我唔明㗎，返屋企會問媽咪，我都係做我鍾意嘅嘢啫，點解人哋會咁對我。媽咪話我知，就算你做任何職業，都會有人唔鍾意。我慶幸每個階段都有媽咪幫我解開心結，所以我唔會諗歪咗。
由得佢哋鬧囉，反正你搵錢多過佢哋！
咁我又唔係搵好多，酬勞全部媽咪幫我儲起，其實我都唔知每套戲有幾多錢。總之細個我學呢樣嗰樣都要好多錢，我搵嘅亦都遠遠唔夠媽咪供我去美國讀書嗰錢咁大。
你事業心都幾重，有冇拍過拖？初戀係幾多歲？
拍過兩次，初戀係 18歲。同佢好細個拍港台節目《點蟲蟲》識，其實我哋同齡，但細個時一直好似大哥哥一樣照顧我，咁多年都有寫信聯絡……係真係貼郵票寄嗰種信。到咗中學佢話鍾意我，都追咗我好多年，我諗咗好耐，直到會考完至應承佢，諗住不如試下啦。
拍咗幾耐拖？結果仲有冇得做兄妹？
大概一兩年，結果分咗手，兄妹都冇得做，因為中間都真係發生咗好多事。
發生咩事？佢對唔住你？第二個男朋友又喺邊度識？
我唔知……過咗去我就唔想再話佢。第二個男朋友喺大學識，第一個係斯文型，第二個就係個性型，不過因為讀書太多嘢煩，都係決定做番朋友，大家𠵱家都係朋友。
所以呢個做到朋友，初戀男友連朋友都做唔到？
都可以咁講，嗰次都算係我咁大個女最壞嘅愛情經歷，原來一個識咗咁耐、鍾意咗我咁耐嘅男仔都會咁對我，真係唔太相信愛情。
咁佢到底做咗啲咩咁嚴重？一腳踏兩船？
唉，我唔知！亦唔想 find out，嗰陣時大家亦有思想上嘅差距，有啲嘢佢想，但我夾唔到。
係唔係佢太 open，而你真係好 pure好 true，唔肯制？
噢，哈哈，唔係你諗嗰啲……係佢好鍾意玩，而我係一個好宅嘅女仔啫……佢鍾意 clubbing，我好抗拒。其他嘢，有啲嘅，但係我唔想講喇。
單身幾年，你𠵱家愛情觀如何？
近排都有啲新嘅睇法，真係好多身邊朋友離離合合，有啲拍咗好多年拖但分咗手，有啲就真係可以終成眷屬……兩 pair都係我好好朋友，唔 work嗰一 pair亦都冇怪責對方……其實我哋一路長大，就知道隔離嗰個人未必就係啱你嗰個，真係要 right timing加 right person，真係遇得着其實好唔容易，我真係好羨慕。
事業同愛情，你覺得邊樣大啲？
幾年前，我仲以為自己會係嗰啲 25歲就結婚嘅人，到我今年真係夠 25歲，事業又啱啱開始，其實我唔想停落嚟。
唔鍾意 social唔代表我寸
既然咁鍾意呢行，點解大學讀經濟？畢業會去咗做 OL？
細個拍戲，媽咪純粹係俾我當課外活動，但係因為佢知道娛樂圈日夜顛倒生活辛苦，佢盡佢能力唔想我入行。成日去片場，亦都有好多哥哥姐姐同媽咪講：「俾佢玩吓好喇，大個唔好做喇！」
邊個同你媽咪咁講？
好多人同我講，千祈唔好做呢行。好似，梁榮忠，佢同我媽咪講，盡量唔好俾囡囡入呢行喇，好辛苦㗎。我都真係諗住唔會再拍番戲，大學揀 business係我自己揀，係我自己真心鍾意。
美國讀書時、觀塘做 OL時，有冇身痕想拍番戲？
最身痕時就係喺美國讀書，除咗返學、做論文，就係睇香港劇同電影，睇親都會忍唔住有個念頭，唔知呢場戲換着我會點做呢？嗰陣時就已經知道自己仲係鍾意拍戲，再加上做 OL做咗一年，人工唔錯但始終得唔到以前拍戲嘅滿足感。
實情做咗呢行，最辛苦係咩？會唔會係負面新聞，俾人話對前經理人反轉豬肚，又俾人話蝦黃芷晴，成個是非精一樣？
我反而冇乜嘢，而爹哋媽咪每日同我一齊住，每晚都會聽我交代當天做過啲咩，佢哋同朋友都安慰番我轉頭，話一睇就知發生咩事，話最清楚我係咩人。
百毒不侵咁款，難道冇嘢會打擊到你？
我會覺得自己成長咗，入咗呢行預咗一啲嘢遲早要經歷，下次再有負面新聞我會識調節心態，早面對總好過一帆風順突然間被中傷，反而安慰，感恩。我嘅弱點就係爹哋媽咪，一講佢哋我就會好激動。
點解呢？
一講佢哋……就會……（即刻眼紅）爹哋媽咪我支持我，同時又好擔心我，每晚我都話到明，唔好等我喇、今晚會好夜……但係佢哋永遠唔聽話，一定等我門，等到聽到我攞鎖匙扭門鎖嘅聲為止，才放得落個心……（見到第一滴淚）
但係你又渴求廠景接外景，外景接廠景嘅非人生活，咪對佢哋好折磨？
真係，去到有一個地步，我唔想佢哋咁辛苦，話俾佢哋知：我 ok㗎……（哽咽到講唔到嘢）有咩事我識得打 999……有時佢哋等完我門，又幫我㷫番熱啲湯，我驚夜話怕第二日水腫都唔敢飲……（開始流黑眼淚）佢叫我飲啦，佢上個禮拜先同我講過，你一日瘦過一日……（已經喊到口齒不清）演員鍾意收工去飲下嘢食下飯，我唔想媽咪爹哋等我門，盡量都唔去，我諗都係因為咁，會俾人話寸、俾人話我覺得自己好紅、唔合群唔 social……可幸嘅係，𠵱家開始有嘢出街、工作增加，媽咪成日都追我表演同新聞，我都希望令佢哋辛苦嘅同時，亦都可以……（倒抽一口涼氣）真係見到我做緊嘢，唔係玩玩下……
你俾第一個男朋友欺負時，有冇喊得咁淒涼？
唉吔……（笑番）唔係欺騙唔係欺負呀，我諗我嘅致命傷真係我爹啲媽咪啫。
無須多個純純兔
即係咁，專訪黃美棋前，我聽過有人評價她：「好寸，好似覺得自己好紅咁，唔鍾意佢囉！」
老老實實，前後對足四粒鐘，我倒真沒覺得美棋 BB很寸，覺得自己很紅。
講真，高登女神多如天上星星，十幾年前做過童星，十幾年後做過三兩套港視劇配角，仲要未出街添，有幾紅？
再講，口齒伶俐，頭腦清晰，對我來說既不是寸嘴，亦總算溝通易落筆易過那些乜都唔識答、咩都唔敢講，事實上亦稱不上美麗的花瓶。
我 buy黃美棋囉，總好過多一個只得層外皮的純純兔。
|
鍾意就快D Share啦！
|
|
|