Jfung除咗 remix捽碟之外，原來自彈自唱都得㗎，佢仲話自己有街頭表演，但大家冇留意啫。
爆 Like王
'14爆 like王 '15大展望
2014又玩完喇！主流已經由網民一人一點擊決定，不論音樂、電視小生或者𡃁模，都已經唔受傳統制度控制， JFung惡搞歌絕對 hit過吳若希嘅〈越難越愛〉、天堂鳥亦係最受巴打歡迎組合、《選戰》王宗堯鋒頭肯定勁過大台出爐視帝郭晉安、大埔 LuLu由網上 hit到幕前。講到 04最深刻，唔少得一把傘……
J Fung：要做歌手
由今年 5月 JFung（ Jacky Fung）創作第一首惡搞歌〈你厚多士〉，開始被網民留意，之後有〈一口梁氣〉同〈阿銀的夢想〉令佢成為惡搞音樂人，但原來 Jfung最想做 DJ，唔係只喺夜場打碟，仲係會同歌手合作。
F：《 FACE》
F： 15年有咩搞作?
Jacky：我有諗過出隻 2014嘅精選集，可惜𠵱家已經 12月尾。其實我想做 DJ同埋歌手，亦想人除咗聽啲句子外亦留意我做嘅背景音樂。有好多人話背景音樂幾好聽，問係咩歌嚟㗎？我會好開心。
F：作咁多關於社會問題 remix，你覺得香港𠵱家最大問題係咩?
Jacky：其實新移民政策就係一個影響香港人比較多嘅一個事件，今年最大一件事雨傘運動，大家見到獅子山最大幾隻字「我要真普選」，其實講番轉頭就係唔想變成大陸咁。香港人就係會有一個咁嘅情緒收埋咗，遇到一啲譬如厚多士呢啲事啦，情緒就會爆出嚟。
天堂鳥：撇甩 MK-Pop
近年韓風勁，今年 3月香港本地男子組合天堂鳥出現，韓仔造型及舞步被巴打圍插，之後更有 Faith同拾音社，被網友統稱為 MK-Pop。經過出道圍插，天堂鳥仲撐得住，「佢哋令我哋冇退路，冇得轉行。」
F：點形容 14年?
天堂鳥：難捱又唔真係難捱，開頭諗住個 MV有一萬人睇都偷笑，但係冇外界睇到我哋咁慘，被人鬧到點樣，對我哋 3個嚟講其實好小嘅事，反而係令我哋 3個點樣去努力嘅事，唔係要覺得自己慘。
F： 15年天堂鳥繼續 MK-Pop?
天堂鳥：要再爆啲喇!要諗啲新嘢喇，登陸完太陽，要登陸到邊度呢，要諗啲爆點啦。其實都係要靠網上嘅人幫手，好靠香港人嘅力量，團結番佢哋支持番本地音樂先。我哋希望 15年慢慢被人認同，真係一隊香港組合，而唔係再係 MK-Pop，我哋好想撇甩呢個名，呢個名都掛咗一年喇！
王宗堯：角色令我驕傲
港視《選戰》除咗令巴打開始睇番本地劇集，男主角王宗堯由入行多年冇人識變為男神， 15年男神話希望繼續拍戲，不過大台師奶劇唔啱佢胃口。
F： 2014有咩感覺?15年有咩計劃?
王宗堯：幫港視拍咗三套劇今年終於開台啦，陪住香港人好貼題嘅題材終於面世喇，自己嘅堅持終於有少少回報。冇諗過咁受歡迎，當時只知道自己做緊一樣有意義嘅工作，對於拍呢類題材，作為演員會好驕傲。我覺得每年有一個新角色畀我挑戰，有樣未做過嘅嘢畀我挑戰，我就會好開心。做到一啲令我自己驕傲嘅角色，反而係更加重要。
F：大台如果搵你做師奶殺手呢？
王宗堯：只要無綫拍攝空間大啲嘅時候，亦都會有好作品出嚟。若果只做一個師奶劇演員的話，我覺得對我做演員嘅理念或者期望，有啲唔負責任囉。
F：佔中發生期間，你有份去到龍和道佔領，怕唔怕被封殺？
王宗堯：若果我係因為做工作而失去我屋企，我覺得更加唔值得。
大埔 LuLu： Keep住自己新鮮！
今年 6月世界杯幾乎日日都見到 LuLu，嚟緊仲會拍電視劇同電影。由網上跳到幕前，「做呢行就係要 keep住新鮮度。」
F： 14年收穫豐富？
LuLu：呢一年其實過得好快，做完 now主持後接住世界盃，多人識咗有機會拍一啲劇集同埋電影，半年前都未有信心入行㗎，喺呢行個人比較迷惘，因為唔知有咩機會去做，或者做到啲咩嘢。
F： 15年點 keep住自己個勢？
LuLu：遺忙其實好正常，人係鍾意新鮮，亦好快唔記得，但做呢行就要 keep住自己有一個新鮮度，對所有嘢都好奇，咁啲人先會覺得呢個女仔幾得意喎。
〈撐起雨傘〉作曲 Pan：令好多人行前咗
年度之歌一定係〈撐起雨傘〉，未知攞唔攞到吒咤我最喜愛歌曲，但肯定最能夠代表 14年嘅香港。作曲人 Pan話：「呢個運動令到好多人行前咗，𠵱家雖然結束，但會喺網上繼續，因為已經喚醒咗好多人。」
F：雨傘運動對你有咩意義?
Pan：有示威開嘅就衝得更加前，一家大細由冇反應變到出嚟抗爭。好似解放咗佢哋出嚟咁，我以前都係每年 7.1先出嚟。
F：應該點延續落去?
Pan：我諗要成立好多新聞媒體，獨立組織，要透過網上呢個 media去散播雨傘運動，或者後生一代嘅睇法，因為大陸想收緊我哋言論自由。
|
鍾意就快D Share啦！
|
|
|