真人騷
當腿張開遇着 wrong hole 陳逸寧：再大膽我都試過！
她是《破事兒》裡幫陳奕迅「做節」的女朋友。
她是《志明與春嬌》裡的「腿張開」。
她也是《選戰》中被張癸龍入錯「 wrong hole」的紀文慧。
我覺得 35歲的陳逸寧可以稱得上是娛樂圈裡的奇葩，入行 18年，代表作不少，娛樂版卻很少上。
別的女星，掂下手仔都要敲鑼打鼓，陳逸寧演戲玩過 sheshe、試過 wrong hole，反而唔聲唔聲。
當年演出港台青春劇 Y2K系列同期出道的余文樂、方力申、蔡卓妍一早上晒位，照計條件好過好多人、又泊過中國星呢個大碼頭，進取小小，陳逸寧應該亦唔差得去邊，她卻安於現狀，寧願靜靜雞做個小演員。
「拍戲露背我可以，但係影相你叫我露，我覺得我唔需要咁做； wrong hole一幕，導演講得合理，話 sex and power分唔開，就算劇本冇寫臨場加，我會照做，以前拍戲再大膽都試過但係現實中攞性做武器，我唔係嗰啲人。我唔使好紅、唔需要太多新聞，寧願好似𠵱家咁，專心做戲、做演員。」
嚴格來說，她是個保險從業員，也是人妻與人母，演戲甚至不是陳逸寧的正職，論專業，她卻着實優勝過很多當紮女星。
這一刻，我有點想多謝王維基，不是他有錢有夢想，我都差點忘了香港地其實還有很多好演員。
我係第一代𡃁模
我喺怡寶出世，馬來西亞怡寶最出名就係芽菜雞，爹哋係潮州人，媽咪係馬來西亞華僑，大約兩歲，我返咗香港，我仲有個妹，喺香港出世。
我細個喺太古城大，個個星期都會落太古冰場蒲，你唔好話，我喺冰場都幾多男仔撩……中五暑假嗰年，我喺太古地鐵站俾兩個星探發掘，嗰一年拍咗三隻 MV。第一首拍嘅 MV係張國榮嘅〈怨男〉，第二首係郭富城〈愛的呼喚〉，係呀，好似好勁咁，不過我兩首都見唔到樣！
從來冇諗住要紅
96年被發掘，純屬當好玩， 98年正式簽約，就覺得最正係易搵到錢，最叻有時一個月搵成十萬八萬。不過啲錢易搵亦都好快 fing晒，飲飲食食，再加上 03年學人做生意開鋪頭撞正沙士，好快戶口就由六位數字變做兩位數字。
我本來好鍾意心理學，大學喺樹仁又係讀呢科，結果想做心理學家做唔成，學嘅嘢最常用係套番落自己度安慰自己。呢行真係太被動，經常開一日工、放成個月假，最長試過三個月都冇聲氣，真係頂唔順要搵份工俾自己。我試過 in空姐，試過做秘書，係就係等得耐啲，但間唔中又會有份 job搵我，硬係死唔斷氣咁。
冇大紅大紫過，冇人有興趣寫我，其實我覺得幾好喎，我寧願咁樣，冇新聞好過太多負面新聞，洗濕咗個頭又邊有得走去做第二行呢？我爹哋做保險、老公做保險、老爺奶奶又係做保險， 07年我都去咗做保險，嚴格嚟講，保險至係我正職。
wrong hole老公事後至知
《選戰》 wrong hole一幕，我又覺得冇乜嘢，拍戲，再大膽嘅我都試過添。 04年我拍《蝴蝶》同蔣祖曼打爆車輪，好多性愛戲，意識仲大膽。《選戰》呢一幕係講緊 sex and power，劇情需要我就會拍，又唔會因為做咗媽咪而保守咗。
至於我先生，佢一向知我做演員，淨係事前話過俾佢聽會有呢啲場面。實情 wrong hole一幕唔只佢唔知，裸背同 wrong hole劇本入面都冇，我自己事前都唔知。所以你話，我同宗堯幾咁專業？人哋點睇？我唔理得咁多喇！拍完之後同導演一齊睇 play back，大家都話，好殘忍、好痛咁喎！
嚴重劇透：咀爆智叔
wrong hole一幕，係同宗堯最後一次，我轉軚去咗幫宋萬山。小小劇透，嚟緊我會同智叔打茄輪……唔係，應該斯文啲講，係 kiss至真。我哋 kiss幾次，次次都唔喺床，一次喺車，一次喺酒店房做訪問，出邊好多人，我哋偷偷錫……嗰一幕好有張力。其實我冇問智叔有冇拍過吻戲，諗落真係好榮幸，我可能攞咗智叔嘅螢幕初吻喎……
咁多年我同男同女都拍過吻戲，我真係覺得女仔好咀啲。同男仔事先唔會試戲，同蔣祖曼反而有，好軟熟、好舒服。
用性做武器，自問我唔係呢啲人，我做呢行咁多年，最引以自豪嘅係，每次被談論、有話題、被邀請訪問，都係因為工作有成績，唔係因為其他嘢。別人點做去達到目的、別人嘅價值觀唔同，我唔反對，但係我唔認為新聞唔夠人多係我比人差、欠咗啲乜，我寧願好似當年拍《蝴蝶》時一樣，要做 lesbian，就多啲資料搜集、落同志吧見識下，我諗演員嘅時間應該要攞嚟咁用。
唔怕囝囝睇我啲戲
我覺得喺戲劇裡面可以發生任何嘢，拍戲劇情需要我可以露背，但係影相，你叫我着件露背衫，我會反問：係唔係有咁嘅必要呢？
囝囝幾多歲可以睇《選戰》？其實佢𠵱家歲半已經睇緊……但係佢睇得唔專心，見到我會叫「媽媽！媽媽」。佢𠵱家唔明，到佢有朝一日明，我會照直同佢講，呢啲叫演戲，乜嘢都有可能發生。
佢仲細，我𠵱家每日都會同佢講 I love you，希望佢知道咩叫愛。到再大啲，我諗一個男仔，最重要分得清是非黑白。當然，事實同戲劇一樣，會有灰色同黑暗面，但係我個人樂觀，凡事都可以有兩面。唔遇過啲陰暗嘅一面，又點會知道咩係美好呢？要成長過經歷過，人才會準備得更好，去迎接美麗來臨嘅一刻。
專業原是這樣的
|
鍾意就快D Share啦！
|
|
|