熱爆娛樂: [忽然1周 - 1014] 遭削權冇癮　志偉拉祥仔 Bosco過檔 Bosco,曾志偉,志偉,阮兆祥,祥仔,黃宗澤,MW,

2015年1月2日星期五

[忽然1周 - 1014] 遭削權冇癮　志偉拉祥仔 Bosco過檔 Bosco,曾志偉,志偉,阮兆祥,祥仔,黃宗澤,MW,

志偉在大台得各方俾面。但自從余詠珊黨入主大台後，志偉提出任何建議都遭對方打壓，意興闌珊，索性拉隊走人。

娛樂喧

遭削權冇癮　志偉拉祥仔 Bosco過檔

曾志偉向來是大台節目幕後搞手，但自余詠珊入主揸 fit綜藝科後，曾、余經常在會上駁火，而本來有獎門人睇住撈得好掂的金剛及阮兆祥，近期在綜藝節目亦零曝光咁滯。

據知做開「大佬」的志偉，不甘班細做得唔開心，索性拉隊過檔自己公司。將於 2月便約滿大台的阮兆祥心淡有意離巢，還有逾一年合約的金剛及黃宗澤，據知亦會跟隊走人。

日前本刊獨家發現在大台坐歪的樂易玲，相約老友志偉在酒店密斟。據知她打算入股志偉新公司，無心在大台戀戰。

為大台仆心仆命的曾志偉，往年會大鑼大鼓碌盡人情卡為大台拍賀歲片，而且套套保證逾千萬票房。但今年志偉卻罕有與年年打對台的黃百鳴合作，拍喜劇《浮華宴》，明剃大台眼眉。

做港姐炒大鑊

志偉與大台關係有變，全因早年他介紹余詠珊入大台做綜藝科揸 fit人個位後，自己的工作與功勞一併被搶晒。以往幾乎是綜藝節目話事人的志偉，反要聽命於余詠珊，個心難免不服。知情人透露：「志偉喺 TVB以往做開大騷司儀，所有度橋搵嘉賓都一手包辦，好似舊年港姐， Sandy（余詠珊）話要錄影節目，到今年又話港姐要玩神秘，志偉開會嗰陣第一個帶頭反對，話咁做會冇晒氣氛，但 Sandy一意孤行，兩個喺會度唔知嘈咗幾多次。」

志偉黨冇嘢撈

有「殺人鯨」之稱的余詠珊，自上任後新聞多多，高調減薪兼炒人，更䟕隻腳落埋戲劇部門，搞到人心惶惶。

志偉黨的金剛及阮兆祥，昔日有獎門人睇住，日日曝光月月爆騷，但自志偉遭削權後，金剛在所有綜藝節目「被失蹤」，連其女友陳蕊蕊早前亦忍唔住出聲：「佢搵少咗！」

另一黨員阮兆祥早前在個人棟篤騷上，疑因開口撐對家王維基的港視，結果遭飛出《歡樂滿東華》表演。其圈外女友 Crystal在 facebook留言為愛郎抱不平：「莫非真係得罪咗《山》姐？」

本刊收到消息，將於今年 2月中約滿的阮兆祥，有感公司對他續約事採拖字訣，而志偉亦不甘兄弟被恰，遂提議阮兆祥和金剛過檔自己年前與苗僑偉老婆「三嫂」戚美珍合組的電影及經理人公司「愛好娛樂」，實行人棄我取。

親

志偉和樂易玲份屬多年老友，加上每年拍賀歲片合作無間，二人同遭余詠珊打壓，同仇敵愾，啱晒嘴型。

疏

除了開會火併，余詠珊早前因落令炒多位大台老臣子，亦令志偉極度不滿。

黃宗澤撈

除阮兆祥和金剛外，同樣遭大台棄用的黃宗澤，早前亦透過老友三哥苗僑偉搭路希望埋志偉堆。

「 Bosco（黃宗澤）呢兩年喺大台冇咩發展，視帝年年提名年年冇份，拍劇亦買少見少，心灰意冷，見阿峯（林峯）泊到英皇好碼頭，都有啲心郁郁。雖然佢仲有年多約，但諗定後路差唔多。佢同三哥咁 friend，只要開口講一句，睇在三哥面上，志偉就拍心口話佢想幾時嚟都得！加上 Bosco試過喺電影做男主角，可塑性較高，所以過檔價錢一定比其他人高！」

樂易玲入股

藝人慘遭打壓，其實藝員部阿頭樂易玲同樣遭冷待，在公司苦無地位。日前本刊獨家拍得樂易玲相約志偉在銅鑼灣柏寧酒店密斟，傾了足足個多小時，其間樂易玲表情多多，似乎滿腹大計。「其實樂小姐自己都話喺公司湊咗咁多年藝人都攰啦，依家冇權喺手反而樂得清閒，所以今次打算入少少股去志偉嗰間公司先，純粹投資性質，等再過兩三年先正式入去幫志偉手。」知情人續說。