2015年1月1日 星期四

[壹週刊 - 1295] 港韓戀 老豆秦沛跨國拉線 姜麗文暗交 2PM Jun K 姜麗文,秦沛,M1,




探熱針

港韓戀 老豆秦沛跨國拉線 姜麗文暗交 2PM Jun K

秦沛愛女姜麗文,多年來默守住鄭俊弘,直至他由二打六彈起成無綫星夢愛將,事業桃花同步更新,二人分手收場。

被鄭俊弘私有化三年的姜麗文,回復自由後決定散玩,其中包括 2PM成員 Jun K(金閔俊),有指二人秘密拍拖個多月;而一手撮合這港韓戀的,正正是老豆秦沛。

秘拖個幾月

姜麗文經歷鄭俊弘可以共患難不能共富貴的教訓,三年心血付諸流水,自此由長線投資變成玩散。分散投資的對手,包括安志杰、楊受成細仔楊政龍及被形容為六呎黃宗澤的圈外男友。

不同類型,更有不同國籍!早前秦沛接拍內地劇《許願清單》,寶貝女姜麗文竟與他的對手、韓國偶像 2PM成員 Nichkhun傳緋聞, ig上一張二人合照,更惹來 2PM的狂迷打爛醋埕鬧爆。但據了解, Nichkhun只是煙幕,和姜麗文撻着的是 2PM另一成員 Jun K;早前在港舉行的 MAMA音樂會,便有人目擊姜麗文在後台跟 Jun K於 VIP房內短聚,態度親暱。

姜麗文「試食泡菜」,其實全靠老豆。當年秦沛撮合她與契仔關係的鄭俊弘拍拖,今次則間接做了愛女的紅娘。

「今年中 Paul哥(秦沛)同 2PM成員 Nichkhun拍內地劇, Lesley(姜麗文)好多時都去探班,後生仔女好易玩埋,佢同 Nichkhun friend咗,再經對方介紹識埋 2PM其他成員。之後 Lesley就周不時飛去韓國, 2PM去內地做騷,佢又會去捧場,個幾月前仲同 Jun K開始發展地下情。」知情者爆。

韓國偶像組合 2PM早前來港參與 MAMA音樂會演出,與成員 Jun K拍拖的姜麗文忍唔住去後台會情郎。她之後只在 ig放一張有埋 Nichkhun做電燈膽的三人合照,企圖混淆視聽。

○八年出道的 2PM,原是七人成員組合,後因隊長退出變成六人。因形象較粗獷,故被韓國傳媒稱為「野獸偶像」,近年在韓國成績亦屬一般。

秦沛同 2PM的 Nichkhun拍內地劇時,將對手介紹俾愛女姜麗文認識,並發展到同 Nichkhun拍檔 Jun K拍拖。

人肉速遞

韓國經理人對娛圈偶像一向嚴苛,姜麗文與 2PM的 Jun K拍拖,比和鄭俊弘更加低調。

「如果唔係嗰次 Lesley蒲頭 MAMA後台,俾工作人員發現佢同 Jun K好 sweet,呢段地下情都唔會傳開。嗰次 2PM嚟香港即晚就走,可能 Lesley想爭取見面機會,先會冒住俾人識破戀情嘅風險,走去後台見 Jun K。

「為咗保密,好多時都係 Lesley配合 Jun K, 2PM喺邊度出騷,佢就人肉速遞過去見面。其實 Lesley都想俾人知佢同個韓國偶像拍拖,但情況就好似之前同鄭俊弘咁,另一半唔肯,所以只可以搞地下情。」知情者說。

姜麗文陪住前度鄭俊弘走過最霉日子,可惜此情共患難不能共富貴,男方起飛後多女埋身,今年中二人分手。

秦沛曾一手撮合契仔鄭俊弘同愛女拍拖,○一年三人不時被發現一齊喺九龍城開餐,十足一家人。

早前姜麗文與鄭欣宜、林德信等星二代參加內地節目《我不是明星》,老豆秦沛同哥哥姜文杰都喺節目撐佢。

跟鄭俊弘感情危危乎時,姜麗文因與林德信密會而傳出緋聞。

口味多樣化

藝人二代姜麗文,多姿多采感情生活遠遠超越老豆秦沛演藝成績。懂得多國語言的她,男友更加國際化,日本菜、本地菜、台灣菜至近年的韓國菜。

日本菜:山下智久

19歲隻身到日本發展的姜麗文,曾任日本 NHK電視台兒童節目主持。去年接受電台訪問時自爆舊愛中有個是日本當紅歌手,未幾便傳出對方是山下智久。

本地菜:鄭俊弘楊政龍林德信

與鄭俊弘拍拖三年,戀情隨着男方憑《星夢》彈起而告一段落。之後因為跟林德信經常出雙入對,一度令男方女友松崗李那勁呷醋,今年八月,再被發現與楊受成細仔楊政龍密會,著三點式晒 34D拍拖滑水。

台灣菜:安志杰

遇上同樣失戀的台灣仔安志杰,有傳二人一度撻着,不過快來快去。



鍾意就快D Share啦!
Related Posts Plugin for WordPress, Blogger...