熱爆娛樂: [壹週刊 - 1295] 無男不歡　電廠傅嘉莉　姣遍橫店傅嘉莉,M1,

2015年1月1日星期四

[壹週刊 - 1295] 無男不歡　電廠傅嘉莉　姣遍橫店傅嘉莉,M1,

傅嘉莉在等埋位時，經常向陳展鵬放電，又做古怪表情氹對方開心，相當落力。

探熱針

無男不歡　電廠傅嘉莉　姣遍橫店

由 model身份殺入電視圈的傅嘉莉，多年來演出機會不多，直至去年的《衝上雲霄 II》，才為人留意，撞正大台演員荒，瞬間受到力捧的她，先後在《愛我請留言》及拍攝中的《張保仔》做女二。

劇集早前拉隊到橫店拍外景，向來受男同事歡迎， watt數強勁的傅嘉莉又頻頻施展姣技，頭號目標是陳展鵬，無論開工收工，都同對方形影不離，打情罵俏；當頭號不在身邊，傅嘉莉甚至連陳山聰及人夫陳志健都唔放過，逢佬都電！

頭號目標

下星期二（一月六日）滿三十歲的傅嘉莉，對男人絕對有一手。拍《衝上雲霄Ⅱ》姣溝吳卓羲外，早前更被發現冧掂星洲有米肥叔叔，陪去名店掃名牌後，在的士上主動又攬又啜回禮。

天生夠姣必有用！最近大台拉隊到橫店拍新劇《張保仔》外景，劇中傅嘉莉與掹車邊算「筍盤」的陳展鵬有不少對手戲，被視為頭號目標，每逢有同場，她都會刻意同對方坐埋一齊，為自己製造增進感情機會，有人主動送埋身，陳展鵬亦顯得相當受落。

有次二人要埋位拍一場感情戲，等打燈期間，傅嘉莉突然對陳展鵬郁手郁腳，將對方的頸巾拉來拉去，箍完又繑，扮完鬼臉又裝可憐，兩隻眼不停放電，氹得陳展鵬不知幾開心，陪玩陪傾偈陪合照，總之有求必應。

傅嘉莉開工不忘娛樂，經常搵陳展鵬一齊影合照，恩愛同打交款式樣樣有齊。

只要一見到陳展鵬在場，傅嘉莉就十足貼身膏藥黐到實。

人夫都啱

由於陳展鵬佔戲極重，開工組數多時間又長，戲份較少的傅嘉莉唯有轉移目標，黐住收工必定拉大隊外出食飯的陳山聰一齊搵食，即使劇中其他姐仔如龔嘉欣、黃智雯等甚少跟隊，傅嘉莉一樣冇有怕，死跟住全男班出動。

除了只差一點點便做到何家女婿的陳山聰，傅嘉莉連有婦之夫、大隻佬陳志健都冇放過，兩人不時約埋一齊 shopping，又主動搵對方陪做 gym，無時無刻，都要有個男人喺左近。

同羅樂林女兒結了婚的陳志健都成為傅嘉莉目標，經常一齊食飯，又叫對方教做 gym。

傅嘉莉又約埋陳志健到超市 shopping，返回酒店途中更玩到拖晒手。

冰火花旦

傅嘉莉黐少陣「男人幫」都唔得！但女主角陳愷琳莫講話男演員勿近，就連女演員，她都少埋。

「 Grace（陳愷琳）一選完港姐就俾公司捧，仲要套套做女主角，其他姐仔梗係唔妥佢，撞口撞面都唔打招呼，加上佢啲戲唔好成日 NG，搞到大家遲收工，所以啲人唔係咁鍾意佢囉。」劇組工作人員說。

被人杯葛，陳愷琳唯有急召自己媽打飛到橫店做伴，無論開工收工，都係媽咪跟住，比起「最受歡迎佳麗」，有同劇男演員做親兵的傅嘉莉，一個凍冰冰，一個熱辣辣，好玩得多。