下週 21集，不擇手段搶走 Hill少的 Isabella（陳丹丹），不忿男方仍掛住舊愛 Anson（張可頤），狠毒地用鎅刀毀情敵，企圖玉石俱焚。
探熱針
港視《來生》再爆一鑊熟 Isabella鎅刀毀 Anson 陳丹丹潘燦良偷情出位
無綫膠劇《醋娘子》上週六（十二月二十七日）靜悄悄大結局，反之對手港視新劇《來生不做香港人》熱話講唔完。透過兩姊妹的文化差異，帶出時下中港矛盾問題，兩位女主角劉美君、張可頤鬥戲，驚喜位還有飾演姣爆攻心計 Isabella的陳丹丹，以及活現時下男人慾望的蘇玉華男友潘燦良。
現實版的陳丹丹，結咗婚做埋媽咪，囡囡與香港富豪鄭裕彤同名同姓；至於演技被網民激讚的潘燦良，講到明對大台冇興趣，請都唔去！
唔爆唔做
飾演姣爆 Isabella的陳丹丹，在劇中偷食張可頤男友 Hill少潘燦良，兩人上完床再車震，三角關係令網民睇得肉緊。
劇情發展，進入正印、小三惡鬥階段， Isabella不甘搶到手的 Hill少心繫 Anson（張可頤），於是找正印晦氣，擸起鎅刀就「隊」企圖一鑊熟，與近年網上瘋傳強國大婆與小三互片情節相若，令劇情更貼近現實。
陳丹丹曾在無綫捱足十年路人甲，○八年同做金融的男友結婚，女兒已經四歲；去年她轉戰幕後，曾是男子組合「天堂鳥」經理人。結果，由造型以致歌曲均成為網民譏笑對象，但陳丹丹卻稱是意料中事。
「安排佢哋咁樣出嚟，就係要俾網民講同留意，效果亦一如我所料。」陳丹丹認為「傑作」，但做經理人一年，她便劈炮！「因為同啲人意見不合，所以離開。而家喺另一間製作公司繼續做經理人，計劃出年捧新人。」
被踢爆曾在網上公開虐狗論，打造騎呢「天堂鳥」，唔爆唔做的陳丹丹，連幫自己個女改名都膽識過人，叫鄭裕彤。「搵高人改㗎！因為要就佢命格，咁啱咁蹺啫！」陳丹丹說。
娶硬蘇玉華
至於另一個因為《來生》彈出，被高登女奉為「最想下嫁嘅男人」的潘燦良，處男拍劇即被封為筍盤。
「絕對係錯愛，好驚。但證明男人不壞，女人不愛。」
劇中做個悔婚、偷食賤男，現實中的潘燦良也曾跟劉玉翠拍拖四年，現任女友蘇玉華已經一起十八年。去年平安夜潘燦良在札幌雪地求婚，但拖足一年，蘇玉華被指等唔切開口逼婚。
「上年求婚時已有心理準備結婚！我早已認定佢係一生伴侶，不過幾時結，未答到大家，總之適當時候就會做，話唔定幾個月後就結。」
有兩屆舞台劇最佳男主角揸手，其實早已被大台吼住，也曾主動搵上門。
唔恨拍大台膠劇
「好耐之前無綫搵過我試鏡，不過試完個監製叫我減咗肥先，咁咪算囉！我份人好簡單，如果唔係前年離開劇團，咁啱港視搵我，自己又好鍾意個劇本，咁咪試吓拍劇。」
如今一劇成名，大台一旦再翻兜，潘燦良依然堅持己見。
「未必考慮，因為睇到阿蘇嘅工作環境，流程咁緊張，好多時一早返嚟洗個面又要再出去開工，我諗我適應唔到。」潘燦良說。
《來生》編審：可頤起初怕唔討好
《來生》講中港矛盾，引起港人共鳴，該劇編審鮑偉聰由無綫過檔，舊作包括《天地豪情》。對於導演爆張可頤起初怕角色影響形象，鮑偉聰表示驚訝：「唔盡呀！係啲港女自己唔知咋！點解可頤覺得唔討好？」他更說，就是因為公司和演員都有太多包袱，太愛改劇本，所以在無綫一定拍不到《來生》的效果。「如果喺隔籬台，監製、主角會出聲，然後對白、劇情削晒菱角，仲有咩好睇。」
而當初開拍時用《客家女人》作劇名，不但易搞批文在內地拍攝，更想觀眾有驚喜。「而家觀眾睇到嘅，唔係預期嘅婆媽劇，呢個咪嚇佢哋一跳，夠晒過癮！」
美行真人剖白
以真人真事改篇的《來生不做香港人》，劇中兩姊妹美田（劉美君）及美行（張可頤）確有其人，只是現實中輩分對調。
由張可頤飾演的美行真身版，接受本刊電話訪問時說：「現實中我兩姊妹婚姻美滿，美田有仔女，唔係一無所出。因為我嘅故事改得太多，所以喺張可頤身上我睇唔到自己影子，反而劉美君真係好有我細妹神髓，剝瓜子印腳，說話有霸氣都好似。劇中阿媽安排我去香港，美田冇得去，留喺東莞係事實。」
現實版美田
反而同張可頤有幾分似的真實版美田在東莞是婦聯主席，又有官職。當日《來生》在東莞順利拍攝，多得她打通關係。
|
鍾意就快D Share啦！
|
|
|
