社交圈
千嬅囝囝愛馬士
雖然香港聖誕節愈來愈無氣氛，但一家人總循例食個飯應吓節，最特別係丁子高同楊千嬅兩歲囝囝，最佳親子活動竟然係入馬場。
丁子高 阿仔愛馬
丁子高同楊千嬅去完劉嘉玲屋企過節，老婆飛咗去北京，佢就同阿仔丁進諾（ Torres）留港。本週日丁生媽媽的愛駒「野孩子」出賽，佢抱住身穿名牌 Moncler羽絨褸嘅 Torres一齊入場打氣，馬仔衝線時， Torres不停做 fighting手勢叫快啲！快啲！（小圖），「我個仔好鍾意馬，入馬場就好高興，仲認得『野孩子』個頭套，遲啲我會帶佢去探隻馬。」
大劉仔 扭計要老豆
食極福臨門都唔厭的大劉，上週五又孖甘比和一對仔女喺度食聖誕午餐，飯後甘比拖住同大劉一個餅印、兩歲細仔仲學上七人 van，大劉就坐另一部車離開，點知囝囝扭計要跟住老豆，一輪拉扯先肯上車，真係陰功豬。
四太 避難節
賭王四太梁安琪同四個仔女，喺平安夜晚齊到四季酒店食大餐，平日淡掃蛾眉的她，當晚 hea著黑絲配 Hermes拖鞋，唔怪得一見記者就表現愕然，在旁十五歲的細女超欣亦冇化妝零打扮，兩母女極速上車鬆人；隨後與細佬猷君坐另一部車的素顏超盈，在酒店大堂企硬等到有車接才快步出門口，問她新年願望？佢邊行邊答：「希望大家開開心心。」
|
鍾意就快D Share啦！
|
|
|
