Geek友講場
西環深度行
中環就成日去，過澳門都會去上環，但西環畀人感覺總係靜謐而帶點距離感。
港鐵西港島線已經通車，親身落過去嘅話，唔難發現其實西環呢個地方係好特別：藝術氣息特別強烈、人情味特別濃厚、歷史文化特別重。
西環人談西環回憶滿滿
Johnie
住在西環約 10年
「我記得細個嘅時候，爸爸成日都會帶我去一間茶餐廳食嘢，嗰度每個街坊都會定時定候落去食嘢，大家好似一家人聚埋食飯咁。有時如果見唔到某啲街坊，就會周身唔自在。雖然𠵱家已經搬走咗，但俾我揀都會住返西環，因為西環特別有人情味！」
泰利
住在西環約 26年
「西環最令我深刻係咸魚欄。細個嗰陣，每一次經過我都會覺得海味奇型怪狀，雖然嗰時媽媽都會話比我知嗰啲係乜嚟，但細細個見到啲咁得意嘅海味，都會覺得好有趣。我由細到大都一直住喺西環，呢度係個好寧靜嘅地方，可惜而家已經唔再寧靜，所以俾我揀，我會搬離西環。」
Sai Ying Pun Station 藝術步道
西營盤位於西環海皮跟半山之間，營字代表軍營，有張寶仔盜營說、亦有駐港英軍營說，不論你相信邊個版本，西營盤自古就係一個以貨運轉口、維修補給維生、華洋共處的社區，此處斜路多、小路多，當中有不少隱世小店，獨有一份逛外國小店街的獨特文藝氣息。由於地理環境特殊，此站要在 2015年首季尾方會啟用。沒車、用腳行， Kathleen由西營盤區向上環區來一次藝術散策，邊走邊思考，發現更多。
藝術中尋片刻安寧
幾經辛苦，終於行完一條又長又斜嘅大斜路嚟到高街，成條街都唔難發現各式各樣嘅食肆，說實話，其實又真係唔覺有咩特別！然而，勢估唔到接近盡頭轉一轉入巷仔，就有一間同高街完全有違和感嘅 Living Art Café。唔單只外牆油上天空藍嘅色調，一行入去滿佈書籍及畫作，突然，彷如尋找到心中片刻的安寧。
咖啡師 Leo表示老闆就係覺得呢區比較少文藝氣息嘅地方，所以先會決定喺呢度開間 Art Café，同時亦因為老闆嘅妹妹係一個藝術家，所以就索性將佢嘅畫作放喺度展覽，公諸同好， Café彷佛變成 Gallery！佢話店子以旅客光顧為主，最深刻印象係有個德國來香港工作嘅客人，本應第二日就要飛返德國，點知當晚叫 Leo帶佢去玩，喺呢區，感覺人與人之間嘅戒心比較少， Leo好喜歡呢種單純的心態，更在 cafe一角設了「漂書區」，讓客人隨意放下、帶走圖書，就像以往的西環港口，將一件件貨物、一點點文化、一個個故事，不斷轉運。
info box
Living Art Cafe
地址：香港西營盤兩儀坊
（西營盤高街 29-33號高宏閣地下）
查詢： 2803 0186
靜思所想
只要你對生活有感悟，到處都係藝術，不妨沿路向上環走到文咸西街的 Art Space ARTRA，新 event帶你回到過去，欣賞一個以古典油畫做主題嘅畫展，於藝術周期間還有講座、研討會、鑒賞課程、鑒賞下午茶呢。
info box
ARTRA藝術空間藝術周 2015
地址：文咸西街 18號
盤谷銀行大廈 5樓
查詢： 2325 7200
塗鴉何罪
早前一個 14歲嘅小妹妹因為喺金鐘「連儂牆」用粉筆畫花而無辜被警方屈「刑事毀壞」，不論有冇政治意味都好，人之所以係人，正因懂得以畫、文字表達自我，喺人人觸手可及的牆上畫上塗鴉，更是想將訊息公諸於世、何罪之有？喺西營盤東邊街同正街一帶，唔難發現到處都係 Graffiti，你又發現到乜嘢藝術訊息？
HKU Station 守望西環老店情
殖民時期初，西、上、中、下環（現今灣仔、銅鑼灣一帶）以四環九約方式規劃成「維多利亞城」，乃香港最早發展地區。中下環大家都知變晒樣啦，上環都變海味街，只剩西環乃保有舊區風貌。去完西營盤藝術遊，再落香港大學站皇后大道西一帶，雖已混入多間連鎖品牌，但仍有不少老店紮根。港鐵開站，社區面臨劇變，我們外人幻想著這城市如何悲情，但聽老闆們細說老香港故事，感受到嘅係暖暖人情味。老店或總有傳承失落一天，但願當中的人與情能長伴我城。
一腳踢舊式眼鏡店
皇后大道西近正街一帶，係典型嘅街坊舖地段，路過希路眼鏡店可能唔會留意到佢招牌，但只要細心望吓櫥窗又或者走入店內，就會被林林種種特色舊眼鏡所迷倒。周老闆雙親都從事眼鏡行業，覺得做眼鏡優雅又唔使出汗，細個就諗住做呢行。「嗰時去茂昌做學徒，𠵱家都係㗎喇，眼鏡界少林寺。不過以前冇分咩 sales，賣眼鏡嘅都要識整眼鏡。」
1989年開舖，剛過 25年大關，咁多年嚟都係自己同太太打理，除過年大節外年中無休。
同周老闆傾開先記起，細個讀書，課本上寫著香港製造業好風光。「鏡片不嬲都係外國貨，但香港出產嘅膠製鏡框喺 80年代好出名，嗰時外銷世界各地㗎，不過後來大陸開廠平，搬晒上去咪冇囉。」
𠵱家啲後生，鍾意搵舊嘢
眼鏡連鎖店咁多年都有，周生可以一間老店做到今時今日，佢話多得客人賞面。「佢哋話我驗眼好，會講解多啲，介紹咩眼鏡啱用。同埋做生意唔計較囉，壞咗一塊鏡出去配要換晒一對，嚟呢度我咪幫佢換一塊。最近就多咗人嚟買舊眼鏡，𠵱家啲後生好得意，鍾意返啲舊嘢。」
周生仔女都冇諗住繼承衣砵，佢話做多 4年左右退休，但又唔覺絕技失傳或者老店沒落可惜。「冇話可惜嘅，最多我捐晒啲珍藏眼鏡出去，又唔係咩特別嘢，仔女唔做冇人做就要執㗎喇。」
筆者都想周生為今次西區專題推介一些特別地方，但佢話諗唔到，不過就覺得西區最正係人情味。「啲街坊好好，過時過節送好多糕呀、嘢食呀過嚟。以前幫襯我啲學生，𠵱家做咗媽媽帶埋個女嚟幫襯，感覺好特別。」
地鐵通車，周老闆坦言唔通好過通，但就話業主都有良心冇加租。「變咗好多喇，好多舖都冇做，附近啲業主都好人冇乜點加租，但可能隔一兩條街情況已經好唔同，據我知有啲都加咗 5成。」
info box
希路眼鏡公司
開業： 1989年
業務：眼鏡店
地址：西環皇后大道西 276號得利大廈地下
新潮紙紮屹立不倒
老店未必守舊，位於西營盤東邊街同第二街交界一條巷仔入面，就有一間新潮紙紮鋪——天寶樓扎作。勢估唔到老闆夏中建師傅係香港鼎鼎大名「獅王」夏國璋嘅兒子，有獅王都唔做，自然有段故。
「講緊 30年前，當年一個獅頭成本要 1萬，舞一次獅就要用 30隻，獅頭一爛，就即係損失咗 30幾萬，所以當時好多紙紮師父吼住我地呢單大客。屋企為咗慳錢就自己去修補，點知我就喺過程中產生興趣。本來打算拜師學藝，但個個知我係獅王個仔都唔敢收，怕我學識之後佢哋會冇生意！最終都俾我搵到同舞獅冇衝突嘅『花燈大王』梁有錦做我師傅，一做就做咗 32年！」
話天寶樓新潮，皆因佢哋唔只造祭祀品，公司搞 party都會搵夏師傅，貪紙紮夠輕身同平，好似萬聖節，夏師傅就試過幫客人紮科學怪人。面對西港島線通車，夏師傅話地產商出到 3000萬買鋪，但熱愛紙紮藝術嘅佢就覺得呢啲錢毫不需要，話要繼續堅守呢門手藝！
info box
天寶樓扎作
開業： 1982
業務：紙紮店
地址：西營盤第二街 1-11號東祥大廈地庫 C鋪
港大生最愛飲早茶
嚟到香港大學站，唔搵 Kathleen講吓港大生活又點得。港大 campus分得散，各 hall都有自己玩法，不過大部份港大仔女溫書、做 project或其他原因通頂的話，都會去士美菲路嘅新興飲早茶。凌晨 3點開舖，晏晝 4點放工，個流沙包確實一絕，仲有一磚磚嘅蒸蘿蔔糕，加埋用點心紙出去拎點心，夠地道，我鍾意。
info box
新興食家
西環士美菲路 8號地下 C號舖
Kennedy Town Station 塘西風月
一路向西、從香港大學站到達堅尼地城站，當中的石塘咀區，於香港開埠初期至 1930年代中禁娼為止，原是色情事業集中地，其紅燈區比灣仔、中環石塘咀更為繁盛。今時今日色情場所當然已禁絕，但此區的的確確有一段繁盛嘅風月史，是為「塘西風月」，也是港島西區歷史的一部份，實在不用站在「堅離地城」道德高地、視之為污穢之事而恥於重提，最終只會令歷史資料都煙沒！
中產階級的風流軼事
當時中環區的妓院主要聚集高級洋妓，有錢佬都會堆哂喺中環；而消費力低啲嘅男丁，例如短期停留的水兵，就會去灣仔；而石塘咀就夾喺兩者之間，自然而然就會係最多夾心階層、亦即是中產聚集嘅地方，有傳有富家子和土豪為了討得名妓歡心，會用鈔票當柴火煲綠豆沙，好不豪華。
當時嫖妓也不全是「污糟」事，承繼傳統中國社會的情色生活，女孩子多能歌善舞，能登大雅之堂，好多時男人亦只係想有女人陪自己把酒談歡，甚至係聽聽塘西姑娘唱吓歌，彈吓琴，享得春宵一刻。男人嘛，好多時都係「醉翁之意不在酒」。女孩子亦有真情一面，比如當年石塘咀妓院裡面最出名嘅塘西著名粵曲歌伶「花影恨」，自幼父親早逝，得返母親撫養，但最終都因為家境貧困而喺 16歲被逼為娼。 1939年一個夜晚，突然感懷身世，留下一封遺書，就吞食鴉片煙膏自殺。遺書嘅最後一句寫上：「生無可戀甘為鬼，花影恨絕筆。」轟動香港一時！
塘西姑娘必到之處
金陵酒家
論全塘西最豪華嘅酒家一定非金陵酒家莫屬， 1910年，佢哋全港首創「酒家」一詞，大概取自詩詞「夜泊秦淮近酒家」一句，自此香港其他酒樓食肆都開始跟風。當時，無論係商人定公子作樂，都鍾意包廂聽吓塘西故娘唱歌，玩樂一晚。
性病醫院
《大內密探靈靈發》內，婦科醫星爺跟外父解釋：「妓女都係人、妓女都會病……」今日嘅西營盤賽馬會分科診所，就係昔日嘅「國家醫院」，喺山頭嘅其中一座，當時就有專為塘西姑娘而設嘅性病醫院。早喺 1845年因為淫業太興旺，性病橫行，政府於是發牌監管妓女，牌費就係用作營運性病醫院之用。
「一蚊雞」
係一個召妓過程，話說當時石塘咀嘅酒家茶樓會以一張「花箋」作為召妓之用，而當時每張「花箋」值一蚊，即係召妓落訂。塘西姑娘收到花箋，一蚊就可以袋袋平安，再去酒家陪客人。可是，當時一個普通侍仔月薪得三至五蚊，所以一蚊召妓都唔平㗎！
|
鍾意就快D Share啦！
|
|
|