[FACE - 399] 娘娘病發 抽腎組織 廣華覆診 杜小喬紅斑狼瘡入骨 杜小喬,MF,

週日（ 11日）杜小喬復工，狀態未十足，塊面連佢自己都嫌圓，她說：「人哋 Sailor Moon，我就月亮喬」《蘋果日報》圖片

真面目

娘娘病發　抽腎組織　廣華覆診　杜小喬紅斑狼瘡入骨

宅男女神杜小喬上月自爆患上紅斑狼瘡症，除咗停工亦喺網上消失。本刊直擊其養病生活，發覺女神粉絲眾多，但貼身觀音兵係零，連日來獨行俠生活，食飯、行街、甚至去廣華醫院覆診全程都係一支公非常 lonely。

週日（ 11日）杜小喬已復工搵銀，但她接受訪問時透露仍未康復，要 keep住食藥，她說︰「我要食好多藥控制住！日頭出街曬 5分鐘都唔舒服！」

其他影片：>>孤清覆診食 M記　杜小喬紅斑狼瘡上面入骨
>>獨家剖白紅斑狼瘡病情　杜小喬：曬 5分鐘都唔舒服

24歲杜小喬自與熊仔頭的 YouTube短片《男人有話兒》系列即成為宅男女神，上年由網絡跳入娛樂圈，除咗出騷仲拍埋張智霖 MV。事業起步，點知上月 21日突然喺 facebook自爆患上紅斑狼瘡症，仲同記者透露要抽取腎組織化驗，之後更潛晒水，連 fb都罕有地冇更新。

杜小喬身為女神，但原來一條冷食麥記，除下口罩仲見到面上有紅印。

熊仔頭就話自己唔喺香港，但之後錄音回應話離港前都有探過小喬幾次。

左面現紅斑

潛水養病，以為杜小喬網上人氣強勁，應該觀音兵無數。但本刊直擊其養病生活，發覺杜小喬係獨家村，一隻兵埋身都唔見。

上週二（ 6日）杜小喬一支公離開住所後，先到旺角麥記醫肚，一個人獨自食包，脫下口罩，杜小喬左邊面明顯有一撻紅斑，去到人多地方，杜小喬再戴上口罩遮病樣。醫肚完畢即去廣華醫院，期間更入到骨科覆診。

杜小喬到廣華醫院等咗陣，就直入骨科，全程唔使問人，明顯已嚟過多次覆診。

上週六（ 10日）杜小喬接受本刊訪問，她表示：「我要食好多藥控制病情！每星期都要去廣華覆診。」

小喬養病期間都去學日文。她說：「因為唔做嘢，都要好努力改變自己，你冇理由咩都唔做㗎。」真係上進呀。

「會影響個腎」

除咗覆診外，連日來杜小喬都係天黑先出街，原來因為怕曬。上週六（ 10日）杜小喬接受訪問，大談病情進展，她說︰「我每個禮拜都要覆診，（點解去睇骨科？）因為呢個病唔只影響皮膚，會影響個腎、影響個身，影響好多 part㗎。我要食好多藥控制住！日頭出街曬 5分鐘都唔舒服！所以多數夜晚出街。」杜小喬仲話呢個病冇得完全好番晒。她說︰「我呢個病唔會完全好番，只可以用藥物控制。但食藥又會面腫，唔食藥，手指同關節又痛。」週日（ 11日）仲有少少包包面嘅小喬已復工，仲自嘲自己塊面圓過月亮，「人哋 Sailor Moon，我就月亮喬」病仲識得講笑，好正面呀！快啲康復啦小喬，成班巴打為你打氣。

小喬除咗喺 fb自爆患紅斑狼瘡症，亦喺 YouTube唱〈 The Best Is Yet To Come〉答謝粉絲問喉同祝福。網上圖片

小喬話最怕陽光照射，除覆診外，多數夜晚出動，她說：「我日頭曬 5分鐘已經唔舒服。」

入廣華醫院期間，小喬撞到相熟朋友，二人喺路上吹咗幾分鐘。

可能成世食藥！

「紅斑狼瘡症以東方女性患病率高，現階段係可以用藥物制止病情，將呢個病嘅活躍期轉為靜止期，但由活躍轉靜止嘅時間，就因人而異，有啲人幾星期就得，但亦有人幾年先可以。而食類固醇藥係會令面部浮腫，但亦有可能成世都要食藥去令靜止期延續。」

史泰祖　皮膚科醫生《蘋果日報》圖片

圈中多年來傳過有唔少女藝人患有紅斑狼瘡症，唯獨毛舜筠曾經在蘇絲黄電台節目承認，但已多年冇復發。

女神去晒邊？

近年唔少網上女神 hit到攻入娛圈，除咗杜小喬外，仲有大埔 LuLu， Miss Hunny。各有各大計，小喬真係要快啲好番呀！

Hunny處女騷

《蘋果日報》圖片

Miss Hunny 3月同 6月將會到韓國睇魔術騷， 12月將會喺九展搞個人魔術處女騷。

LuLu做老闆

大埔 LuLu除咗繼續接騷，嚟緊仲會搞經理人公司，由𡃁模轉型為做老闆捧人。

鍾意就快D Share啦！

下一篇 》